ہںڈا سی جی 125 2025 پر 20000 روپے اون وصول کیا جانے لگا
اٹلس ہنڈا نے دو دن پہلے اپنی نئی ہنڈا سی جی 125 ماڈل 2025 متعارف کروائی ہے اور دلچسپ بات یہ ہے کہ یہ نئی بائک نہیں ہے بلکہ اس کے سٹیکر میں کچھ تبدیلیاں کی گئی ہیں۔ پچھلے 40 سالوں سے کمپنی اسی موٹر سائیکل کے سٹیکرز تبدیل کر کے اسے نئی اپ گریڈ کا نام دے رہی ہے اور یوں ہنڈا سی جی کا نیا ماڈل لانچ کر دیا جاتا ہے۔ ان کمپنیز کا کام صرف سٹیکرز میں تبدیلی کرنا اور قیمت بڑھاے تک محدود ہو گیا ہے۔
دلچسپ بات یہ ہے کہ پاکستانی عوام اٹلس ہنڈا پر تنقید کرنے کے بجائے 80 کی دہائی کی اس وائبریٹر مشین کو زیادہ قیمت پر خریدنا پسند کرتی ہے۔ حقیقت تو یہ ہے کہ پاکستانی اس بائک کو اتنا پسند کرتے ہیں کہ وہ سی جی 125 پر اون (پریمیم) دینے کے لیے بھی تیار ہیں اور ہم اس بات کی تصدیق بھی کر چکے ہیں۔
ہنڈا سی جی 125 2025 اور اون
آج پاک ویلز کی ٹیم نے ہنڈا سی جی 125 ماڈل 2025 کے حوالے سے تازہ ترین معلومات حاصل کرنے کے لیے کئی موٹر سائیکل ڈیلرز کا دورہ کیا۔ مختلف ڈیلرز کے مطابق سی جی 125 2025 ماڈل پر تقریباً 17000 سے 20000 روپے کا اون چل رہا ہے۔ خاص طور پر، کالے رنگ پر 20000 روپے اور سرخ رنگ پر 17000 روپے اون ہے۔ ڈیلرز کے مطابق یہ ہائپ حالیہ لانچ کی وجہ سے ہے اور سی جی 125 کے شوقین اسے جلد از جلد خریدنا چاہتے ہیں۔
مزید یہ کہ، زیادہ تر ڈیلرز سی جی موٹر سائیکل فروخت کرنے سے انکار کر رہے ہیں کیونکہ طلب زیادہ اور رسد کم ہے۔ حتیٰ کہ کچھ بڑے ڈیلرز جن کے پاس سٹاک ہے وہ بھی 20000 روپے سے زیادہ اون چارج کر رہے ہیں۔ یعنی کہ لوگ 2025 ماڈل کے ابتدائی ویرینٹ کے لیے 255000 روپے تک خرچ کرنے کے لیے تیار ہیں جبکہ اس کی انوائس پرائس 234900 روپے ہے۔
پاک ویلز کا نقطہ نظر
ہماری نظر میں یہ بلکل پاگل پن ہے کہ 1980 کی دہائی کی بائک کو اون (پریمیم) پر خریدا جائے، جب کہ آپ پہلے سے جانتے ہیں کہ یہ وہی بائک ہے جس میں سٹیکرز اور گرافکس کے علاوہ کوئی تبدیلی نہیں کی گئی ہے۔ لہذا، اس بائک کو اون پر خریدنے کا کوئی جواز نہیں بنتا یہ بالکل ویسی ہی بائیک ہے جیسی 2023 میں تھی۔
اگر آپ کو واقعی یہ بائیک خریدنی ہے تو 2020 یا 2022 کا پرانا ماڈل خریدنا ایک زیادہ سمجھدار انتخاب ہے۔ ایک بائک کو اس کی انوائس قیمت سے 20000 روپے زیادہ خرچ کرنا ایک بلکل فضول فیصلہ ہے اور 100 فیصد پیسے کا ضیاع ہے!