موٹروے پر ایم ٹیگ لازمی؛ رجسٹریشن کی آخری تاریخ کا اعلان

پاکستان کے موٹرویز پر سفر کرنے والے ڈرائیوروں کے لیے ایک انتہائی اہم خبر سامنے آئی ہے۔ ون نیٹ ورک نے تمام گاڑی مالکان کو ہدایت کی ہے کہ وہ 15 جون 2026 سے پہلے اپنی گاڑیوں پر ایم ٹیگ (M-Tag) کی رجسٹریشن لازمی مکمل کروائیں۔

یہ فیصلہ موٹروے پر ڈیجیٹل ٹول ٹیکس جمع کرنے اور ٹریفک کے بہاؤ کو اسموتھ بنانے کے لیے کیا گیا ہے۔ اب موٹروے صارفین کے لیے ایم ٹیگ لگانا اختیاری نہیں بلکہ لازمی ہوگا۔ 15 جون کے بعد بغیر ایم ٹیگ والی گاڑیوں کو موٹروے پر داخلے میں شدید مشکلات یا پابندی کا سامنا کرنا پڑ سکتا ہے۔

گاڑی مالکان کے لیے اہم ترین معلومات اور ڈیڈ لائنز

ون نیٹ ورک کی ایڈوائزری کے مطابق، موٹروے پر سفر کو آسان بنانے کے لیے چند اہم تاریخیں اور تبدیلیاں درج ذیل ہیں:

• ایم ٹیگ لازمی ہونے کی تاریخ: تمام موٹرویز پر 15 جون 2026 سے ایم ٹیگ کے بغیر سفر کی اجازت نہیں ہوگی۔ ٹول پلازوں پر لمبی لائنوں اور آخری وقت کی پریشانی سے بچنے کے لیے شہریوں کو فوراً رجسٹریشن کی ہدایت کی گئی ہے۔

• 5 سال پرانے ایم ٹیگ بلاک ہوں گے: جن گاڑیوں پر 5 سال سے زیادہ پرانے ایم ٹیگ لگے ہوئے ہیں، انہیں 30 جون 2026 سے پہلے تبدیل کروانا ہوگا۔ اگر یہ ٹیگ تبدیل نہ کروائے گئے تو 1 جولائی 2026 سے انہیں بلاک کر دیا جائے گا۔

• ایم ٹیگ تبدیلی کی نئی فیسیں: پرانے ایم ٹیگ کی مفت تبدیلی کی سہولت 31 مئی کو ختم ہو چکی ہے۔ 1 جون سے اب اس کے چارجز 150 روپے ہیں، جبکہ 1 جولائی کے بعد پرانا ٹیگ تبدیل کروانے پر 300 روپے فیس ادا کرنا ہوگی۔

 اب صرف ڈیجیٹل پیمنٹ ہوگی

ون نیٹ ورک کی رپورٹ میں ایک اور بڑی تبدیلی کا اعلان کیا گیا ہے کہ موٹروے ٹول پلازوں پر کیش (نقد رقم) کے ذریعے ایم ٹیگ ری چارج کرنے کی سہولت 30 جون 2026 کو ہمیشہ کے لیے ختم ہو جائے گی۔

اس کا مطلب ہے کہ مسافروں کو اب صرف ڈیجیٹل طریقوں سے ہی اپنا بیلنس لوڈ کرنا ہوگا۔ اس کے لیے M-Tag One Network موبائل ایپ استعمال کی جا سکتی ہے، جہاں آپ اپنا بیلنس چیک کرنے کے ساتھ ساتھ موبائل بینکنگ، ایزی پیسہ یا جیز کیش کے ذریعے ڈیجیٹل ری چارج کر سکتے ہیں۔

اگرچہ نوجوان اور ٹیکنالوجی استعمال کرنے والے افراد کے لیے یہ ایک بہترین اور آسان سہولت ہے، لیکن پسماندہ علاقوں یا بڑی عمر کے ڈرائیورز، جو موبائل بینکنگ کے عادی نہیں ہیں، انہیں آغاز میں کچھ مشکلات پیش آ سکتی ہیں۔ اس لیے وقت سے پہلے ڈیجیٹل ری چارج کا طریقہ سیکھنا ضروری ہے۔

پاک ویلز کا مشورہ 

موٹروے استعمال کرنے والے تمام شہری آخری دنوں کا انتظار نہ کریں۔ 15 جون سے پہلے اپنا نیا ایم ٹیگ لگوائیں، اگر ٹیگ 5 سال سے پرانا ہے تو اسے 30 جون سے پہلے تبدیل کروائیں اور کیش ری چارج ختم ہونے سے پہلے ڈیجیٹل ایپس کا استعمال شروع کریں۔ آغاز میں یہ تبدیلی تھوڑی مشکل لگ سکتی ہے، لیکن طویل مدت میں یہ ٹول پلازوں پر آپ کا قیمتی وقت اور پٹرول بچانے کا باعث بنے گی۔

موٹرویز، ٹریفک قوانین، چالان اور آٹو مارکیٹ کی تمام تازہ ترین لائیو اپڈیٹس کے لیے — گوگل نیوز پر پاک ویلز کو فالو کریں۔