موسم سرما میں ٹائرز کا خیال رکھنے کے لیے 4 اہم تجاویز
ہر شخص کو اپنی گاڑی پیاری لیکن قابل افسوس امر ہے کہ ہم اس کے ان اہم ترین حصوں کا خیال رکھنا بھول جاتے ہیں کہ جن پر ہماری گاڑی رواں دواں رہتی ہے۔ جی ہاں، میں گاڑی کے پہیوں اور ٹائر ہی کی بات کر رہا ہوں کہ جنہیں آپ کی توجہ کی ضرورت رہتی ہے۔ خاص کر اگر آپ ایسے علاقے میں رہتے ہیں کہ جہاں برف باری ہوتی ہو تو ایسی صورتحال میں گاڑی کے ٹائرز کی دیکھ بھال زیادہ ضروری ہوجاتی ہے۔ آئیے ہم آپ کو بتاتے ہیں کہ موسم سرما کے دوران گاڑی کے ٹائرز کی حفاظت کیسے کی جاسکتی ہے۔
1: موسم سرما کی آمد سے کم از کم ایک ماہ قبل نئے ٹائر لگوا لینے چاہئیں۔ خاص طور پر برفانی علاقوں میں سفر کرنے والی گاڑیوں کے لیے گاڑیوں کی تبدیلی انتہائی اہم اور ضروری ہے۔ اگر آپ کی گاڑی کے ٹائر بہت پرانے یا گھس چکے ہیں تو انہیں فی الفور تبدیل کروالیں کیوں کہ سردیوں کے موسم میں پرانے ٹائرز کو سخت ہوجانے کے سبب سڑک پر گرفت برقرار رکھنے میں مشکل پیش آتی ہے۔
2: ٹائر میں ہوا کے تناسب پر نظر رکھیں۔ سردیوں کے موسم میں ٹائر عام طور پر سکڑ جاتے ہیں جس کی بنیادی وجہ کم درجہ حرارت میں ہوا کے ذرات قریب آجاتے ہیں۔اس سے ٹائرمیں بھری جانے والی ہوا کم ہوجاتی ہے اور ٹائر سکڑنے کے باعث بریک کی کارکردگی پر منفی اثر پڑتا ہے۔ نیز گاڑی چلانے کے دوران ایندھن میں بہت زیادہ خرچ ہوتا ہے۔ اس لیے بہتر ہے کہ ہر 30 دن میں گاڑی کے ٹائر میں ہوا کے تناسب کو دیکھا جائے۔
3: گھسے ہوئے ٹریڈز والے ٹائرز تبدیل کریں۔ برف سے ڈھکی شاہراہوں پر سفر کرتے ہوئے ٹائر ٹریڈ بہت مددگار ثابت ہوتے ہیں۔ اگر گاڑی کے ٹائر پر بنائے جانے والے ٹریڈز گھس جائیں تو اس سے گاڑی پر گرفت کمزور پڑجانے اور اس کے پھسلنے کے امکانات بڑھ جاتے ہیں۔ اس لیے بہتر ہے کہ برسات یا برف باری میں سفر کرنے سے پہلے سکے کی مدد سے ٹائر ٹریڈ چیک کرنا ہرگز نہ بھولیں۔
4: کٹے پھٹے نشانات بھی دیکھیں۔ ہر ماہ گاڑی کے ٹائر کا بغور معائنہ کرنے کی عادت آپ کو بہت سے مسائل سے بچا سکتی ہے۔ اس معائنے کے دوران گاڑی کے ٹائر پر کٹے پھٹے نشانات ہر گز نظر انداز نہ کریں بلکہ ان کے فوری سدباب کا بندوبست کریں۔