پاکستان میں متعارف کروائی گئی پرنس پرل پر پہلی نظر، ایک جائزہ!
ریگل آٹوموبائلز نے بالآخر 31 جنوری 2020ء کو لاہور میں منعقدہ ایک تقریب کے دوران اپنی اِنٹری-لیول 800cc ہیچ بیک پرنس پرل متعارف کروا ہی دی۔ اس گاڑی کا شدت سے انتظار کیا جا رہا تھا۔
بجٹ کار کے زمرے میں پرنس پرل کی آمد بلاشبہ پاکستان کے مقامی آٹو سیکٹر میں ایک زبردست اضافہ ہے۔ فی وقت اس نئی گاڑی کے بارے میں زیادہ کچھ نہیں کہا جا سکتا کیونکہ یہ ابھی مارکیٹ میں داخل ہی ہوئی ہے۔ البتہ حاضرین کی بڑھتی ہوئی طلب کی بدولت پاک ویلز پرنس پرل کا پہلی نظر میں جائزہ لا رہا ہے جو آپ کو حال ہی میں سڑکوں پر آنے والی اس ہیچ بیک کے بارے میں کچھ اندازہ دے دے گا۔ ویسے کسی گاڑی کے بارے میں تفصیلی رائے تبھی دی جا سکتی ہے جب وہ کم از کم 3,000 کلومیٹرز چلی ہوئی ہو۔ فی الحال پرنس پرل کے فیچرز اور بلڈ کوالٹی پر بات کرتے ہیں۔
پرنس پرل انٹیریئر:
حال ہی میں متعارف کروائی گئی پرنس پرل عوام کی توقعات سے کہیں بہتر گاڑی ہے۔ چینی پروڈکٹ ہونے کی وجہ سے اس ہیچ بیک کو کم معیار کی گاڑی سمجھا جا رہا تھا لیکن درحقیقت ایسا نہیں ہے۔ اس گاڑی کا انٹیریئر بہت متاثر کُن ہے، جس کی بنیادی وجہ آٹومیکر کی جانب سے زیبائش کے لیے کئی چیزیں شامل کرنا ہے، جیسا کہ ڈیش بورڈ، دروازوں اور اسٹیئرنگ ویل میں لکڑی کے ٹرِم کا استعمال ہے ۔ عموماً اس کیٹیگری کی گاڑیوں میں ان کے استعمال کی امید نہیں کی جاتی۔ پھر اِس ہیچ بیک کی تمام کھڑکیاں پاورڈ ہیں، جو پاکستان کے آٹو سیکٹر میں تو بہت حیران کُن ہے کیونکہ یہاں متعدد گاڑیوں میں اب بھی یہ فیچر نہیں۔
مثال کے طور پر سوزوکی ویگن آر آج بھی فرنٹ میں پاور وِنڈوز اور پچھلے حصے میں مینوئل ونڈوز کے ساتھ آتی ہے۔ اس کے علاوہ پرنس پرل کا اسٹیئرنگ ویل بھی بہت انوکھی شکل و صورت رکھتا ہے جو اس زمرے کی گاڑیوں میں آنے والے روایتی اسٹیئرنگ ویل سے کافی مختلف ہے۔ اس ہیچ بیک میں انٹیریئر کی بلڈ کوالٹی بھی کافی متاثر کُن ہے۔ کیبن میں استعمال کیا گیا پلاسٹک مٹیریل اچھے معیار کا ہے۔ یہ گاڑی فیول لیول اور ہیٹ انڈی کیشنز کے ساتھ ایک ڈجیٹل اسپیڈومیٹر بھی رکھتی ہے، جس کا معیار بہتر بنایا جا سکتا تھا۔ جہاں تک اس زمرے کی دوسری گاڑیوں کا تعلق ہے تو انفوٹینمنٹ سسٹم بھی اتنا بُرا نہیں ہے ۔ تصویروں کے لیے سلائیڈ کیجیے:
آرام:
عوام کی جانب سے جو سوال سب سے زیادہ کیا جاتا ہے وہ اس ہیچ بیک کے ایئر کنڈیشننگ سسٹم کا کام کرنا ہے۔ سردیوں میں تو AC کے حوالے سے کوئی حتمی رائے نہیں دی جا سکتی کیونکہ اس کا جائزہ تو گرمیوں میں ہی لیا جا سکتا ہے۔ البتہ آرام کے معاملے میں پرنس پرل آرام دہ سیٹوں کی حامل ہے اور ڈرائیونگ کے دوران اچھا seating posture دیتی ہے۔
اس ہیچ بیک کا ایک اور عمدہ پہلو گیئر لِیور کی جگہ ہے۔ عموماً اس کیٹیگری کی کاروں میں اسے علیحدہ یونٹ کے طور پر دیا جاتا ہے، لیکن پرنس نے بڑی خوبی سے اسے ڈیش بورڈ کا حصہ بنایا ہے۔ ساؤنڈ پروفنگ کا معاملہ دیکھیں تو انجن کی آواز گاڑی کے کیبن میں کچھ زیادہ آ رہی ہے، اسے بہتر بنایا جا سکتا تھا۔ لیکن یہ اتنا بڑا مسئلہ نہیں کیونکہ اس زمرے کی کاروں میں عموماً اتنی آواز تو آتی ہی ہے۔
پرنس پرل کا ابتدائی جائزہ اس وڈیو میں دیکھیں:
پرنس پرل ایکسٹیریئر:
پاک ویلز پہلے ہی اس ہیچ بیک کے ایکسٹیریئر کا ایک جائزہ پیش کر چکا ہے۔ پرنس پرل جدید ڈیزائن انداز کی بدولت پُرکشش صورت رکھتی ہے۔ البتہ اس زمرے میں عوام کے لیے ایکسٹیریئر بہت زیادہ اہم نہیں ہوتا۔ ویسے بھی ہیچ بیک میں ڈیزائننگ کے لیے گنجائش بہت کم ہوتی ہے۔ اس کے باوجود آٹومیکر نے الائے رِمز اور فوگ لیمپس جیسی خصوصیات فراہم کی ہیں، جو عموماً انٹری لیول ہیچ بیکس میں نہیں ہوتیں۔
قیمت اور بکنگ:
ریگل آٹوموبائلز نے پرنس پرل 10,49,000 روپے کی ایکس-فیکٹری قیمت پر لانچ کی ہے۔ اگر آپ اپنے شہر میں اس گاڑی کی قیمت معلوم کرنا چاہتے ہیں تو پاک ویلز آن-روڈ پرائس کیلکولیٹر کا استعمال کرکے رجسٹریشن قیمت اور ٹیکس وغیرہ کا اندازہ لگا سکتے ہیں۔ پرنس پرل کا بکنگ دورانیہ اس وقت 3 مہینے ہے اور یہ پے آرڈر یا ڈیمانڈ ڈرافٹ کی صورت میں 3,50,000 روپے کی ادائیگی پر بُک کروائی جا سکتی ہے۔
پرنس پرل کے فیچرز اور خصوصیات کے بارے میں مزید جاننے کے لیے پاک ویلز کے نیو کار سیکشن میں جائیں۔ ہماری طرف سے اتنا ہی۔ اس 800cc ہیچ بیک کے تفصیلی جائزے کے لیے آتے رہیں۔ اپنے خیالات نیچے تبصروں میں پیش کیجیے۔