سی ای ایس 2020: سونی کی گاڑی نے سب کو حیران کردیا
سچ پوچھیے تو میں نے کبھی نہیں سوچا تھا کہ میں اتنا حیران ہوں گا لیکن میری توقعات کے برعکس سونی نے نہ صرف یہ بات خفیہ رکھی کہ وہ ایک ’شاہکار‘ پر کام کر رہا ہے بلکہ اسے کچھ ایسے انداز میں پیش بھی کیا کہ جس نے CES 2020 کے تمام ہی حاضرین کو ششدر کر دیا۔ ہوسکتا ہے کہ یہ گاڑی بہت سے لوگوں کے لیے محض ’شو بازی‘ ہو لیکن سونی نے جتنی باریکی اور نفاست سے اس گاڑی کے ہر ہر حصے میں کام کیا ہے، اس کی داد دینا بنتی ہے۔
مختصراً اس گاڑی کا تعارف کرواؤں تو کچھ یوں ہوگا کہ سونی ویژن-ایس 200 کلوواٹ کواڈ موٹرز کی حامل گاڑی ہے جو چاروں پہیوں کی قوت سے چلتی ہے۔ یہ گاڑی صرف 4.8 سیکنڈز میں 0 سے 62 میل فی گھنٹہ کی رفتار حاصل کرسکتی ہے۔ جس کے بعد یہ گاڑی زیادہ سے زیادہ 149 میل فی گھنٹہ رفتار کو چھو سکتی ہے جو کہ 5 ہزار پاؤنڈ وزنی گاڑی کے لیے کافی پرکشش رفتار ہے۔
سب سے زیادہ قابل ذکر نکتہ تو یہ ہے کہ ادارہ مستقبل قریب میں اس گاڑی کی تیاری کا کوئی ارادہ نہیں رکھتا۔ تو پھر سوال پیدا ہوتا کہ گاڑی بنانے اور اسے لوگوں کے سامنے پیش کرنے کا فائدہ کیا ہے؟ تو جناب اس سوال کا جواب یہ ہے کہ سونی دراصل اس ویژن کانسیپٹ کے ذریعے یہ ظاہر کرنا چاہتا ہے کہ وہ مستقبل کی گاڑیوں کو بہتر بنانے کے لیے کیا کردار ادا کرسکتا ہے۔ اب تک لوگ اس بات کو مان چکے ہیں کہ مستقبل میں گاڑیاں ازخود چلیں گی اور انہیں چلانے کے لیے ڈرائیور کی ضرورت ختم ہوجائے گی۔ ایسی صورت میں گاڑیوں کے مسافر کو سفر کا بھرپور لطف کیسے فراہم کیا جائے؟ سونی کی یہ کانسیپٹ کار دراصل اسی کا دلچسپ جواب فراہم کر رہی ہے۔
جن لوگوں کو علم نہیں انہیں بتاتے چلیں کہ سونی گاڑیوں کے شعبے میں ایک بڑا اور موثر نام رکھتی ہے۔ بہترین آڈیو سسٹمز کی تیاری سے لے کر گاڑیوں میں زیر استعمال CMOS کیمرا سینسرز تک سونی لاتعداد گاڑیوں میں موجود ہے۔ اور اب یہ ادارہ اپنے کردار کو مزید وسعت دیتے ہوئے اپنے قدم مزید جمانا چاہتا ہے۔
سونی ویژن-ایس کے اندرونی حصے کی بات کریں تو شاندار انٹیریئر کے ساتھ اگلی اور پچھلی جانب اسکرینز خاصی نمایاں ہیں جنہیں سونی کے بہترین ساؤنڈ سسٹم سے جوڑا گیا ہے۔ یہ سسٹم ہر نشست سے منسلک ہے جو ہر مسافر کو بہترین اور منفرد تجربہ فراہم کرے گا۔ اس گاڑی میں 33-سینسر ٹیکناولی بھی استعمال کی گئی ہے جس میں ازخود پارکنگ، جدید کروز کنٹرول، اور لین تبدیل کرنے کا خودکار نظام بھی شامل ہے۔ کیوں، ہیں نا ’شاہکار‘۔
گاڑی کا ظاہری حصہ بھی انتہائی پرکشش اور جاذب نظر ہے۔ سب سے زیادہ قابل ذکر بات، سائیڈ مررز کا نہ ہونا ہے۔ ان کی جگہ آگے پیچھے کی جانب دیکھنے والے کیمرے لگائے گئے ہیں جو مسافروں کو دروازوں پر لگی اسکرینز پر عقب کا مکمل منظر دکھاتے ہیں۔ اس بات کی توقع صرف سونی جیسے ادارے ہی سے کی جاسکتی تھی جو کیمرا لینس کے معاملے میں بہتر سے بہترین کام کے لیے مشہور ہے۔
اور ہاں، گاڑی کے اندر لگائی جانے والی اسکرینز صرف کیمروں ہی کے مناظر نہیں دکھائیں گی بلکہ مسافروں کو تفریح کے بھرپور مواقع بھی فراہم کریں گی اور انہیں اپنے من پسند ٹی وی شوز، گیمز اور آن لائن اسٹریمنگ استعمال کرنے کا بھی موقع دیں گی۔ اگر آپ سوچ رہے ہیں کہ یہ سب کیسے ممکن ہوگا تو بھئی یہ مستقبل کی باتیں ہیں کہ جب 5-جی ہاٹ اسپاٹ بھی گاڑی میں موجود ہوگا اور اسی سے تیز رفتار انٹرنیٹ استعمال کیا جاسکے گا۔ ایک اور دلچسپ بات یہ رہی کہ CES میں سونی نے گاڑی کے سوفٹویئرز کے کمالات بھی دکھائے تاہم یہ بات خفیہ رکھی کہ یہ سوفٹویئر کیسے تیار کیا گیا ہے۔
جن لوگوں کو اس بارے میں مزید جاننے کا اشتیاق ہے، انہیں بتاتے چلیں کہ سونی نے یہ گاڑی میگنا کی مدد سے تیار کی ہے جو گاڑیاں تیار کرنے والا ایک ادارہ ہے۔ ان دونوں کی شراکت داری کے نتیجے میں یہ ’شاہکار‘ وجود میں آئی جو آج فروخت ہونے والی برقی گاڑیوں سے بدرجہ خوبصورت ہے۔