ٹویوٹا پاکستان نے ارشد ندیم کو فورچیونر GR-S تحفے میں دے دی
اولمپکس میں گولڈ میڈل جیتنے کی خوشی میں انڈس موٹر کمپنی (آئی ایم سی) نے ارشد ندیم کو ٹویوٹا فورچیونر GR-S تحفے میں دی ہے۔ اس سے قبل کمپنی نے اعلان کیا تھا کہ وہ اس ایتھلیٹ کو کرولا کراس تحفے میں دے گی، تاہم اس آفر کو اپ گریڈ کردیا گیا ہے۔ کمپنی کی جانب سے کی گئی ایک سوشل میڈیا پوسٹ میں کہا گیا ہے کہ وہ 2023 سے ارشد ندیم کے ساتھ کھڑے ہیں۔
کمپنی نے ارشد ندیم کی کامیابی کو سراہنے کیلئے بطور خراج تحسین کراچی میں ایک تقریب کے دوران ٹویوٹا فارچیونر کا ٹاپ آف دی لائن ماڈل GRS دی۔ اس دوران کمپنی نے کہا کہ انھیں فخر ہے کہ ارشد ندیم ان کے اس سفر کا حصہ ہیں۔
ٹویوٹا پاکستان کی اعلیٰ قیادت، بشمول سی ای او علی اصغر جمالی، اس تقریب میں موجود تھے۔ جمالی نے اپنی خوشی کا اظہار کرتے ہوئے کہا کہ کمپنی کو ارشد ندیم کو یہاں دیکھ کر خوشی ہوئی۔ علی اصغر جمالی نے کہا کہ ارشد کی کامیابی اس کی محنت اور لگن کا ثبوت ہے، اور ہمیں فخر ہے کہ ہم ایسے ایتھلیٹس کی حمایت کرتے ہیں جو ہماری قوم کا فخر ہیں۔
ارشد ندیم کو بطور تحفہ ملنے والی گاڑیاں
اس سے قبل پنجاب کی وزیر اعلیٰ مریم نواز نے ارشد ندیم کو 92.97 میٹر کی ریکارڈ توڑ تھرو کے جشن کے طور پر نمبر PAK 9297 کے ساتھ ایک ہونڈا سوک تحفے میں دی تھی۔ یہ گاڑی وزیر اعلیٰ نے ایتھلیٹ ارشد ندیم کے گھر کے دورے کے دوران انہیں تحفے میں دی۔ اس کے علاوہ، ارشد کو پنجاب کے گورنر سے کرولا کراس اور ایک بزنس مین سے سوزوکی آلٹو بھی تحفے میں ملی ہے۔
ارشد ندیم نے 32 سال بعد پاکستان کے لیے اولمپک گولڈ میڈل جیتا۔ یہ پاکستان کے لیے کسی بھی ایتھلیٹ کا انفرادی طور پر 40 سال بعد پہلا گولڈ میڈل تھا، جس نے جیولن تھرو کے ذریعے ایک نئی تاریخ رقم کی۔ پاکستانی عوام کے لیے مقابلہ کافی دلچسپ تھا کیونکہ ندیم کے مرکزی حریف بھارتی ایتھلیٹ نیرج چوپڑا تھے، جنہوں نے گیمز میں سلور میڈل جیتا۔