ایرانی صدر کا دورہ پاکستان، اہم شاہراہیں اور میٹرو سروس بند

ایرانی صدر ابراہیم رئیسی کے پاکستان کے سرکاری دورے کے باعث ٹریفک پولیس اور پنجاب ماس ٹرانزٹ اتھارٹی نے اہم سڑکیں اور میٹرو بس سروس کو محدود مدت کے لیے بند کرنے کا اعلان کیا ہے۔ ٹرانزٹ اتھارٹی کے مطابق ایرانی صدر کے لاہور کے ہائی پروفائل دورے کے تناظرمیں لاہور میٹروبس سروس 23 اپریل 2024 کو ایرانی صدر کے لاہور میں قیام کی مدت کے لیے معطل رہے گی۔”

ضلعی انتظامیہ کے مطابق سڑکیں اور میٹروسروس اس لیے بند کی گئی ہے کہ ایرانی صدر کے دورہ کے سلسلے میں اٹھائے گئے حفاظتی اقدامات کی وجہ سے عام لوگوں کو تکلیف سے بچایا جا سکے۔

ادھر لاہور ٹریفک پولیس نے شہریوں سے کہا ہے کہ وہ مال روڈ، جیل روڈ، کینال روڈ، بلیوارڈ روڈ، گریٹر اقبال پارک، لاری اڈا اور لوئر مال پر غیر ضروری سفر سے گریز کریں۔ ایرانی صدر کے آفیشل نقل و حرکت کی وجہ سے مخصوص سڑکوں کو ٹریفک کے لیے بند کر دیا جائے گا۔ اس کے علاوہ پولیس نے کہا ہے کہ رنگ روڈ آج سہ پہر 3:00 بجے تک بند رہے گا۔

مزید برآں شاہدرہ سے آزادی فلائی اوور، کچہری کی طرف داتا صاب، بھاٹی چوک، سرکلر روڈ، پی ایم جی چوک، استنبول چوک تک سڑکیں دونوں اطراف سے ٹریفک کے لیے بند ہیں۔

نواز شریف انٹر چینج سے نیازی چوک تک رنگ روڈ آج صبح 6 بجے سے سہ پہر 3 بجے تک عوام کے لیے دونوں اطراف بند رہے گی اور ایم 9 کے لیے آنے والی اور جانے والی ٹریفک کو کالا شاہ کاکو انٹر چینج کی طرف موڑ دیا جائے گا۔

لہذا، اگر آپ آج لاہور میں یا سفر کرنے کا ارادہ کر رہے ہیں، تو براہ کرم محتاط رہیں، کیونکہ آپ کو ٹریفک سے متعلق کچھ مسائل کا سامنا کرنا پڑ سکتا ہے۔ گزشتہ روز پنجاب حکومت نے ایرانی صدر کے دورے کے پیش نظر سکولوں، کالجوں اور یونیورسٹیوں میں عام تعطیل کا اعلان کیا تھا جس کی بنیادی وجہ سکیورٹی خدشات تھے۔ اعلیٰ سطح کا یہ دورہ دونوں ممالک کے درمیان تعلقات کے لیے اہم ہے۔ اس لیے قیادت اور شہریوں دونوں کے تحفظ کو یقینی بنانے کے لیے یہ اقدامات کیے گئے ہیں۔

جیسا کہ پہلے بتایا جا چکا ہے کہ سڑکیں اور میٹرو محدود مدت کیلئے بند کی گئی ہیں جو کہ  جلد کھول دی جائیں گی۔ لہٰذا اس بارے اپ ڈیٹ رہنے کے لیے لاہور ٹریفک پولیس اور ٹرانزٹ اتھارٹی کے آفیشل ایکس ہینڈلز کو چیک کرتے رہیں اور اس کے مطابق منصوبہ بندی کریں۔

کیا آج سڑکیں بند ہونے کی وجہ سے آپ کو ٹریفک کے مسائل کا سامنا کرنا پڑا؟ کمنٹس سیکشن میں ہمیں بتائیں۔

Exit mobile version