دیوان موٹرز آئندہ ماہ سے گاڑیوں کی تیاری شروع کرے گا
رواں سال کے اوائل میں پاک ویلز نے اپنے قارئین کو بتایا تھا کہ وزارت صنعت و تجارت کی جانب سے دیوان موٹرز اور دیوان دیہان موٹرز کو براؤن فیلڈ کا درجہ دیا جائے گا۔ اور اب دیوان موٹرز نے پاکستان اسٹاک ایکسچینج (PSX) کو دیے گئے اطلاع نامے میں بتایا ہے کہ اسے انجینئرنگ ڈیویلپمنٹ بورڈ کی جانب سے براؤن فیلڈ کا درجہ حاصل ہو گیا ہے۔ یہاں یہ بات بھی قابل ذکر ہے کہ دیوان موٹرز کی جانب سے آئندہ ماہ یعنی فروری 2018ء سے گاڑیوں کی تیاری شروع کیے جانے کی بھی امید ہے۔
دیوان موٹرز کو یہ خاص درجہ دیے جانے کا فیصلہ وزیر برائے صنعت و پیداوار غلام مرتضی خان جتوئی کی مداخلت کے بعد سامنے آیا ہے۔علاوہ ازیں آٹو انڈسٹری ڈیویلپمنٹ کمیٹی نے بھی اتفاق رائے سے اس فیصلہ کو منظور کر لیا ہے۔
براؤن فیلڈ کیا ہے؟
براؤن فیلڈ سرمایہ کاری کا درجہ پہلے سے قائم شدہ لیکن بند کارخانوں کو دیا جاتا ہے جو یکم جولائی 2013ء یا اس سے پہلے بے کار ہو چکے ہوں اور مذکورہ تاریخ کے بعد ان کارخانوں میں گاڑیوں کی تیاری نہ ہوئی ہو۔ ایسے کارخانوں کو دوبارہ قابل استعمال بنانے پر آنے والی سرمایہ کاری مالکان کی جانب سے بذات خود یا کسی نئے سرمایہ کار یا پھر کسی غیر ملکی ادارے کے ساتھ مشترکہ منصوبے یا غیر ملکی ادارہ کارخانے کو خرید کر انجام دے سکتا ہے۔
دیوان کے تحت فروخت کی جانے والی تمام BMW گاڑیاں، تیار شدہ حالت میں بیرون ملک سے درآمد کی جا رہی ہیں۔ ماضی میں دیوان ہیونڈائی اور کیا موٹرز کی گاڑیاں تیار کرنے کا تجربہ کر چکا ہے۔ اب دیوان کسی اور غیر ملکی کار ساز ادارے کے ساتھ میدان میں اترنے کی تیاری کرے گا۔ یہ بھی ممکن ہے کہ وہ پاکستان میں بی ایم ڈبلیو گاڑیوں کی تیاری شروع کریں۔ لیکن فی الوقت ایسا صرف سوچا ہی جا سکتا ہے۔
اس بارے میں ہمیں اپنی رائے سے ضرور آگاہ کیجیے۔