گزشتہ روز موٹروے پر ہونے والے ایک افسوسناک حادثے میں تین رینجرز اہلکار جاں بحق جبکہ گیارہ زخمی ہوگئے۔ یہ واقعہ اس وقت پیش آیا کہ جب فتح جنگ سے تین کلومیٹر دور ایک موڑ کاٹتے ہوئے رینجرز اہلکاروں کا ڈبل کیبن ٹرک الٹ گیا۔ ذرائع کے مطابق رینجرز کی گاڑی اسلام آباد سے تربیلا جارہی تھی۔
موٹروے پولیس نے حادثے کی تفصیلات بتاتے ہوئے کہا کہ رینجرز اہلکاروں کا ٹرک الٹ جانے سے حولدار عاصم مجید اور لانس نائیک عاشق علی موقع پر ہی دم توڑ گئے جبکہ مزید ایک سپاہی غلام شبی اسپتال میں زخموں کی تاب نہ لاتے ہوئے چل بسا۔ جائے وقوعہ پر امدادی ٹیمیں اور ایمبولینس پہنچنے پر زخمیوں کو ٹرک کے ملبے تلے نکالا گیا۔ بعد ازاں انہیں جڑواں شہروں کے مختلف اسپتالوں کی طرف روانہ کردیا گیا۔
انگریزی روزنامہ ڈان کے مطابق واقعے میں زخمی ہونے والے مزید ایک اہلکار کی حالت نازک ہے جسے فوجی اسپتال میں طبی امداد فراہم کی جارہی ہے۔ اس کے علاوہ زخمی ہونے والے دیگر گیارہ اہلکاروں کی حالت خطرے سے باہر ہے۔ پولیس نے حادثے کی رپورٹ درج کرلی ہے۔ ہلاک ہونے والے رینجرز اہلکاروں کی نماز جنازہ اسلام آباد میں ادا کی گئی۔
