ٹویوٹا IMC پاکستان میں 12ویں جنریشن کب متعارف کروائے گا؟
آخر انتظار کی گھڑیاں ختم ہوئیں کیونکہ ٹویوٹا نے 27 مارچ 2019ء کو تائیوان میں اپنی مقبول ترین اور سب سے زیادہ فروخت ہونے والی کرولا آلٹِس کی 12 ویں جنریشن متعارف کروا دی ہے۔ یہ گزشتہ سال چین میں رونمائی کے صرف چند ماہ بعد ہی پیش کی گئی ہے۔
ٹویوٹا کرولا آلٹس 2019ء کی رونمائی پہلی بار نومبر 2018ء میں چین میں ہونے والے گوانگ ژُو آٹو شو میں کی گئی تھی، جو تائیوان کو جدید ترین کرولا آلٹس کا اگلی جنریشن کا ماڈل پانے والی دوسری آٹو مارکیٹ بناتی ہے۔ ٹویوٹا کے لیے کرولا کا ایک خاص مقام ہے کیونکہ یہ کمپنی کی کُل سیلز کا 20 فیصد دیتی ہے۔ شروعات کرنے کے لیے یہاں اس بات کا ذکر کرنا ضروری ہے کہ ‘پرسٹیج’ اسٹائل کا ماڈل تائیوان میں پیش کیا گیا ہے، دوسرا ‘اسپورٹی’ نظر آنے والا ماڈل جاپان اور امریکی مارکیٹوں میں متعارف کروایا گیا ہے۔ یہ ظاہر کرتا ہے کہ آسیان خطے کے دیگر ممالک نئی ٹویوٹا کرولا آلٹس کے لیے ‘پرسٹیج’ صورت کا ماڈل حاصل کریں گے۔ یہ خصوصی پرسٹیج صورت اسی ڈیزائن نظریے کی حامل ہے جو نئی کیمری میں دکھائی دیتا ہے۔ البتہ اس میں ماڈل کے اندر اور باہر نئے انجن آپشنز کے ساتھ بڑی تبدیلیاں کی گئی ہیں۔ تائیوان میں لانچ ہونے کا مطلب ہے کہ کرولا فلپائنز سمیت خطے کے دیگر ممالک تک پہنچنے میں دیر نہیں لگائے گی۔ چلیے جلدی سے اگلے حصے کی طرف چلتے ہیں جہاں دیکھیں گے کہ تائیوان میں پیش کردہ نئے ماڈل میں کیا کچھ نیا ہے۔
پاور ٹرین:
تائیوان میں متعارف کی گئی 12 ویں جنریشن کی ٹویوٹا کرولا آلٹس دو انجن آپشنز کے ساتھ آتی ہے۔ پہلا 1.8 لیٹر 2ZR-FE انجن سپر CVT کے ساتھ جو 140 hp اور 173 Nm ٹارک پیدا کر سکتا ہے۔ دوسرا ویریئنٹ ہائبرِڈ ورژن ہے جو 1.8 لیٹر انجن کے ساتھ آتا ہے اور E-CVT سے لیس ہے اور 122 hp پیدا کرتا ہے۔ ٹویوٹا تائیوان دعویٰ کرتا ہے کہ یہ مخصوص ویریئنٹ سیلف-چارجنگ کی صلاحیت بھی رکھتا ہے۔
ایکسٹیریئر:
نئی ٹویوٹا کرولا 2019ء کو آگے سے دیکھیں تو درمیان میں ایک بڑا اِن ٹیک اور متعدد اسٹائلنگ انداز نظر آتے ہیں جو ٹویوٹا کے دیگر ماڈلز سے ملتے جلتے ہیں۔ ڈائنامک ہیڈلائٹس اور ان کے نیچے موجود فوگ لائٹس نئی کیمری اور کسی حد تک کیمراڈ کی یاد دلاتی ہیں۔اے-پلر میں ایک نئے گلاس پینل کا اضافہ ہے کہ جہاں ٹرن سگنلز رکھنے والے سائیڈ مررز لگائے گئے ہیں۔ اگلے اور پچھلے دروازے کے نچلے حصوں پر curves ہیں جو گاڑی کو اسپورٹی انداز دیتے ہیں۔ سیڈان کی رُوف لائن میں پچھلے ماڈلز کے مقابلے میں واضح تبدیلی نظر آتی ہے۔ اب یہ پہلے سے کہیں زیادہ rounded ہے جو سائیڈوں سے دیکھیں تو بہت دلکش لگتا ہے۔ پیچھے سے دیکھیں تو کرولا میں نئی LED ٹیل لائٹس اور بمپر ہیں جو نئی ڈیزائن کی گئی ڈِگّی کے ساتھ زبردست لگتے ہیں جسے خود duck-tail spoiler کی شکل میں بنایا گیا ہے۔ مزید یہ کہ یہ ٹویوٹا نیو گلوبل آرکی ٹیکچر (TNGA) پر مبنی ہے جو گاڑی کی ڈیولپمنٹ کو ہی تبدیل کرنے کا ایک منصوبہ ہے۔ اس نئے پلیٹ فارم کے تحت 12 ویں جنریشن کا ماڈل حالیہ ماڈلز کے مقابلے میں زیادہ نیچے موجود سینٹر آف گریوِٹی رکھتا ہے اور مجموعی طور اسپورٹی خاکہ اور ساتھ ہی نچلی حالت اور زیادہ چوڑی tread پیش کرتا ہے۔ مجموعی طور پر ٹویوٹا کرولا کا ایکسٹیریئر ڈیزائن انداز پچھلے ماڈلز کے مقابلے میں بہتر کیا گیا ہے۔
انٹیریئر اور فیچرز:
سیڈان کے اندر وسیع گنجائش سیاہ رنگت کے انٹیریئر اور نیلے رنگ کے LED ڈسپلے کے ساتھ آتی ہے۔ یہ کرولا کے ویگن اور ہیچ بیک ورژن جیسے انٹیریئر سے کافی ملتا جلتا ہے۔ ڈیش بورڈ ڈیزائن آرٹ کا ایک نمونہ ہے جس میں مرکز میں فلوٹنگ ٹچ اسکرین انفوٹینمنٹ سسٹم لگایا گیا ہے۔ اس میں ٹویوٹا کا ڈرائیو + کنیکٹ فیچر بھی شامل کیا گیا ہے جو آپ کو اپنی گاڑی کا موبائل کنٹرول پانے کی اجازت دیتا ہے۔ مکمل نیا LED انسٹرومنٹ کلسٹر پینل ٹویوٹا کے نئے پلیٹ فارم کے تحت ڈیزائن کیا گیا ایک فن پارہ ہے۔ 12ویں جنریشن کے فراہم کردہ بنیادی فیچرز کے علاوہ یہ یونٹ گاڑی میں شامل سیفٹی ٹیکنالوجی کا بھی مکمل پیکیج ہے۔ یہ 7 ایئربیگز کے ساتھ آتا ہے جو ٹکرانے کی صورت میں زخموں کو کم کرنے میں مدد دیتے ہیں اور فوری بروقت پیرامیٹرز کے لیے ہیڈز اَپ ڈسپلے بھی ہے۔ اسے ایڈاپٹِو کروز کنٹرول (ACC) فیچر کی مدد سے مزید طاقت دی گئی ہے۔ آٹومیٹک ہائی بیم (AHB) فیچر بھی ڈرائیور کو ہیڈلائٹ کی شدّت کو کنٹرول کرنے کی پروا کیے بغیر سڑک پر توجہ رکھنے میں مدد دیتی ہے۔ مزید برآں، اس میں لین تبدیل کرتے ہوئے خبردار کرنے کے لیے لین ڈپارچر اسِسٹ (LDA) اور اسٹیئرنگ اسسٹ ہے۔ دیگر فیچرز میں لین ٹریس اسسٹ (LTA) اور روڈ سائن اسسٹ (RSA) شامل ہیں۔
ٹویوٹا IMC پاکستان میں 12 ویں جنریشن کب لانچ کرے گا؟
تائیوان میں ٹویوٹا کرولا کی 12 ویں جنریشن کے لانچ ہونے کا مطلب ہے کہ یہ جلد ہی دنیا کے دوسرے حصوں میں بھی پیش کی جائے گی۔ ماضی کے مقابلے میں کرولا کا پرسٹیج اسٹائل ایک عالمی ماڈل ہے جس کا مطلب ہے کہ یہی ماڈل یورپ کے ساتھ آسیان ریجن میں پیش کیا جائے گا۔ اس سے پہلے ایشیائی ماڈل ہمیشہ یورپ میں متعارف کروائے جانے والے ماڈل سے مختلف ہوتا تھا۔ اس میں کوئی شک نہیں کہ پاکستان میں عوام کرولا کے اگلے ماڈل کا شدت سے انتظار کر رہے ہیں۔ اس وقت 11 ویں جنریشن کی کرولا مقامی مارکیٹ میں دستیاب ہے جو 2014ء میں متعارف کروائی گئی تھی جو اسے تقریباً 5 سال پرانا ماڈل بناتی ہے۔ جیسا کہ تاریخ بتاتی ہے ٹویوٹا IMC کم از کم 6 سال بعد نیا ماڈل پیش کرتی ہے۔ اس لیے ہم توقع رکھ سکتے ہیں کہ 12 ویں جنریشن کی کرولا اگلے سال پاکستان میں متعارف کروائی جائے گی۔ اس لیے اگر آپ نئی ٹویوٹا کرولا کا انتظار کر رہے ہیں تو یہ بس آنے ہی والی ہے۔ ہمیں 2020ء تک کا انتظار کرنا ہوگا جب ٹویوٹا IMC پاکستان میں مقامی مارکیٹ میں متعارف کروائے گا۔
ٹویوٹا کرولا پاکستان سمیت دنیا بھر میں سب سے زیادہ پسند اور فروخت ہونے والی گاڑی ہے۔ 11 ویں جنریشن کے ساتھ بھی یہی معاملہ ہوا کہ جس کا پاکستان میں زبردست انتظار کیا گیا اور فروخت بھی خوب ہوئی۔ البتہ اس وقت سب کی نظریں پاکستان کی مقبول ترین کار کے اگلے ماڈل پر ہیں۔ تب تک پاکستان میں فروخت ہونے والی 11 ویں جنریشن کی کرولا کے تمام ویریئنٹس کے ساتھ تقابل دیکھ لیں۔
اِن اعداد و شمار نے ظاہر کیا کہ پاکستان میں ٹویوٹا کرولا کا موجودہ ماڈل 20.69 سے 32.99 لاکھ روپے (ایکس-فیکٹری قیمت) پر فروخت کیا گیا ہے۔ 2020ء میں جب ٹویوٹا پاکستان میں 12 ویں جنریشن کی کرولا پیش کرنے کا فیصلہ کرے گا، تو صارفین کو 12 ویں جنریشن کی کرولا پانے کے لیے 2 سے 3 لاکھ روپے اضافی ادا کرنا ہوں گے۔
دوسری جانب ٹویوٹا کو اپنے حریف ہونڈا سے مقابلے کا سامنا ہوگا کہ جو اسی انجن گنجائش یعنی 1300 سے 1800cc میں دو گاڑیاں رکھتا ہے۔ مزید یہ کہ متعدد نئے ادارے بھی پاکستان کی آٹو انڈسٹری میں جگہ بنا رہے ہیں جیسا کہ ہیونڈائی، کِیا، نسان، فوکس ویگن وغیرہ۔ اس کیٹیگری میں کچھ دوسری کاریں بھی ہیں جو جاپان سے درآمد کی جاتی ہیں۔ اس لیے کہا جا سکتا ہے کہ ماضی کے مقابلے میں ٹویوٹا کے لیے اب کامیابی حاصل کرنا اتنا آسان نہیں ہوگا۔ ممکنہ خریداروں کے لحاظ سے دیکھیں تو پاکستان میں نئے اداروں کی آمد حوصلہ افزاء ہے جس کا نتیجہ ہونڈا اور ٹویوٹا کی اجارہ داری پر اثر کی صورت میں نکلے گا۔ البتہ پاکستان میں کسی بھی گاڑی کے کامیاب ہونے میں اہم کردار اس کی قیمت کا ہوتا ہے، خاص طور پر جب آگے مقابلے کا ماحول بہت سخت ہونے والا ہے۔
اپنے خیالات نیچے تبصروں میں پیش کیجیے۔ آٹوموبائل انڈسٹری کی تازہ ترین خبروں کے لیے پاک ویلز کے ساتھ رہیے۔