مزدا کی نئی تصوراتی گاڑی کی خفیہ تصاویر منظر پر آگئیں
ہم نے کچھ روز قبل آپ کو بتایا تھا کہ ٹوکیو موٹر شو میں مزدا نئی اسپورٹس کار پیش کرے گا تاہم اس حوالے سے ادارے نے محض گاڑی کی ہلکی سی جھلک ہی دکھائی تھی جسے دیکھ کر مداحوں کا تجسس مزید بڑھ گیا تھا۔ اگر آپ بھی ان متجسس لوگوں میں شامل ہیں تو جناب انتظار کی گھڑیاں ختم ہوئیں کیوں کہ ایک جاپانی میگزین نے مزدا کی اگلی RX اسپورٹس کار کی تصاویر پیش کردی ہیں۔
اس گاڑی کا انداز کئی اسپورٹس کار سے اخذ کیا گیا لگتا ہے جس میں مزدا MX-5، پورشے پینامیرا اور مرسڈیز AMG GT زیادہ نمایاں ہیں۔ اگلی جانب سے یہ بالکل 2016 MX-5 لگتی ہے خاص کر اس کی ترچھی گرل اور مخالف زاویے کی ہیڈ لائٹس کے۔ البتہ پچھلا حصہ کافی منفرد اور آنکھوں کو خیرا کرنے والا ہے۔ گاڑی کی چھت بہت خوبصورتی سے لہراتی ہوئی اس کے لمبی لائٹس سے مل رہی ہیں جن کے نیچے دو دائرے ایگزاسٹ کے بھی نمایاں ہیں۔ یہ انداز دراصل یورپی گاڑیوں کی پہچان ہے جسے مزدا نے پہلی بار جاپانی گاڑیوں پر آزمایا ہے۔
مزدا اپنے مداحوں کی خواہش کا احترام کرتے ہوئے تاریخی روٹری انجن کو دوبارہ پیش کیے جانے کا سوچ رہا ہے اور بہت امکانات ہیں کہ اس گاڑی کو ہائبرڈ 800 دہرے روٹری انجن کے ساتھ پیش کیا جائے جو 450 ہارس پاور کی رفتار فراہم کرسکے گا۔ اس حوالے سے خبریں یہ بھی ہیں کہ مزدا نئی اسپورٹس کار میں بالکل نئی ٹیکنالوجی پیش کرے گا جس میں ڈیزل انجن کی طرح کام کرنے والی ایچ سی سی آئی (homogeneous charge compression ignition) بھی ہوسکتی ہے۔
روٹری انجن کی 50 سالگرہ آئندہ سال 2017 میں منائی جائے گی اور یہ بہترین موقع ہے کہ مزدا ایک نئی گاڑی پیش کرکے اس سنگ میل کو مزید یاد گار بنا سکے۔جاپانی میگزین میں تصاویر دیکھنے کے بعد گاڑیوں کے شائقین خاص کر مزدا کے مداحوں میں کافی جوش و خروش پایا جا رہا ہے اور اگر 44 ویں ٹوکیو موٹر شو میں مزدا نے کوئی اور گاڑی پیش کی جو عوام کی توقعات پر پوری نہ اتری تو یہ کار ساز ادارے کے لیے بہت خطرناک ہوسکتا ہے۔
