انڈس موٹرز صارفین کو کرولا ایکس ایل آئی کی مفت رجسٹریشن پیش کرنے لگا
جب معاملہ اپنی مصنوعات کی تشہیر اور دیگر رعایتیں پیش کرنے کا ہو تو انڈس موٹر کمپنی (IMC) زبردست کام کرتی ہے۔ فروخت میں آنے والی کمی کے ساتھ پاکستان کا آٹو سیکٹر مشکل دور سے گزر رہا ہے اور وہ اس سے نکلنا چاہتا ہے۔ بحالی کا یہ عمل مختلف رعایتیں دے کر، ایسی پروموشنز اور دیگر پیشکشوں کے ذریعے مارکیٹ کو تحریک دے کر شروع کیا جا سکتا ہے جو کار خریدنے والوں کو فائدہ پہنچا سکیں۔ انڈس موٹر کمپنی نے، جو پاکستان میں ٹویوٹا کی گاڑیوں بناتی ہے، اپنے صارفین کو ایک پُرکشش آفر دی ہے۔ جنوری کے مہینے میں آپ کرولا XLi کی خریداری پر مفت رجسٹریشن حاصل کر سکتے ہیں۔
IMC یہ آفر اپنی 30 ویں سالگرہ پر دے رہا ہے۔ یہ ایک محدود مدّت کی پیشکش ہے اور آپ نئی کرولا XLi کی بکنگ کے لیے قریبی ترین ٹویوٹا ڈیلرشپ کا رُخ کر سکتے ہیں۔ آپ کرولا XLi کی دستیابی کے بارے میں IMC کی ویب سائٹ سے آگہی حاصل کر سکتے ہیں۔ IMC نے اگست 2019ء میں بھی ایسی ہی آفر دی تھی؛ تب GLi ویرینٹ بھی شامل تھا۔ IMC کی جانب سے کرولا XLi کے دو ویرینٹ فروخت کیے جا رہے ہیں۔
| ماڈل | ایکس-فیکٹری قیمت (پاکستانی روپے) |
| کرولا 1.3L XLi (مینوئل) | 25,19,000 |
| کرولا 1.3L XLi (آٹومیٹک) | 26,19,000 |
ٹویوٹا IMC نے حال ہی میں کرولا XLi کے دونوں ویرینٹس کی قیمت میں 20,000 روپے کا اضافہ کیا تھا۔ IMC تین سال یا 1,00,000 کلومیٹرز تک کی وارنٹی بھی پیش کرتا ہے (جو بھی پہلے مکمل ہو جائے)۔ پاکستانی روپے کی قدر میں کمی، FED کے نفاذ اور اقتصادی سست روی کی وجہ سے پاکستان میں نہ صرف ٹویوٹا بلکہ سوزوکی اور ہونڈا کی گاڑیوں کی قیمتیں بڑھی ہیں اور فروخت میں کمی آئی ہے۔
IMC فائنانسنگ بھی پیش کر رہی ہے جس میں آپ کو ماہانہ 41,020 روپے ادا کرنا ہوں گے۔ یہ 7 سال کی فائنانسنگ اور 20 فیصد ڈاؤن پیمنٹ پر ہے۔ مزید برآں، یہ محض ظاہری قیمت ہے اور ماہانہ ادائیگی بینکوں کے لحاظ سے مختلف ہو سکتی ہیں۔ 41,020 کی ادائیگی انشورنس کے بھی علاوہ ہے۔
اس سے پہلے IMC نے دسمبر 2019ء کے مہینے میں رعایت پر کرولا XLi کے 300 یونٹس فروخت کیے۔ اس کے علاوہ 2019ء کے دوران کرولا کے مختلف ویرینٹس کی قیمتوں میں 23 فیصد اضافہ ہوا۔
IMC نئے سال 2020ء کی پہلی سہ ماہی میں کرولا 1.3L لائن اپ کا خاتمہ کرنے کے لیے تیار ہے۔ 1.3L کے تمام ویرینٹس کی جگہ یارِس لے گی۔ یارِس ممکنہ طور پر مارچ 2020ء میں لانچ ہوگی اور ممکنہ طور پر مینوئل اور آٹومیٹک دونوں ٹرانسمیشنز میں ہوگی۔ یارِس بھی 1.3L انجن رکھے گی۔
مزید خبروں کے لیے پاک ویلز پر آتے رہیے اور رائے کے اظہار کے لیے نیچے تبصرہ کیجیے۔