انر-زی نے پاکستان آٹو شو 2020ء میں الیکٹرک بائیک کی رونمائی کر دی
پاکستان کی پہلی الیکٹرک وہیکل ریسرچ، ڈیزائن اور انجینئرنگ کمپنی انر-زی (INER-Z) پرائیوٹ لمیٹڈ نے ملک میں گاڑیوں کی سب سے بڑی نمائش پاکستان آٹو شو 2020ء (PAPS-20) کے دوران اپنی پہلی “ساختہ پاکستان” الیکٹرک گاڑیوں کی لائن اَپ کے اجراء کا اعلان کر دیا ہے۔
کمپنی نے ایونٹ میں اپنی الیکٹرک موٹر سائیکل کی نمائش کی اور ہزاروں صنعتی ماہرین، سرکاری عہدیداروں، سرمایہ کاروں اور عوام کی موجودگی میں ایک الیکٹرک کار اور ایک الیکٹرک رکشہ بھی متعارف کروایا۔
پاکستان ایسوسی ایشن آف آٹوموٹو پارٹس اینڈ ایکسیسریز مینوفیکچررز (PAAPAM) کے زیرِ انتظام یہ آٹو شو 21 سے 23 فروری 2020ء تک ایکسپو سینٹر، لاہور میں ہو رہا ہے۔ نمائش ملک بھر سے 3000 بڑی، درمیانے درجے کی اور چھوٹی صنعتوں کی نمائندگی کر رہی ہے۔
انر-زی آٹوموٹو کی الیکٹرک گاڑیوں کی یہ لائن اَپ پاکستانیوں کی سفر کی بڑی ضروریات کو پورا کرتی ہے۔ انر-زی کے CEO مرتضیٰ زیدی نے کہا کہ “ہم پاکستان کی پہلی مقامی طور پر ڈیزائن کی گئی اور بنائی گئی الیکٹرک گاڑیوں کوعام مارکیٹ میں پیش کرنے پر بہت فخر محسوس کرتے ہیں۔”
انہوں نے اپنی گفتگو جاری رکھتے ہوئے کہا کہ “ان گاڑیوں کے ذریعے ہم نہ صرف ہر پاکستانی کے ایک موزوں متبادل کی حیثیت سے ایک سستی اور ماحول دوست الیکٹرک گاڑی کے خواب کو پورا کر رہے ہیں بلکہ ملک کا پہلا EV مینوفیکچرنگ پلانٹ اور R&D سینٹر بنا کر روزگار کے ہزاروں مواقع پیدا کر رہے ہیں۔”
انر-زی کے شریک بانی اور CTO حیدر زیدی نے کہا کہ “ہماری الیکٹرک گاڑیاں سفر کا ایسا تجربہ دینے کے لیے بنائی گئی ہیں جو سستا ہو، گاڑی کی دیکھ بھال اور مرمت کے جھنجھٹ سے پاک ہو اور صارف کو خوش کر دینے والا ہو۔ ہم ایسے آٹوموٹو سلوشنز بنانے کے لیے جدت اور انجینئرنگ کو مزید آگے لے جانا چاہتے ہیں جو پاکستان کو EV کے عالمی انقلاب میں نمایاں طور پر ابھاریں۔”
انر-زی آٹوموٹو 2020ء میں اپنی الیکٹرک گاڑیوں کی پیداوار شروع کرنے کا ارادہ رکھتا ہے۔ دلچسپی رکھنے والے صارفین الیکٹرک موٹر سائیکل کے لیے اپنے پری-آرڈرز 2020ء کی تیسری سہ ماہی میں حاصل کر سکتے ہیں۔ یہ الیکٹرک بائیک 20 ایمپیئر کی بیٹری، 65 کلومیٹرز کی رینج، ساڑھے 4 گھنٹے کا چارجنگ ٹائم رکھتی ہے اور مقامی طور پر بنائی جائے گی۔
الیکٹرک بائیک کے علاوہ ایونٹ میں کلاسک کارز بھی پیش کی گئی ہیں، تصاویر نیچے دیکھیں:
