انتظار کی گھڑیاں ختم! کِیا سپورٹیج 5 جنریشن منظر عام پر۔۔۔
دور حاضر کی آٹو مارکیٹ میں صرف ایس یو ویز کا ہی نام لیا جا رہا ہے۔ مختلف کمپنیز کی جانب مختلف فیچرزکے ساتھ ایس یو ویز متعارف کروائی گئی ہیں لیکن کورین برانڈ کِیا کی تو بات ہی الگ ہے۔
کِیا سپورٹیج 4 جنریشن کو 2015 میں متعارف کروایا گیا جو کہ کِیا کمپنی کا بیسٹ سیلنگ کراس اوور ماڈل رہا اور اب کمپنی نے سپورٹیج 5 جنریشن کو مارکیٹ میں اتارنے کی تیاریا شروع کر دی ہیں۔ چند ہفتے قبل کِیا نے آفیشلی طور پر سپورٹیج 5 جنریشن کی چند جھلکیاں جاری کی تھیں لیکن اب کمپنی نے تمام پردے ہٹا دئیے ہیں۔ کمپنی کی جانب سے گاڑی کے فیچرز اور تکنیکی تفصیلات کو سامنے نہیں لایا گیا البتہ ڈیزائن کی فلاسفی پر ضرور بات کی گئی ہے۔
ایکسٹیرئیر
سپورٹیج 5 جنریشن کی آفیشل لانچ سے قبل انٹرنیٹ پر بہت سی تصاویر دیکھنے کو ملیں جس کے بعد ٹیزر تصاویر سے آنے والے نئے ماڈل کا صحیح انداز ہو گیا کہ یہ دیکھنے میں کیسا ہوگا۔ کمپنی کی جانب سے اس نئے ماڈل کی پیمائش نہیں بتائی گئی ہے لیکن تصاویر دیکھنے کے بعد کہا جاسکتا ہے کہ آنے والا نئے ماڈل کی گاڑی کا سائز گزشتہ ماڈل سے کچھ بڑا ہوگا۔
نئے برانڈ لوگو کے ساتھ گاڑی کا نیا ماڈل سب سے الگ اور کافی جاذب نظر بھی ہے۔ اسی طرح DRLs کو فینڈر تک بڑھایا گیا ہے جبکہ دونوں طرف دو دو سپاٹ فوگ لائٹس بھی دی گئی ہیں۔ نئے ماڈل کی اِس ایس یو وی میں سلِم LED ٹیل لائٹس بھی دیکھنے ملتی ہیں جن میں انڈیکیٹرز کو بھی شامل کیا گیا ہے جبکہ اس سے قبل آںے والے ماڈل میں انڈیکیٹرز بمپر کے نیچے والے حصے میں لگائے گئے تھے۔
اس کے علاوہ نئے ماڈل میں رئیر وائپر آرم بھی نظر نہیں آ رہا جس کی وجہ یہ ہے کہ یہ رئیر سپائلر کے نیچے سے آپریٹ ہوگا۔ کمپنی کا کہنا ہے کہ مختلف رنگوں کے ساتھ ساتھ سپورٹیج 5 جنریشن کالی چھت کے ساتھ بھی دستیاب ہوگی جو کہ گاڑی کے سپورٹی کریکٹر کو مزید نمایاں کرے گا۔ سپورٹیج کا یہ نیا ماڈل کِیا کی کوریا، جرمنی، امریکا اور چین میں کام کرنے والی مین گلوبل ڈیزائن ٹیمز کی مشترکہ کوشش ہے۔
انٹیرئیر
کمپنی کی جانب سے سپورٹیج 5 جنریشن کی جاری کی گئی جھلکیوں کو دیکھ کر اس بات کا انداز لگا لیا گیا تھا کہ یہ ماڈل جدت میں اپنی مثال آپ ہوگا اور ایسا ہی ہوا۔
ڈیش بورڈ کی تصاویر کو دیکھ کر اس کی ڈیزائن فلاسفی کو بآسانی سمجھا جا سکتا ہے۔ یہاں آپ کو مڑا ہوا نیا پینا رومک گلاس پینل دیکھنے کو ملے گا جس میں دو ڈیجیٹل سکرینز متعارف کروائی گئی ہیں۔ ان میں سے ایک ڈرائیور انسٹرومینٹل پینل جبکہ دوسری انفوٹینمنٹ سسٹم پر مشتمل ہے۔
س کے علاوہ انٹیرئیر میں آپ کو نئے کلائمیٹ کنٹرول پینل اور نئے برانڈ لوگو کے ساتھ نیا سٹیرنگ وہیل بھی دیکھنے کو ملے گا۔ دوسری جانب تین طرفہ ائیر وینٹس اور نیا سنٹرل کنسول اس کے انٹیرئیر کو مزید خوبصورت بناتا ہے۔
کمپنی کا کہنا ہے کہ گاڑی کے انٹیرئیر میں اعلی کوالٹی کا میٹریل استعمال کیا گیا ہے۔ اس کے علاوہ گاڑی میں بہترین سافٹ ٹچ پوائنٹ، ساؤند پروفنگ اور آرام دہ ماحول بھی فراہم کیا گیا ہے۔
انجن پاور
کمپنی نے اس نئی گاڑی کی کوئی ٹیکنیکل یا مکینیکل تفصیلات جاری نہیں کیں لیکن اب جبکہ کِیا سپورٹیج کو ہیونڈائی ٹوسان کی جڑواں کہا جا رہا ہے تو ہم اس کے انجن اور پاور کو 4 جنریشن ہیونڈائی ٹوسان کے برابر قرار دے سکتے ہیں جس کے تین ویرینٹ موجود ہیں۔ جن میں شامل کردہ 2000 سی سی اِن لائن 4 ایم پی آئی انجن 154 ہارس پاور جبکہ 2500 سی سی اِن لائن 4 187 ہارس پاور پیدا کرتا ہے۔ اس کے علاوہ تیسرا ویرینٹ 1600 سی سی ٹربو انجن پر مشتمل ہے جو کہ 177 ہارس پاور پیدا کرتا ہے۔
دوسری جانب کِیا سپورٹیج میں ہائیبرڈ اور پلگ اِن ہائیبرڈ ویرینٹ بھی دیکھنے کو مل سکتے ہیں۔ اس کے علاوہ فرنٹ وہیل ڈرائیو اور AWD کے ویرینٹ بھی دستیاب ہوں گے۔
مارکیٹ میں دستیابی
آئندہ چند ماہ میں کمپنی اس گاڑی کے فیچرز اور دیگر تکنیکی تفصیلات جاری کرے گی۔ رواں سال کے اواخر میں جنوبی کوریا میں اس گاڑی کی سیل شروع ہو جائے گی جبکہ شمالی امریکا میں آئندہ سال 2022 کے اوائل میں اس گاڑی کو سیل کیلیے پیش کیا جائے گا۔
پاکستان میں کب ریلیز ہوگی؟
چونکہ یہ گاڑی امریکا اور کوریا میں رواں سال کے آخر میں سیل کیلئے پیش کی جائے گی، اس لیے امید ہے کہ پاکستان میں یہ گاڑی 2022 کے اواخر یا 2023 کے اوائل میں سیل کیلئے پیش کی جائے گی۔
