وفاقی حکومت کی جانب سے اسلام آباد میں نئے ٹریفک قوانین متعارف
وفاقی حکومت پاکستان اسلام آباد میں نئے ٹریفک قوانین متعارف کروانے کے لیے تیار ہے کہ جو بین الاقوامی معیارات کے مطابق ہوں گے۔
میڈیا کے مطابق نئے ٹریفک قوانین جلد ہی وفاقی دارالحکومت میں لاگو کیے جائیں گے۔ ایک اعلیٰ سطحی اجلاس وزیر داخلہ اعجاز شاہ کی صدارت میں اسلام آباد میں ہوا کہ جس میں اس فیصلے کو حتمی صورت دی گئی اور متعلقہ اداروں کو نئے ٹریفک قوانین و ضوابط لاگو کرنے کے حوالے سے احکامات جاری کیے گئے۔ اس کا مقصد ٹریفک حادثات کو کم کرنے کے لیے بین الاقوامی معیارات کے مطابق قوانین کا نفاذ ہے تاکہ مسافروں کی حفاظت اور وفاقی دارالحکومت میں ٹریفک کے بہاؤ کو یقینی بنایا جا سکے۔ نئے قوانین کے تحت اگر ڈرائیور کا تیسری بار چالان ہوتا ہے تو اس کا ڈرائیونگ لائسنس معطل ہو جائے گا۔
نئے ٹریفک قوانین ہر لحاظ سے سخت ہیں اور یہاں تک کہ ڈرائیونگ کے دوران تمباکو نوشی پر بھی جرمانہ ہے۔ تمباکو نوشی روزمرہ ٹریفک حادثات کے اسباب میں شامل ہے اور ڈرائیونگ کے دوران حکومت کی جانب سے اس پر مکمل پابندی لگا دی گئی ہے۔ پھر اگلی سیٹوں پر بیٹھنے والے افراد کے لیے سیٹ بیلٹ باندھنا لازمی ہو گیا ہے۔ عام طور پر دیکھا جاتا ہے کہ اگر ڈرائیور نے سیٹ بیلٹ باندھی ہوئی ہو تب بھی آگے بیٹھا مسافر اسے ضروری نہیں سمجھتا۔ البتہ حادثے کی صورت میں ڈرائیور اور آگے بیٹھے مسافر دونوں کے زخمی ہونے کا خطرہ برابر ہوتا ہے۔ اس لیے دونوں کو اس خطرے کو سمجھتے ہوئے اپنی زندگی کو اہمیت دینی چاہیے۔ ڈرائیونگ لائسنس کے بغیر ڈرائیونگ کرنے والوں سے بھی سخت قانون کے تحت نمٹا جائے گا اور اسلام آباد ٹریفک پولیس ان پر بھاری جرمانے لگائے گی۔ واضح رہے کہ نئے ٹریفک قوانین عہدیداروں کے لیے بھی سخت ہوں گے۔ خبر کے مطابق بغیر کسی وجہ کے ٹریفک جام کی صورت حال پیدا ہونے پر سپرنٹنڈنٹ آف پولیس (SP) اور ڈیوٹی پر موجود افسر کے خلاف قانونی کارروائی ہوگی۔
اجلاس میں وزارت داخلہ نے 30 ستمبر کو ٹریفک کے نئے قوانین کے نفاذ کے لیے ڈیڈلائن قرار دیا۔ متعلقہ حکام کو یہ حکم بھی دیا گیا ہے کہ وہ شہریوں میں شعور و آگہی پھیلانے کے لیے سوشل میڈیا مہم شروع کریں۔ اسلام آباد اور ملک کے دیگر تمام بڑے شہروں میں ٹریفک مسائل میں اضافہ ہو رہا ہے۔ موجودہ صورت حال میں یہ حکومت کی جانب سے بڑا قدم ہے اگر وہ سختی کے ساتھ نئے قوانین نافذ کرنے میں کامیاب ہوگئی۔ آئیے ایک ذمہ دار شہری کی حیثیت سے ٹریفک قوانین کی پیروی اور سڑکوں کو اپنے اور دوسرے افراد کے سفر کے لیے محفوظ بنانے میں اپنا کردار ادا کریں۔
اسلام آباد میں نئے ٹریفک قوانین کے حوالے سے مکمل تفصیلات کے لیے پاک ویلز پر آتے رہیں۔ اپنے رائے نیچے تبصروں میں پیش کریں۔