پیٹرول کی قیمتوں میں 14 روپے فی لیٹر اضافے کا امکان
پاکستان میں پیٹرول کی قیمت میں اگلے پندرہ دن کیلئے ایک اور اضافہ متوقع ہے۔ اس سے قبل 31 اگست کو حکومت نے پیٹرول کی قیمت میں 14.91 روپے فی لیٹر اضافہ کیا تھا۔ جس کے بعد پاکستان میں پیٹرول کی قیمت بڑحھ کر 305.36 روپے ہو گئی جبکہ پرانی قیمت 290.45 روپے تھی۔ دریں اثنا، ہائی سپیڈ ڈیزل کی قیمت (HSD) میں 18.44 روپے فی لیٹر کا اضافہ دیکھا گیا۔ جس کے بعد نئی قیمت 311.84 روپے ہو گئی جبکہ پرانی قیمت 293.40 روپے تھی۔ مزید برآں، آئی ایم ایف کیساتھ طے کردہ شرائط کے مطابق پیٹرولیم ڈویلپمنٹ لیوی (PDL) میں بھی 5 روپے فی لیٹر اضافہ کیا گیا۔
پاکستان میں پیٹرول کی قیمت میں اگلا اضافہ
بجلی کے بلوں میں اضافے، روپے کی قدر میں کمی اور تیل کی بین الاقوامی سطح قیمتوں میں اضافے کے بعد، ملک میں پیٹرول کی قیمت میں ایک اور اضافے کی اطلاعات ہیں۔ میڈیا رپورٹس اور ذرائع کے مطابق، دونوں بڑی پٹرولیم مصنوعات پٹرول اور ڈیزل کی قیمتوں میں ایک اور اضافہ دیکھنے کو ملے گا۔
ذرائع نے دعویٰ کیا ہے کہ پاکستان میں پیٹرول کی قیمت میں 10 سے 14 روپے فی لیٹر تک اضافہ ہوسکتا ہے جبکہ ہائی سپیڈ ڈیزل کی قیمت میں بھی 14 سے 15 روپے کا اضافہ متوقع ہے۔ اس دوران موجودہ ٹیکس کی شرح اور امپورٹ پیرٹی پرائس کی بنیاد پر کیروسین آئل کی قیمت میں 10 روپے فی لیٹر کا اضافہ کیا جا سکتا ہے۔
ستمبر کے پہلے دس دنوں میں امریکی ڈالر کے مقابلے میں روپے کی قدر میں 4.5 روپے کی کمی ہوئی۔ پہلے ڈالر روپے کے مقابلے میں 299 روپے سے بڑھ کر 304 روپے پر گیا لیکن بعد ازاں پر واپس 300 روپے پر آگیا۔
مقامی ٹرانسپورٹ سیکٹر بنیادی طور پر ہائی سپیڈ ڈیزل کا استعمال کرتا ہے اور اس کی قیمت براہ راست افراط زر کی شرح سے منسلک ہے کیونکہ یہ بھاری ٹرانسپورٹ گاڑیوں، ٹرینوں، بسوں، اور زرعی انجن جیسے ٹریکٹر، ٹیوب ویل، تھریشر، اور یہاں تک کہ ٹرکوں میں استعمال ہوتا ہے، اس طرح ڈیزل کی قیمت میں اضافہ ہونے سے واضح طور پر سبزیوں اور دیگر کھانے پینے کی اشیاء کی قیمتوں میں اضافے کا باعث بنتا ہے۔
دوسری طرف نجی ٹرانسپورٹ، مسافر کاروں، رکشوں اور بائکس میں پیٹرول کا استعمال ہوتا ہے، جس سے متوسط اور کم متوسط طبقے کے خاندانوں کے ماہانہ اخراجات براہ راست متاثر ہوتے ہیں۔
پاکستان میں پیٹرول کی قیمت میں اضافہ گزشتہ ماہ 27.4 فیصد سے زیادہ افراط زر کی شرح پر ہوا ہے جو آنے والے دنوں اور ہفتوں کے دوران ملک میں عام قیمتوں کو بھی نمایاں طور پر متاثر کرے گا۔