پاک سوزوکی نے اپنی بائکس کی بکنگ بند کر دی
درآمد پر مبنی سپلائی چین میں پائے جانے والے مسائل سمیت دیگر پیداواری مسائل کی وجہ سے پاک سوزوکی نے اپنی بائکس کی بکنگ اگلے نوٹس تک روک دی ہے۔ یہ فیصلہ کمپنی کی طرف سے کار پروڈکشن پلانٹ بند ہونے کے دوران ہی آیا ہے۔
کمپنی نے اپنے ڈیلرز کو ایک نوٹس میں آگاہ کیا ہے کہ بکنگ کی معطلی جمعہ (آج) سے نافذ العمل ہوگی۔
بائیک بکنگ پر ڈیلرز کو خط
نوٹس میں مزید لکھا گیا کہ موجودہ معاشی حالات، درآمد پر مبنی سپلائی چین کی رکاوٹوں اور غیر یقینی پیداواری امکانات کے تحت ہم نئے صارفین کیلئے بائک کی بکنگ لینے سے قاصر ہیں اور اسی لیے ہم 20 جنوری 2023 سے اپنی موٹرسائیکلوں کی پروڈکشن کی بکنگ فی الحال بند کر دیں گے۔ کمپنی نے مزید کہا کہ نئے صارفین کی خدمت کے لیے حالات سازگار ہونے پر سوزوکی بائیک کی بکنگ دوبارہ شروع ہو جائے گی۔
موجودہ حالات کے درمیان کمپنی کا یہ قدم حیران کن نہیں ہے کیونکہ آٹو انڈسٹری کو درآمدات، روپے کی قدر میں کمی اور مارکیٹ کی غیر یقینی صورتحال کا سامنا ہے۔ تاہم، مارکیٹ کے ماہرین نئے آرڈرز قبول کرنے کا الزام بھی کمپنی پر عائد کرتے ہیں کیونکہ فیکٹریاں بند ہو رہی ہیں، اور مارکیٹ میں خام مال کی کمی ہے۔
سوزوکی پلانٹ بند
13 جنوری 2023 کو، غیر پیداواری دنوں کی تعداد میں توسیع کرتے ہوئے کار ساز کمپنی نے اعلان کیا کہ سٹیٹ بینک آف پاکستان کی طرف سے عائد درآمدی پابندیوں کے پیش نظر 16 جنوری سے 20 جنوری تک کوئی اسمبلی آپریشن نہیں ہوگا۔ اس سے قبل کمپنی نے اپنی پیداوار 2 جنوری سے 13 جنوری تک بند رکھی تھی۔
آٹو پارٹس مینوفیکچررز ایسوسی ایشن (PAMA) کے سابق چیئرمین مشہود خان نے کہا کہ آٹو مینوفیکچررز کی جانب سے عارضی بندش کی وجہ سے ڈیمانڈ تقریباً صفر کے قریب پہنچ گئی ہے۔ اس مہینے کے آغاز سے، آٹو انڈسٹری نے ہفتے میں صرف دو دن کام کیا ہے۔ انہوں نے کہا کہ صورتحال مستقبل کے لیے اچھی نہیں ہے اور تاجر اور صنعت کار دونوں ہی انتہائی تشویش میں مبتلا ہیں۔
انہوں نے مزید کہا کہ یہ گراوٹ بنیادی طور پر ڈالر کی قلت اور درآمدی سامان کی عدم دستیابی کی وجہ سے ہے۔ آٹو پارٹس سیکٹر سمیت آٹو انڈسٹری کو ڈیمانڈ میں کمی کی وجہ سے بہت زیادہ نقصان پہنچا ہے۔ اس مسئلے نے کمپنیوں کو پورے ہفتے میں صرف دو دن کام کرنے پر مجبور کر دیا ہے۔
سوزوکی بائیک کی بکنگ کی معطلی کے بارے میں آپ کا کیا خیال ہے؟ کمنٹس سیکشن میں اپنی رائے کا اظہار کریں۔