نئی چھٹی جنریشن کی ٹویوٹا ہائی ایس پاکستان میں لانچ کردی گئی!
ٹویوٹا انڈس موٹر کمپنی نے اپنی کمرشل گاڑی ٹویوٹا ہائی ایس ڈیلکس کی نئی چھٹی جنریشن بالآخر پاکستان میں لانچ کردی ہے۔
مشہور ہائی ایس ماڈل پہلی مرتبہ دنیا بھر میں 1967ء میں متعارف کروایا گیا تھا اور تب سے پاکستان میں بھی بہت مقبول ہے۔ چھٹی جنریشن کی ہائی ایس کو اِس سال کی شروعات میں فلپائنز میں پیش کیا گیا تھا، جو اب پاکستان کے آٹو سیکٹر میں بھی جگہ بنا چکا ہے۔ آٹو مینوفیکچرر نے پہلی بار ہائی ایس کا نیا ڈیزائن شدہ ورژن پیش کیا ہے، جو اب سیمی بونٹ اسٹائل میں آتا ہے۔ پاکستان میں ٹویوٹا نے اس کے تین ویرینٹس پیش کیے ہیں، جو کچھ یوں ہیں:
ٹویوٹا ہائی ایس ڈیلکس اسٹینڈرڈ روف کمیوٹر
ٹویوٹا ہائی ایس ڈیلکس ہائی روف کمیوٹر
ٹویوٹا ہائی ایس ڈیلکس ہائی روف ٹؤرر
جیسا کہ ان کے ناموں سے ظاہر ہے کہ پہلے دونوں ویرینٹس مکمل طور پر کمیوٹنگ یعنی معمولی فاصلے کے روزمرہ سفر کے لیے ہیں جس میں اپنی پسند کی روف کا انتخاب کیا جا سکتا ہے، جبکہ آخری ہائی روف ٹؤرنگ وین ہے۔
پاور ٹرین:
ٹویوٹا ہائی ایس 1GD-FTV 16-Valve DOHC 4-cylinder 2.8L ڈیزل انجن کی طاقت رکھتی ہے۔ اِن-لائن سلنڈر ترتیب کے ساتھ اس کے تمام ویرینٹس میں ڈائریکٹ انجکشن فیول سسٹم موجود ہے۔ دھوئیں کے اخراج کو روکنے کے لیے یورو II رکھنے والی یہ گاڑی ماحول کو کہیں زیادہ صاف رکھنا ممکن بناتی ہے۔ 2755ccٹویوٹا ہائی ایس 15:6 کمپریشن ریشو کے ساتھ ایک طاقتور انجن رکھتی ہے جو ڈیلکس اسٹینڈرڈ روف کمیوٹر ماڈل میں 3400 rpm پر زیادہ سے زیادہ 130 Kw کی طاقت پیدا کر سکتی ہے۔ باقی دونوں میں یہ 3600 rpm پر 115 kW کی طاقت پیدا کرتے ہیں۔ اس گاڑی میں زیادہ سے زیادہ 2600 rpm پر 420 Nm تک ٹارک حاصل کیا جا سکتا ہے۔ ٹویوٹا ہائی ایس کے کمیوٹر ماڈلز مینوئل ٹرانسمیشن کے ساتھ آتے ہیں جبکہ ٹؤرر ویرینٹ آٹومیٹک ہے۔ اسٹینڈرڈ روف ویرینٹ کا ٹرننگ ریڈیس یعنی گھومنے کا نِصف قطر 5.5 میٹر ہے جبکہ ہائی روف ماڈل میں یہ 6.4 میٹر ہے۔
پیمائش اور وزن:
یہ کافی چوڑی جسامت رکھنے والی گاڑی ہے اور اپنی پچھلی جنریشنز سے کافی بہتر ہے۔ اسٹینڈرڈ روف ویرینٹ کی لمبائی، چوڑائی اور اونچائی بالترتیب 5265 ملی میٹر، 1950 ملی میٹر اور 1990 ملی میٹر ہے۔ اس کی ویل بیس 3210 ملی میٹر ہے اور کم از کم گراؤنڈ کلیئرنس حرکت کے دوران 175 ملی میٹر ہے۔ وین کا کم از کم وزن (بغیر سواریوں کے) 2165 کلوگرام ہے جس میں یہ 15 مسافروں کو جگہ فراہم کر سکتی ہے۔ دوسری جانب ہائی روف ویرینٹ کہیں زیادہ بڑا ہے جو بالترتیب 5915 ملی میٹر، 1950 ملی میٹر اور 2280 ملی میٹر کی پیمائش رکھتا ہے۔ ویل بیس 3860 ملی میٹر ہے جو اسٹینڈرڈ روف ورژن سے زیادہ ہے۔ کم از کم گراؤنڈ کلیئرنس 185 ملی میٹر کے ساتھ تھوڑی سی زیادہ ہے اور یہ سڑک سے کافی اونچی ہے۔ ہائی روف کمیوٹر اور ہائی روف ٹؤرر کا کم از کم وزن بالترتیب 2475 کلو اور 2625 کلوگرام ہے۔ ہائی روف کمیوٹر کم از کم 17 افراد کی گنجائش کے ساتھ رکھتی ہے جبکہ ٹؤرر میں 14 افراد کی گنجائش ہے۔ تمام ورژنز میں فیول ٹینک کی گنجائش ایک ہی جیسا ہے یعنی 70 لیٹرز کا۔
بریکنگ اور سسپنشن:
نئی ٹویوٹا ہائی مسافروں کی حفاظت اور آرام کے لیے بہتر بریکنگ اور سسپنشن کا وعدہ کرتی ہے۔ اسٹینڈرڈ روف ویرینٹ میں اس کے آگے وینٹی لیٹڈ ڈسک بریکس اور پیچھے ڈرم بریکس ہیں۔ دوسری جانب ہائی روف کے دونوں ماڈلز آگے اور پیچھے دونوں جگہ وینٹی لیٹڈ ڈسک بریکس کے ساتھ آتے ہیں۔ جاپانی آٹو مینوفیکچرر نے نئی ہائی ایس میں میک فرسن اسٹرٹ سسپنشنز دیے ہیں، جبکہ یہ انٹیگرل قسم کے پاور اسٹیئرنگ کے ساتھ آتی ہے۔
ایکسٹیریئر:
ٹویوٹا ہائی ایس تاریخ میں پہلی بار اپنے ماڈل میں نئے ڈیزائن کے ساتھ آئی ہے۔ آٹو مینوفیکچرر نے اس کمرشل گاڑی کی ڈیزائن لینگوئج کو مکمل طور پر بدل کر رکھ دیا ہے کیونکہ اب اس میں بونٹ کو آگے بڑھایا گیا ہے، جسے سیمی-ہُڈ کا نام دیا گیا ہے اور یہ اِس ماڈل کی سب سے نمایاں چیز ہے۔ بونٹ کا یوں آگے کرنا یقینی بناتا ہے کہ گاڑی کے اگلے حصے میں انجن کے لیے کافی جگہ بنے۔ اس سے پہلے انجن فرنٹ ایکسل کے اوپر لگا ہوتا تھا جس سے آگے بیٹھے مسافر کو پریشان کر دینے والی تھرتھراہٹ اور نشست کے نیچے سے گرمی کا احساس ہوتا تھا۔ علاوہ یہ کہ اب اس کمرشل گاڑی کے انجن کی مرمت کرنا زیادہ آسان ہو گیا ہے۔ ٹویوٹا ہائی ایس کے اگلے حصے پر گرِل کے ساتھ زیادہ تیز قسم کے اینگولر ہیلوجن کرسٹل ہیڈ لیمپس ہیں۔ ٹؤرر ویرینٹ میں فرنٹ گرِل میں کروم پلیٹنگ بھی ہے اور رات کے وقت بہتر نظر آنے کے لیے ہیڈلیمپس کے نیچے فوگ لیمپس بھی لگائے گئے ہیں۔ سائیڈ ٹرن سگنل لیمپس کمیوٹر ویرینٹس میں گاڑی کے فینڈر میں لگائے گئے ہیں اور ہائی ایس کے ٹؤرر ورژن میں یہ سائیڈ مرر میں آتے ہیں۔ فرنٹ بمپر بھی پچھلے ماڈلز کے مقابلے میں کچھ اسپورٹی انداز کا ہے اور کمیوٹر ویرینٹس میں کالے رنگ کا ہے جبکہ ٹؤرر ورژن میں باڈی کے ہی رنگ کا۔ اس کمرشل گاڑی کا ریئر بمپر بھی اسی طرح آتا ہے۔ ریئر سائیڈ مررز پہلے دونوں ویرینٹس میں مینوئلی کنٹرول کیے جا سکتے ہیں جبکہ ٹاپ ویرینٹ میں یہ الیکٹرونیکلی کنٹرولڈ ہوتے ہیں۔
ٹویوٹا ہائی ایس کا سائیڈز سے نظارہ ظاہر کرتا ہے کہ کمپنی نے اس کمرشل گاڑی کی فیول اکانمی کو مدنظر رکھتے ہوئے ایروڈائنامکس پر بہت توجہ دی ہے۔ ڈور ہینڈلز پہلے دو ویرینٹس میں کالے رنگے کے ہیں جبکہ ہائی ایس کے ٹؤرر ورژن میں یہ باڈی کی رنگت کے ہی ہیں۔ پچھلی سائیڈ ہائی ایس کے پرانے ماڈلز سے کافی ملتی جلتی ہے لیکن کہیں زیادہ چوڑی چکلی ہے۔ یہ ہائی ماؤنٹ LED بریک لیمپ سے لیس ہے تاکہ آسانی سے پہچانی جائے۔ روایتی ریئر کمبی نیشن لیمپس پچھلے ماڈلز کے مقابلے میں بڑے اور عمودی شکل کے ہیں۔ ہائی روف ٹؤرر وین میں ایک ہُڈ سائلنسر بھی فراہم کیا گیا ہے۔
انٹیریئر:
ٹویوٹا ہائی ایس بزنس کمیوٹنگ کے لیے بنائی گئی ہے کیونکہ یہ بیک وقت آرام اور سہولت دونوں فراہم کرتی ہے اور اس کے کیبن کے اندر سامان کی گنجائش بھی کافی ہے۔ یہ گاڑی میں داخلے اور نکلنے کے لیے بہتر راستے کے ساتھ محفوظ ترین سفر بھی ممکن بناتی ہے۔ مینوفیکچرر کی جانب سے سلائیڈنگ دروازے کی چوڑائی بڑھائی گئی ہے اور ڈور اسٹیپ میں بھی اضافہ کیا گیا ہے۔ اندر سے کیبن کافی خاموش ہے جس کی وجہ انجن کا اگلی سیٹوں کے بجائے بونٹ کے حصے میں منتقل ہونا ہے۔ گاڑی کے اگلے حصے میں داخل ہونے پر ڈیش بورڈ ایک تازہ دم احساس دیتا ہے۔ یہ 4 اسپوک یوریتھین پاور اسٹیئرنگ ویل مع مینوئل ٹلٹ اور ٹیلی اسکوپک ایڈجسٹمنٹ فیچر رکھتی ہے۔ اگلی نشستوں پر بیٹھنے کے بہتر انداز کے لیے ہیڈ ریسٹس فراہم کیے گئے ہیں۔ سن وائزرز بھی اگلی نشستوں کے دونوں جانب موجود ہیں۔ وین روشنی کے ساتھ گاڑی میں آپ کا خیر مقدم بھی کرتی ہے۔ کمیوٹر ویرینٹس میں نشستوں کا مٹیریل کپڑے کا ہے جبکہ ٹؤرر ویرینٹ میں اضافی VNL لیدر آتا ہے۔ ڈرائیور سیٹ ٹویوٹا ہائی ایس کے تمام ویرنٹس میں عموداً بھی ایڈجسٹ کی جا سکتی ہے۔ پچھلی نشستوں پر مسافروں کے لیے لیمپس اور USB پورٹس بھی موجود ہیں۔ مزید یہ کہ پیچھے آرم ریسٹس اور مددگار گرپس بھی مسافر کی سہولت کے لیے فراہم کی گئی ہیں۔ یہ بات بھی یہاں قابل ذکر ہے کہ ٹؤرر وین کے اگلی حصے میں درمیانی نشست نہیں ہے جبکہ کمیوٹر ویرینٹس میں ہے۔ ڈرائیور سیٹ اور فرنٹ پسنجر کی اپنی علیحدہ سیٹیں ہیں۔
یہ کثیر المقاصد وین مینوئل ایئر کنڈیشننگ سسٹم سے لیس ہے جسے AC نوب کے ذریعے کنٹرول کیا جاتا ہے۔ اگلے حصے میں چار ایئر وینٹس فراہم کیے گئے ہیں جبکہ پچھلے حصے میں چھت پر ایئر وینٹس لگائے گئے ہیں۔ گاڑی میں کمپنی کی جانب سے لگائے گئے ملٹی انفارمیشن ڈسپلے کے ساتھ ایک ہیٹر بھی نصب ہے۔ وین میں کوئی آڈیو سسٹم تو نہیں ہے لیکن کمیوٹر ورژن میں دو اسپیکر اور ٹؤرر وین میں چھ اسپیکر ضرور دیے گئے ہیں۔ البتہ کیبن میں سامان رکھنے کے لیے کافی جگہیں ہے جن میں اگلے اور پچھلے حصے میں متعدد کپ ہولڈرز بھی شامل ہیں۔ دروازوں میں جیبیں بھی ہیں کہ جن میں A4 سائز کی فائلیں رکھی جا سکتی ہیں۔ ایک کونسول ٹرے بھی ہے کہ جس میں ریموو ایبل پارٹیشن ہے اور فوری رسائی کے لیے اوپر بھی ایک ٹرے موجود ہے۔ لاکنگ سسٹم کے ساتھ ایک گلَو باکس بھی اگلے حصے میں موجود ہے۔ ریئر ویو مرر الیکٹرو کرومک ہے جس میں ٹاپ ویرینٹ میں بیک مانیٹر ڈسپلے ہے۔ یہ رات کے وقت بہتر نظر آنے کے لیے روشنی کی مقدار کا اندازہ لگا کر کام کرتا ہے۔ ٹویوٹا ہائی ایس پچھلی قطار میں فولڈ ایبل سیٹیں ہونے کی وجہ سے سامان کی کافی گنجائش دیتی ہے۔ اس لیے اس گاڑی میں سامان لادنے کے لیے کافی جگہ ہے۔
سیفٹی فیچرز:
نئی ٹویوٹا ہائی ایس زبردست آرام کے ساتھ زیادہ سے زیادہ 17 افراد کے بیٹھنے کی گنجائش ہی نہیں دیتی بلکہ یہ مسافروں کی سیفٹی کو بھی یقینی بناتی ہے۔ اس ملٹی پرپز گاڑی کے تمام ویرینٹس ABS بریکس سے لیس ہیں جو زیادہ رفتار پر بھی گاڑی پر بہت اچھا کنٹرول دیتے ہیں۔ ABS کے علاوہ EBD کی موجودگی بھی دونوں جانب پہیوں پر بریکنگ طاقت کی برابر تقسیم کو یقینی بناتی ہے۔ تصادم کی صورت میں کم سے کم نقصان کے لیے یہ کمرشل گاڑی فرنٹ پر 2 ایئر بیگز سے لیس ہے یعنی ایک ڈرائیور کے لیے اور ایک اگلے مسافر کے لیے۔ اگلی نشستوں پر فورس لِمیٹر کے ساتھ سیٹ بیلٹس بھی فراہم کی گئی ہیں جبکہ پیچھے بیٹھے تمام مسافروں کے لیے علیحدہ پوائنٹ ٹائپ سیٹ بیلٹس ہیں۔ گاڑی میں چوری سے بچنے کا ایک نظام بھی موجود ہے جو ایک اِموبیلائزر کِی اور سکیورٹی ہارن کے ساتھ آتی ہے۔ دیگر سیفٹی اور سکیورٹی فیچرز میں لائٹ ریمائنڈ وارننگ، کی ریمائنڈ وارننگ، ایمرجنسی اسٹاپ سگنل، ڈور اجار وارننگ وغیرہ شامل ہیں۔ ان میں سب سے اہم نیا ڈیزائن کیا گیا بونٹ ہے۔ یہ گاڑی کی سیفٹی میں بڑا حصہ ڈالتا ہے کیونکہ حادثے کی صورت میں یہ زیادہ دھچکا خود برداشت کرتا ہے۔
گاڑی کی مکمل خصوصیات یہ ہیں:
رنگ:
ٹویوٹا ہائی ایس صارفین کے لیے کئی رنگوں میں پیش کی جا رہی ہے۔ تمام ویرینٹس کچھ ان رنگوں میں دستیاب ہیں:
اسٹینڈرڈ روف کمیوٹر: سفید، خاکی، سلور اور نیلا
ہائی روف کمیوٹر: سفید، خاکی اور سلور
ہائی روف ٹؤرر: سفید اور سلور
قیمت:
نئی ٹویوٹا ہائی ایس کی قیمت کا آغاز 64,80,000 روپے سے ہوتا ہے اور یہ ٹؤرر ویرنٹ میں 80,90,000 روپے تک چلی جاتی ہے۔ مکمل تفصیل کچھ یوں ہے:
اسٹینڈرڈ روف کمیوٹر: 64,80,000 روپے
ہائی-روف کمیوٹر: 72,90,000 روپے
ہائی روف ٹؤرر: 80,90,000 روپے
ٹویوٹا ہائی ایس ڈیلکس بیک وقت آرام اور سہولت کے ساتھ سفر کے عملی اور جدید طریقے کا شاہکار ہے۔ کمرشل گاڑی اپنے پچھلے ماڈلز سے کافی تبدیل ہے۔ یہ ٹویوٹا انڈس کے مجاز ڈیلرز کے پاس دستیاب ہے۔ اس نئی ٹویوٹا ہائی ایس ڈیلکس کے بارے میں آپ کی رائے کیا ہے؟ نیچے تبصروں میں ہمیں ضرور بتائیں۔ آٹوموبائل انڈسٹری کی مزید تازہ خبروں کے لیے پاک ویلز پر آتے رہیں۔