سُپر چارجڈ ٹویوٹا کرولا آلٹِس؛ TRD کا تیار کردہ ایک ماڈل
آپ میں سے بہت سے لوگ مرسڈیز کے AMG شعبے سے واقف ہوں گے۔ اگر نہیں، تو ہم آپ کو بتائے دیتے ہیں کہ AMG دراصل جرمن ادارے مرسڈیز کا خصوصہ شعبہ ہے جو اپنے ہی ادارے کی تیار کردہ عام گاڑیوں میں ہر ممکن تبدیلیاں کر کے انہیں مزید برق رفتار اور طاقتور بنانے کا کام کرتا ہے۔ جاپانی کار ساز ادارے ٹویوٹا (Toyota) نے بھی اسی طرز کا ایک شعبہ TRD (ٹویوٹا ریسنگ ڈیولپمنٹ) کے نام سے قائم کر رکھا ہے جو ٹویوٹا کی عام گاڑیوں کے لیے وہی کام کرتا ہے جو مرسڈیز کے لیے AMG انجام دیتا ہے۔
ٹویوٹا ریسنگ ڈیولپمنٹ نے حال ہی میں مقبول ترین کرولا آلٹِس (Corolla Altis) پر اپنی مہارت دکھائی ہے۔ بہترین اور طاقتور انجن کی حامل اس گاڑی کو ٹویوٹا کرولا آلٹِس TRD سُپر چارجڈ کا نام دیا گیا ہے۔ اس میں شامل 1600cc انجن 191 بریک ہارس پاور فراہم کرنے کی اہلیت رکھتا ہے۔ یہ ایک عام ٹویوٹا کرولا کے 1600cc انجن کے مقابلے میں 80 بریک ہارس پاور زیادہ ہے۔ قدرے جذباتی انداز اور بہتر پہیوں کے علاوہ چھت اور دروازے کے شیشوں کا وزن کم رکھنے کے لیے کاربن فائبر سے تیار کیا گیا ہے۔ اس سے آپ اندازہ لگاسکتے ہیں کہ جب گاڑی کا انجن کہیں زیادہ طاقتور ہو اور اس کا وزن بھی عام گاڑی سے کم ہو تو اس کی رفتار کہاں تک جاسکتی ہے۔
یہ بھی پڑھیں: جاپانی ٹویوٹا کرولا ایگزیو آزمائیں؛ پاکستانی ٹویوٹا کرولا کو بھول جائیں
ٹویوٹا کرولا آلٹِس TRD سُپر چارجڈ کی خصوصیات یہیں تمام نہیں ہوتیں۔ اس میں ایرو کٹ (aero kit) بھی لگائی گئی ہے جس کے ساتھ آگے اور پیچھے اسپلِٹر، ریسنگ کوائل کے حامل جدید سسپنشن، 18 انچ کے دوڑتے ہوئے پہیوں کو روکنے کے لے TRD بریکس بھی شامل ہیں۔ اتنا کچھ تبدیل ہونے کے باوجود اس گاڑی کے اندرونی حصے میں وہ تمام خصوصیات اور سہولیات موجود ہیں جو ایک عام کرولا کا خاصہ سمجھی جاتی ہیں۔ اس کے علاوہ آپ اس سُپر چارجڈ کرولا میں بنا تار (wireless) موبائل فون چارج کرنے کی سہولت اور بہترین موسیقی و تفریحی نظام کا بھی لطف اٹھا سکتے ہیں۔
اس بارے میں کچھ کہنا قبل از وقت ہوگا کہ آیا ٹویوٹا اسے اپنے کارخانے میں تیار کرنے کے لے بھیجے گا یا پھر یہ گاڑی محض ایک تصور ہی تک محدود رہے گی۔ لیکن اگرٹویوٹا جاپان اسے تیار اور فروخت کرتا بھی ہے تو شاید ہم پاکستان میں اس کا دیدار نہ کرپائیں۔ البتہ ٹویوٹا انڈس موٹرز اگر چاہے تو اسے پاکستان میں مناسب قیمت پر پیش کرسکتا ہے۔
عام ٹویوٹا کرولا کی مقبولیت دیکھتے ہوئے کہا جاسکتا ہے کہ اسے بھی پاکستانی صارفین ضرور خریدنا چاہیں گے۔ اس بارے میں آپ اپنی رائے بذریعہ تبصرہ شامل کرسکتے ہیں۔
