ہونڈا سِوک 2017 ہیچ بیک کی خفیہ تصاویر منظر عام پر آگئیں
جنیوا موٹر شو 2016 میں پیش کی جانے والی گاڑیوں میں سے ایک ہونڈا سِوک کے ہیچ بیک انداز کا نمونہ بھی شامل ہے۔ اسے دنیا بھر میں مقبول نئی ہونڈا سِوک 2016 ہی کے انداز میں بنایا گیا ہے جو دنیا بھر سے داد و تحسین وصول کر رہی ہے۔ ہونڈا سِوک 2017 ہیچ بیک یورپی مارکیٹ میں رواں سال کے آخر تک پیش کردی گئی جائے گی جبکہ دیگر ممالک بشمول امریکا میں اسے آئندہ سال متعارف کروایا جائے گا۔
عام طور پر دیکھا گیا ہے کہ عالمی آٹو شوز میں پیش کی جانے والی گاڑیوں کے نمونے پیش کرنے کا مقصد کار ساز اداروں کی قابلیت ظاہر کرنا ہوتا ہے۔ شاذ و نادر ہی ایسا ہوتا ہے کہ کار ساز ادارے پیش کردہ گاڑیوں کے نمونوں حقیقت میں جوں کی توں تیار کر کے فروخت کرتے ہیں۔ عام طور پر ان گاڑیوں کے نمونوں کے ڈیزائن میں کافی تبدیلیاں کر کے ہی تیاری کے لیے بھیجا جاتا ہے۔خاص طور پر عام مسافر گاڑیوں میں بہت زیادہ تبدیلیاں کی جاتی ہیں تاکہ صارفین کی سہولت اور حفاظتی خصوصیات بہتر طور پر شامل کی جاسکیں۔ البتہ سپر کارز بنانے والے ادارے زیادہ تر اپنے پیش کردہ نمونے ہی تیار کرتے ہیں کیوں کہ انہیں زیادہ بڑی تعداد میں گاڑیاں تیار اور فروخت نہیں کرنا ہوتیں۔
لیکن ہونڈا سِوک 2017 ہیچ بیک کے لیے ہونڈا عام روایت کے برخلاف جنیوا موٹر شو میں دکھائے جانے والے نمونے ہی کو بالکل ویسا ہی تیاری کے لیے بھیج رہا ہے۔ شاید آپ کو یاد ہو کہ گزشتہ سال نئی ہونڈا سِوک 2016 سیڈان کی آمد سے قبل اس کی خفیہ تصاویر منظر عام پر آگئیں تھیں اسی طرح ایک بار پھر ہونڈا سِوک 2017 ہیچ بیک کی خفیہ تصاویر بھی انٹرنیٹ پر آگئی ہیں۔
یہ بھی پڑھیں: جنیوا موٹر شو 2016 میں دکھائی جانے والی 10 بہترین سُپر کارز
ان تصاویر میں دیکھا جاسکتا ہے کہ باہری انداز بالکل ویسا ہی ہے جیسا کہ ہونڈا نے جنیوا میں دکھایا تاہم اندرونی حصے کی تصاویر اب تک نظر نہیں آئیں۔ مثال کے طور پر دستیاب تصاویر میں ڈیول ایگزاسٹ نہیں دیکھا جاسکتا ۔ سیڈان اور کوپے کی طرح یہ پچھلی جانب موجود بمپر کے نیچے چھپا ہوا نظر آرہا ہے۔ اس کے علاوہ نمونے کی طرح تصاویر میں بھی ہیچ بیک کا جذباتی انداز کافی نمایاں ہے۔ دیگر تصاویر دیکھ کر بخوبی اندازہ ہوتا ہے کہ صارفین کو بالکل ویسی ہی گاڑی فروخت کی جائے گی کہ جیسی جنیوا موٹر شو میں دکھائی گئی تھی۔
جہاں تک بات ہے ہونڈا سِوک ہیچ بیک کے انجن کی تو اس میں ہونڈا کا نیا 1500 سی سی ٹربو چارجڈ انجن شامل ہے۔ ایسی بھی خبریں گردش کر رہی ہیں کہ ٹائپ –آر ماڈل میں نیا 2000 سی سی ٹربو چارجڈ انجن لگایا جائے گا تاہم اس بات کی تصدیق ہونا باقی ہے۔
پاکستان میں بہت شدت سے نئی ہونڈا سِوک 2016 کا انتظار کیا جارہا ہے۔ امید واثق ہے کہ رواں سال کے آخر تک ہم نئی سِوک کو پاکستان میں دیکھ سکیں گے۔ یہ بھی دیکھنا ہوگا کہ آیا سِوک ہیچ بیک انداز میں بھی پاکستان آتی ہے یا صرف سیڈان ہی پر اکتفا کیا جاتا ہے۔ اگر ہونڈا ایٹلس نے سِوک ہیچ بیک نہ بھی پیش کی تو ہوسکتا ہے کوئی شائق اسے بیرون ملک سے درآمد ہی کرلے۔
