”چنگان ایلسوِن ہونڈا سٹی سے بہت آگے ہے” – مالک کا ریویو
پاک ویلز پر مالک کے ریویوز کے سلسلے کی ایک اور قسط میں آپ کو خوش آمدید۔ آج ہمارے ساتھ حال ہی میں لانچ کی گئی چینی سیڈان، چنگان ایلسوِن، کے ایک مالک ہیں۔ وہ اس سے پہلے ہونڈا سٹی مینوئل چلا چکے ہیں اور لوکل مارکیٹ میں لانچ ہوتے ہی انہوں نے ایلسوِن کا بہترین ویرینٹ خرید لیا تھا اور اس فیصلے پر حد سے زیادہ خوش ہیں۔ تو مکمل ریویو یہ رہا۔
خریداری اور قیمت:
مالک نے چند سالوں تک مینوئل 1.3L ہونڈا سٹی 2010 چلائی تھی اور کسی آٹومیٹک سیڈان پر اپگریڈ ہونا چاہتے تھے۔ 25 سے 26 لاکھ روپے کے بجٹ میں ان کے لیے سٹی کے علاوہ واحد آپشن ٹویوٹا یارِس اور چنگان ایلسوِن تھیں۔ یارس کے 1.5L ٹاپ آف دی لائن ویرینٹ کی قیمت 30 لاکھ روپے سے اوپر تھی، اور ایلسوِن کے 1.5L ویرینٹ کی قیمت 26 لاکھ روپے تھی، جو بالکل وہی قیمت ہے کہ جو ان کے ذہن مین تھی۔ اس لیے 1.3L ہونڈا سٹی کے مالک نے 1.5L چنگان ایلسوِن کا انتخاب کر لیا۔
مالک نے جنوری میں اپنی ایلسوِن لیومیئر بک کروائی اور 1000 ایلسوِن صارفین کا لکی ڈرا جیتا کہ جنہیں سب سے پہلے ڈلیوری اور 1 سال کی مفت مینٹی نینس کا پیکیج ملا۔ مالک نے اپنی گاڑی مارچ میں حاصل کی، سال بھر کی کمپنی اسپانسرڈ کار مینٹی نینس کے وعدے کے ساتھ۔
چنگان ایلسوِن لیومیئر کی کُل قیمت 25.5 لاکھ روپے جمع 50 ہزار وِد ہولڈنگ ٹیکس اور 59 ہزار رجسٹریشن فیس پڑی۔
ایکسٹیریئر
پاکستان میں تمام بجٹ سیڈانز میں چنگان ایلسوِن بلاشبہ سب سے خوبصورت شکل رکھتی ہے۔ ایک بٹرفلائی کروم گرِل، پروجیکٹر ہیڈ لیمپس اور فرنٹ پر DRLs گاڑی کے فرنٹ کو سڑک پر نمایاں بناتے ہیں۔ CKD یونٹس کی پینٹ کوالٹی کو ذرا بہتری کی ضرورت ہے، لیکن مجموعی طور پر شکل و صورت کے لحاظ سے ایسی گاڑی ہے جسے ہرایا نہیں جا سکتا۔
انٹیریئر
ایکسٹیریئر کی طرح گاڑی کے انٹیریئر کا بھی کوئی مقابلہ نہیں، اگر اس کا مقابلہ دوسری بجٹ سیڈانز سے کیا جائے مثلاً یارِس، سٹی اور ساگا سے۔ ہر چیز بہترین جگہ اور بہترین صورت میں ہے۔ گیئر شفٹر سے کلائمٹ کنٹرول بٹنوں اور انسٹرومنٹ کلسٹر تک۔ سب چیزیں انتہائی سوچ سمجھ کر ڈیزائن کی گئی اور لگائی گئی ہیں۔ مالک بھی اس گاڑی کی خاموش اور پر سکون ڈرائیو سے بہت متاثر ہوئے ہیں۔ کار کیبن کے اندر روڈ کا شور تقریباً نہ ہونے کے برابر ہے۔
آرام کے لحاظ سے اس گاڑی میں ڈرائیور اور آگے بیٹھے مسافر کے لیے کافی ہیڈ روم اور لیگ روم ہے۔ البتہ پچھلے سیٹیں ذرا تنگ ہیں، جو واحد چیز ہے جو مالک کو ہونڈا سٹی کی یاد آتی ہے۔
فیول ایوریج
چنگان ایلسوِن لیومیئر مالک کو شہر کے اندر 12 کلومیٹرز فی لیٹر اور لمبے روٹ پر 15 سے 16 کلومیٹرز کا متاثر کن فیول ایوریج دیتی ہے۔ یہ ٹویوٹا یارِس اور پروٹون ساگا کے فیول ایوریج کے برابر ہے۔
سسپنشن
مالک کے الفاظ میں ایلسوِن کا سسپنشن سٹی سے بہتر اور یارِس سے ذرا کم ہے۔ اس گاڑی پر سفر کے دوران جھٹکے ذرا سخت چینی ٹائروں کی وجہ سے ہیں۔ مالک انہیں جاپانی ٹائروں سے بدلنے کا منصوبہ بنا رہے ہیں۔
سیفٹی
ایلسوِن لیومیئر میں دو ایئر بیگز کے ساتھ ABS اور EBD سیفٹی فیچرز بھی ہیں۔ یہ گاڑی ہل اسٹارٹ اسسٹ اور ٹریکشن کنٹرول نہیں رکھتی کہ جو یارِس اور ساگا میں موجود ہیں۔
نمایاں فیچرز
مالک کو اس قیمت کی گاڑی میں کروز کنٹرول اور الیکٹرانک سن رُوف پا کر حیرت اور خوشی کا ملا جلا احساس ہوا۔ یہ فیچرز ایلسوِن سے 10 لاکھ روپے زیادہ مہنگی پریمیئر سیڈانز میں بھی نہیں آتے۔ مالک 5-اسپیڈ DCT ٹرانسمیشن، 7 انچ ہیومن مشین انٹرفیس، ٹائر پریشر مانیٹرنگ سسٹم (TPMS) اور ریورس پارکنگ سینسرز جیسے فیچرز بھی پسند کرتے ہیں۔
فیچرز جن کی کمی محسوس ہوتی ہے
چنگان ایلسوِن کے مالک جس واحد فیچر کی کمی محسوس کرتے ہیں وہ ری ٹریکٹ ایبل سائیڈ ویو مررز ہیں۔
چنگان ایلسوِن پر حتمی رائے
مالک کسی نئی آنے والی گاڑی سے لاحق خطرات سے اچھی طرح واقف ہیں کہ جس نے ابھی پاکستانی مارکیٹ میں قدم نہیں جمائے، لیکن وہ ان خطرات کے لیے ذہنی طور پر تیار ہیں۔ انہیں چنگان پاکستان اور ماسٹر موٹرز پر کافی اعتماد ہے اور وارنٹی کلیمز کے حوالے سے پر امید ہیں۔
مجموعی طور پر مالک اپنے فیصلے سے بہت مطمئن نظر آتے ہیں۔ “اگر کوئی مجھ سے پوچھے کہ اضافی قیمت پر یہ گاڑی خریدیں گے، تو میں لازماً خریدوں گا۔”