گیلی سڑکوں پر ڈرائیونگ کے لیے 7 مفید مشورے

• Aref Ali


• 3 May 2020

مون سون آنے والا ہے اور اپنے ساتھ بارشوں کا نہ ختم ہونے والا سلسلہ بھی لا رہا ہے۔ اس مضمون میں ہم ان لوگوں کو چند آسان تجاویز دینے جا رہے ہیں جو مون سون آتے ہی گاڑی بند کردیتے ہیں کیوں کہ انہیں گیلی سڑکوں میں گاڑی چلاتے ہوئے خوف آتا ہے۔ کسی حد تک لوگوں کا خوف درست بھی ہے کیوں کہ بارش کے بعد سڑکوں پر کھڑا پانی بہت سے حادثات کی وجہ بنتا ہے۔ ایسی صورتحال میں مناسب احتیاطی تدابیر پر عمل نہ کیا جائے تو مالی اور جانی نقصان کا اندیشہ تو رہے گا ہی۔ لیکن آپ نیچے دیے گئے مشوروں پر عمل کریں گے تو ہر قسم کی پریشانی سے خود کو محفوظ رکھ سکتے ہیں۔

• پانی کی وجہ سے عام ٹائر کی روڈ گرپ متاثر ہوسکتی ہے جس سے گاڑی کے پھسلنے کا خطرہ بڑھ جاتا ہے اور نقصان کا احتمال رہتا ہے۔ اس لیے ہمیشہ یاد رکھیں کہ تیز رفتاری سے گاڑی چلاتے ہوئے اچانک بریک ہر گز نہ لگائیں۔ خاص کر بائیک والوں کے لیے یہ خطرہ اور بھی زیادہ ہوتا ہے اس لیے گیلی سڑکوں پر 50 کلومیٹر فی گھنٹہ سے زیادہ رفتار نہ بڑھائیں۔
• مون سون کے دوران آل-سیزن ٹائر استعمال کریں جو پانی ہونے کے باوجود سڑک پر اچھی گرپ رکھتے ہیں۔
• ایکسلیریٹر پر بہت زیادہ دباؤ بالکل نہ ڈالیں۔ ماہرین کے مطابق 16 کلومیٹر فی گھنٹہ سے گاڑی کی رفتار گھٹائیں ہر مرتبہ جب ونڈشیلڈ وائپر کی تیزی میں اضافہ ہو۔
• بارش کے دوران گاڑی چلانے سے پہلے اطمینان کرلیں کہ ہیڈلائٹس، بریک لائٹس اور ونڈشلیڈ وائپر ٹھیک کام کر رہے ہیں۔ ان چیزوں کا بالکل درست کام کرنا سفر میں آپ کے لیے بہت اہم ہیں۔
• گیلی سڑک پر ڈرائیونگ کرتے ہوئے آگے والی گاڑی سے مناسب فاصلہ رکھیں۔ یہ سادہ اور آسان سی ترکیب آپ کو بڑے حادثات سے محفوظ رکھ سکتی ہے۔
• برسات کے دوران گاڑی کی ہیڈلائٹس جلتی رکھیں تاکہ دوسری گاڑیاں چلانے والے ڈرائیور آپ کو بآسانی دیکھ سکیں۔ اس کے علاوہ گاڑی کی دھیمی رفتار بھی اس ضمن میں اہم ہے۔
• گیلے راستوں پر اچانک موڑ کاٹنے سے بالکل اجتناب کریں کیوں کہ یہ عمل آپ کو بڑی پریشانی میں ڈال سکتا ہے۔

ہوسکتا ہے کہ آپ میں سے کئی لوگ ان باتوں کو پہلے ہی جانتے ہوں بلکہ ان پر عمل بھی کر رہے ہوں۔ لیکن پھر بھی ضروری ہے کہ موقع سے پہلے یاددہانی کروادی جائے اور جنہیں نہیں پتہ، انہیں بھی ان باتوں کا علم ہوجائے اور وہ بھی بے خوف و خطر ڈرائیونگ کر سکیں۔ اگر آپ کے پاس بھی ایسی ہی کوئی آسان اور مفید تجویز ہے تو ہمیں ضرور بتائیں۔