چنگان پاکستان نے بڑھتی مارکیٹ ڈیمانڈ سے نمٹنے کا منصوبہ تیار کر لیا
ملک میں گاڑیوں کی مانگ بڑھنے کے بعد پاکستانی کار ساز کمپنیز کئی مشکلات کا شکار ہیں۔ کئی کمپنیز نے گاڑیوں کی سست پیداوار کی وجہ سے بکنگز بند کردی ہیں تو دوسری جانب چنگان پاکستان نے اس مسئلے سے نمٹنے کیلئے ڈبل شفٹ آپریشنز کا آغاز کر دیا ہے۔
ڈبل شفٹ آپریشن کا آغاز 20 مئی سے ہوگا جس کے تحت پلانٹ میں کام کرنے والو ں کی تعداد 30 ہزار سے بڑھا کر 50 ہزار کر دی گئی ہے۔ اس کے علاوہ اضافی 1000 نئی ملازمتیں بھی پیدا کی گئی ہیں۔
چنگان پاکستان ڈبل شفٹ کے اس منصوبے کو بہت پہلے سے ہی اپنی پائپ لائن میں شامل کیے ہوئے تھی لیکن کمپنی کی جانب سے اس منصوبہ پر قبل از وقت کارروائی کے آغاز کر دیا گیا ہے جس کی ایک اہم وجہ وزیراعظم عمران خان کی جانب سے اعلان کردہ “روشن اپنی کارسکیم” کو قرار دیا جا رہا ہے۔
وزیراعظم عمران خان کی “روشن اپنی کارسکیم”
حکومت پاکستان نے سٹیٹ بینک آف پاکستان کے تعاون سےغیر مقیم پاکستانیوں کیلئے روشن اپنی کار سکیم کا اعلان کیا ہے۔ جس کے تحت وہ کم ترین سود کی شرح، رجسٹریشن فیس اور دیگر ٹیکسسز کے ساتھ اپنی فیملی کیلئے گاڑیاں خرید سکیں گے۔ اس کے علاوہ انھیں گاڑی کی فراہمی کیلئے انتظار بھی نہیں کرنا پڑے گا۔اس سکیم کے تحت غیر مقیم پاکستانی کہیں بھی بیٹھ کر روشن ڈیجیٹل اکاؤنٹ کھولتے ہوئے کسی بھی پاکستانی بینک کے ذریعے کار فنانسنگ کیلئے ایپلائی کر سکتے ہیں۔ جس کے بعد بینک نہ صرف ان سے کم شرح سود وصول کریں گے بلکہ کار کمپنیز غیر مقیم پاکستانیوں کو گاڑی فراہم کرنے کو اولین ترجیحات میں شامل کریں گی۔
یہی وجہ ہے کہ چنگان پاکستان نے غیر مقیم پاکستانیوں کو ایک ماہ کے اندر گاڑی فراہم کرنے کو یقینی بنانے کیلئے ڈبل شفٹ کا آغاز کیا ہے۔ اس کے علاوہ چنگان ماسٹر موٹرز مذکورہ سکیم کے موثر اطلاق کے لئے بینکوں کے ساتھ شراکت داری بھی کررہی ہیں۔چنگان ماسٹر موٹرز کے سی ای او دانیال ملک نے ڈبل شفٹ کے انعقاد پر بات کرتے ہوئے کہا کہ ہم ہر پاکستانی صارف کیلئے یہ ممکن بنا رہے ہیں کہ وہ تکنیکی طور پراعلی درجے کی گاڑیوں تک آسانی سے رسائی حاصل کر سکے۔ انکا کہنا تھا کہ ہمارا ارادہ ہے کہ اپنی پیداواری صلاحیت میں اضافہ کرتے ہوئے ہم اپنے کسٹمرز کو جلد از جلد گاڑیاں ڈیلیور کریں۔ ان کا مزید کہنا تھا کہ اس فیصلے سے ماسٹر چنگان موٹرز نے پاکستان میں آٹوموبائل صنعت کے مضبوط مستقبل کا تصور پیش کیا ہے۔