پرنس پرل ہیچ بیک کیسے بُک کروائیں؟
ریگل آٹوموبائلز انڈسٹریز لمیٹڈ نے 31 جنوری 2020ء کو لاہور میں ایک تقریب کے دوران اپنی 800cc ہیچ بیک پرنس پرل مارکیٹ میں متعارف کروائی کہ جس کا شِدت سے انتظار کیا جا رہا تھا۔ لیکن یہ گاڑی کیسے بُک کروائی جا سکتی ہے؟ آئیے آپ کو بتاتے ہیں۔
آٹو مینوفیکچرر نے اپنے صارفین کے لیے اہم بکنگ ہدایات جاری کی ہیں جو بتاتی ہیں کہ نئی متعارف کردہ پرنس پرل 3,50,000 روپے میں بُک کروائی جا سکتی ہے۔ اس ہیچ بیک کے واحد ویرینٹ کی کُل ایکس-فیکٹری قیمت 10,49,000 روپے ہے جیسا کہ افتتاحی تقریب میں اعلان کیا گیا۔ صارفین اپنی پرنس-DFSK ہیچ بیک کسی بھی 3S ڈیلرشپ سے بُک کروا سکتے ہیں۔ البتہ انہیں بکنگ کی رقم ریگل آٹوموبائلز انڈسٹریز لمیٹڈ کو پے آرڈر یا ڈیمانڈ ڈرافٹ کی صورت میں ادا کرنا ہوگا۔ ادائیگی کا کوئی بھی دوسرا طریقہ کمپنی کے لیے قابلِ قبول نہیں ہوگا۔ انفرادی اور کارپوریٹ صارفین کے لیے بھی بکنگ کی مخصوص شرائط رکھی گئی ہیں۔
ایک انفرادی خریدار کے طور پر کمپنی کو آپ کا CNIC، NTN اور اصلی پے آرڈر درکار ہوگا۔
جبکہ کارپوریٹ صارفین کو اپنی گاڑی بُک کرواتے ہوئے پرچیز آرڈرز، NTN، کمپنی اسٹیمپ اور اصل پے آرڈر کی ضرورت ہوگی۔ اس کے علاوہ انکم ٹیکس پیپرز کی صورت میں انکم ٹیکس ریٹرن فائل کرنے کے شواہد بھی دینا ضروری ہیں۔
آٹومینوفیکچرر نے یہ بھی بتایا ہے کہ ایک CNIC پر صرف ایک گاڑی بُک کروائی جا سکتی ہے۔ اس کا مطلب ہے کہ صارفین ایک CNIC پر ایک سے زیادہ گاڑیوں کی جُزوی بکنگ ادائیگی نہیں کر سکتے۔ پھر گاڑی کی قیمت میں فریٹ چارجز بھی شامل ہوں گے کہ جن کا انحصار ڈلیوری کے مقام پر ہوگا۔
واضح رہے کہ تمام گاڑیوں کی قیمتیں عارضی ہیں اور بغیر کسی پیشگی اطلاع کے تبدیل کی جا سکتی ہیں۔ گاڑی کی ڈلیوری کے وقت طے شدہ قیمت لاگو ہوگی۔ علاوہ ازیں، کمپنی کے مطابق وہ کسی بھی پیشگی اطلاع کے بغیر گاڑی کی کوئی بھی خصوصیت تبدیل کرنے کا حق رکھتی ہے۔
صارفین کو بکنگ اور ڈلیوری کی تصدیق رجسٹرڈ نمبر پر SMS کے ذریعے کی جائے گی۔ کمپنی گاڑی کی ڈلیوری سے 15 دن پہلے بقایاجات کی ادائیگی کا مطالبہ بھی کرتی ہے۔ پرنس-DFSK اپنی تمام گاڑیوں پر 3 سال یا 60,000 کلومیٹرز کی وارنٹی بھی دیتا ہے (جو بھی پہلے مکمل ہو جائے) ، جن میں نئی 800cc پرنس پرل بھی شامل ہے۔
ہماری طرف سے اتنا ہی۔ اپنے خیالات نیچے تبصروں میں پیش کیجیے اور گاڑیوں کی دنیا کے بارے میں ایسی ہی معلوماتی خبروں کے لیے پاک ویلز پر آتے رہیے۔