بجلی سے چلنے والی ایپل کی برقی گاڑی 2021 میں پیش کی جائے گی
آئی فون اور آئی پیڈ بنانے والی معروف امریکی کمپنی ایپل (Apple) سال 2021 تک اپنی برقی گاڑی تیار کر کے فروخت کے لیے پیش کردے گی۔ یہ بات گاڑیوں کے شعبے سے منسلک ایک ماہر نے ذرائع ابلاغ کو بتائی۔ ایپل برقی گاڑی پیش کر کے ہم وطن ادارے ٹیسلا کے مدمقابل آجائے گا جو برقی گاڑیاں تیار کرنے والا سر فہرست ادارہ ہے۔ ایک اندازہ کے مطابق ایپلی کی برقی گاڑی کی قیمت 75 ہزار ڈالر کے لگ بھگ ہوگی۔
پائپر جیفری میں ایپل کے ماہر تجزیہ کار جین منسٹر نے ایپل کار فینز نامی ویب سائٹ پر بات کرتے ہوئے کہا کہ سال 2019-2020 تک نہ صرف آپ اس گاڑی دیکھیں گے بلکہ اسے خرید بھی سکیں گے۔ انہوں نے مزید کہا کہ اسے سال 2021 سے پہلے فراہم نہیں کیا جاسکے گا۔ انہوں نے گاڑی کی اندازہ قیمت 75 ہزار ڈالر کے لگ بھگ ہونے کا اشارہ دیتے ہوئے کہا کہ ایپل کی تاریخ دیکھیں تو آپ کو انداز ہ ہوگا کہ وہ ہمیشہ بہتر سے بہترین کا انتخاب کرتا ہے اور یہ بات گاڑیوں کے شعبے پر بھی لاگو ہوگی۔
یہ بھی پڑھیں: ایپل کی برقی گاڑیوں کا منصوبہ ٹیسلا کا کوڑا دان ہے: ایلون مُسک
گوکہ اب تک اس سے متعلق ایپل نے کوئی حتمی بات نہیں کی اور اب تک کی جانے والی تمام باتیں محض سنی سنائی پر مبنی ہیں لیکن اس کے باوجود جین منسٹر کی ایپل اور اس کے کاروباری معاملات پر تجربے کو دیکھیں تو ان کی بات پر یقین کرنا مناسب لگتا ہے۔ جین نے دعوی کیا کہ اپل پہلے ہی پروجیکٹ ٹائیٹن (Project Titan) پر کام کر رہا ہے اور 50 سے 60 فیصد امکان ہے کہ اس عرصے میں گاڑی مارکیٹ کے لیے تیار ہوجائے گی۔ انہوں نے اعتراف کیا کہ ایپل ٹی وی کی کامیابی پر ان کی پیشن گوئی غلط ثابت ہوئی لیکن نئی گاڑی سے متعلق وہ خاصے پرامید ہیں۔
یہ افواہیں بھی گردش کرتی رہی ہیں کہ ایپل صرف گاڑی کا ڈیزائن ہی بنائے گا جس کی بنیاد پر اس کی حتمی تیاری کا کام دیگر اداروں کو سونپا جائے گا۔ اس حوالے سے جین کا کہنا تھا کہ ایپل یہ دیکھ رہا ہے کہ اسے اگلے 200 سالوں کس طرح کام کرنا ہے۔
ایپل کے سربراہ ٹم کک اور متعدد کار ساز اداروں کے سربراہان کی ملاقاتوں کے بعد ان خبروں کو تقویت حاصل ہوئی کہ ایپل کسی کار ساز ادارے کی مدد سے اپنی گاڑی تیار کرے گا۔ تاہم جب تک ایپل خود اس حوالے سے باضابطہ بیان جاری نہیں کرتا تب تک ایسی بے شمار افواہیں گردش کرتی ہی رہیں گی۔ گاڑیوں کے شوقین سبھی افراد توقع کر رہے ہیں کہ آئی فون کی خفیہ تصاویر کی طرح ایپل کی اس برقی گاڑی کی بھی خفیہ تصاویر منظر عام پر آ ہی جائیں گی۔
