ہونڈا BR-V فیس لفٹ ورژن انڈونیشیا میں لانچ کر دیا گیا
ہونڈا نے 25 اپریل 2019ء کو 27 ویں انڈونیشیا انٹرنیشنل آٹو شو میں اپنی کومپیکٹ کراس اوور SUV ‘BR-V’ کا فیس لفٹ ورژن متعارف کروا دیا۔
آٹومیکر 2015ء سے ہونڈا موبیلیو MPV کے مشترکہ پلیٹ فارم پر مبنی 5-دروازوں والی ہونڈا BR-V بنا رہا ہے۔ اپنے آغاز کے بعد سے یہ کومپیکٹ SUV پہلی بار فیس لفٹ کی دنیا میں داخل ہوئی ہے۔ پاکستان کے علاوہ ہونڈا BR-V بھارت، تھائی لینڈ، ملائیشیا، انڈونیشیا، فلپائنز، میکسیکو وغیرہ میں فروخت ہوتی ہے۔ اکثر لوگوں کو یا تو معلوم نہیں یا پھر وہ سوچتے ہوں گے کہ اس کے نام کا مطلب کیا ہے۔ BR-V دراصل Bold Runabout Vehicle ہے۔ 7 نشستوں کی حامل یہ کراس اوور پہلی بار 21 اپریل 2017ء کو پاکستان میں متعارف کروائی گئی تھی جس کا مطلب ہے کہ یہ ملک کی مقامی مارکیٹ میں دو سال پرانی گاڑی ہے۔
فیس لفٹ وژن کے ساتھ انڈونیشیا پہلی مارکیٹ بن چکا ہے کہ جہاں کمپنی نے SUV کا وسط مدتی فیس لفٹ پیش کیا ہے۔ دیکھتے ہیں کہ BR-V فیس لفٹ کیسا لگتا ہے اور صارفین کے لیے اس میں کیا کچھ نیا ہے۔
پاور ٹرین:
کومپیکٹ SUV کے اندر کوئی تبدیلی نہیں کی گئی۔ کراس اوور اسی 6-اسپیڈ مینوئل یا CVT ٹرانسمیشن کے حامل 1.5-لیٹر i-VTEC انجن کے ساتھ ہے۔ ہونڈا BR-V زیادہ سے زیادہ 120 hp اور 145 Nm ٹارک پیدا کرتا ہے۔
ایکسٹیریئر:
ہونڈا BR-V اپنے فیس لفٹ ماڈل میں ہیڈلیمپس کو جوڑنے والی پرانی کروم بار کے مقابلے میں ایک کالے رنگ کی بار کے اضافے کے ساتھ ایک بہتر شکل و صورت پاتی ہے؛ البتہ نچلی ہلکے اسٹائل کی کروم اسٹرپ بدستور باڈی کا حصہ ہے۔ پروجیکٹر ہیڈلیمپس میں کوئی تبدیلی نہیں کی گئی ہے جو LED ڈے ٹائم رننگ لائٹس (DRLs) کے ساتھ ہیں۔ ان کے نیچے آٹو مینوفیکچرر کی جانب سے فوگ لیمپس گارنش بھی ری ڈیزائن کی گئی ہے۔ ایک نیا کالے رنگ کا فرنٹ گرِل ڈیزائن بھی نئے فرنٹ بمپر ٹوئیکس کا حصہ ہے۔ ہونڈا BR-V فیس لفٹ اگلے حصے میں سلور رنگ کی اسکِڈ پلیٹ سے بھی لیس ہے۔ کراس اوور کو 16 انچ کے دو رنگوں کے الائے ویلز کے نئے ڈیزائن کے ساتھ کروم سائیڈ پروٹیکٹر بھی دیا گیا ہے۔ ہونڈا نے پچھلے بمپر کے ڈیزائن میں بھی تبدیلی کی ہے اور اس کے نیچے ایک سلور ڈِفیوزر بھی لگایا ہے۔ ٹیل لیمپس کو جوڑنے والا برج بھی کروم کے ساتھ اپڈیٹ کیا گیا ہے۔ ری ڈیزائن کیا گیا بمپر نئے ورٹیکل شکل کے رِفلیکٹرز کا حامل ہے جو ایکسٹیریئر میں مجموعی تبدیلیوں کو مکمل کرتا ہے۔
انٹیریئر:
آٹومیکر نے کیبن کے اندر غیر تبدیل شدہ ڈیش بورڈ ڈیزائن میں نئے ٹویٹر اسپیکر اورنیا ڈیش بورڈ پینل پیٹرن شامل کیا ہے۔ BR-V کے بہترین ویرینٹ کو سیاہ ٹرِمڈ سیٹیں بھی فراہم کی گئی ہیں جس میں لال رنگ کی بہت خوبصورت جھلک دی گئی ہے۔ دروازے کے آرم ریسٹس بھی سرخ چمڑے سے سجائے گئے ہیں، اور اس کے علاوہ اسٹیئرنگ ویل اور گیئر نوب بھی لال دھاگے سے سِلے ہوئے چمڑے میں بند ہیں۔ گاڑی میں بیٹھے مسافروں کے لیے آرام دہ تجربے کوبہتر بنانے کے لیے دوسری قطار میں سیٹوں پر موٹی گدی لگائی گئی ہے۔ درمیان میں بیٹھا مسافر بھی ایک نیا ہیڈ ریسٹ اور نیا آرم ریسٹ کونسول پاتا ہے۔ انڈونیشیا میں لانچ کی گئی کراس اوور ڈرائیور کے لیے سیٹ ہائٹ ایڈجسٹمنٹ فیچر سے بھی لیس ہے کہ وہ اپنے ڈرائیونگ انداز کے مطابق اسے سیٹ کرلے۔
فیچرز اور سیفٹی آلات:
انڈونیشیا کی ہونڈا BR-V فیس لفٹ اب ویب لنک کے ساتھ 8 انچ فلوٹنگ capacitive ٹچ اسکرین سے لیس ہے جو اسمارٹ فون کو مررنگ کی اجازت دیتی ہے۔ اسی طرح یہ FM ریڈیو، بلوٹوتھ، AUX اور USB کنیکٹیوٹی فیچرز سے لیس ہے۔ تازہ ورژن میں کِی لیس انٹری مع پُش اسٹارٹ بھی ہے۔ مزید یہ کہ کمپنی نے BR-V فیس لفٹ ورژن میں ایک نیا آٹو ایئر کنڈیشننگ سسٹم بھی شامل کیا ہے۔ آٹو مینوفیکچرر نے سیفٹی کے لیے اگلے حصے میں دو ایئر بیگز لگائے ہیں۔
دستیاب رنگ:
فیس لفٹ ورژن مندرجہ ذیل چھ رنگوں میں دستیاب ہے:
ٹیفیٹا وائٹ
لیونر سلوَر میٹالک
ماڈرن اسٹیل میٹالک
کرسٹل بلیک پرل
کافی چیری ریڈ میٹالک
امبر میٹالک
جیسا کہ ہم نے شروع میں کہا تھا کہ یہ کراس اوور دو سال پہلے پاکستان میں متعارف کروائی گئی تھی اس لیے ہم توقع رکھ سکتے ہیں کہ 2020ء میں کسی وقت یہ فیس لفٹ ماڈل یہاں آ سکتا ہے۔ اس وقت ہونڈا BR-V پاکستان میں تین ویرینٹس میں آتی ہے، ایک مینوئل اور دو آٹومیٹک i-VTEC MT، i-VTEC اور اعلیٰ ترین i-VTEC s کے ساتھ۔ بنیادی ماڈل کی قیمت 22 لاکھ 34 ہزار روپے سے شروع ہوتی ہے اور بہترین ویرینٹ کے 25 لاکھ 69 ہزار روپے تک جاتی ہے۔
پاک ویلز کے ذریعے مقامی اور عالمی آٹوموبائل انڈسٹری میں ہونے والی تازہ ترین پیشرفت سے آگاہ رہیں۔ اپنی قیمتی رائے نیچے تبصروں میں پیش کریں۔