وڈیو –گاڑیوں کی تاخیر سے ڈلیوری، خریدار ایم جی حکام پر برس پڑے
MG موٹرز پاکستان نے مناسب قیمت اور زبردست فیچرز رکھنے والی ایس یو وی MG HS لانچ کر کے مارکیٹ میں تہلکہ مچا دیا تھا۔ پچھلے چند مہینوں میں کمپنی نے پاکستان میں اپنی ہزاروں گاڑیاں فروخت ہونے کا دعویٰ کیا ہے۔ اور اس کا جشن منانے کے لیے انتظامیہ نے مختلف شہروں بشمول فیصل آباد، سیالکوٹ اور اسلام آباد میں کیک بھی کاٹے۔ یہ بات قابلِ ذکر ہے کہ MG پاکستان CBU یونٹس فروخت کر رہا ہے کیونکہ اس نے ابھی تک گاڑیوں کی لوکل اسمبلی/مینوفیکچرنگ شروع نہیں کی۔ البتہ ایسا لگتا ہے کہ اسے گاڑیوں کی وقت پر فراہمی میں مسائل کا سامنا کرنا پڑ رہا ہے۔ اور لوگ جنہوں نے گاڑیاں بُک کروا رکھی ہیں، خوش نظر نہیں آتے۔
سوشل میڈیا پر گردش کرتی ایک حالیہ وڈیو میں ناراض صارفین کو MG موٹر لاؤنج، لاہور میں انتظامیہ سے بحث کرتے ہوئے دیکھا جا سکتا ہے۔ خریدار اپنی MG گاڑیوں کی فراہمی کا مطالبہ کر رہے ہیں کہ جس کی وہ پوری ادائیگی کر چکے ہیں۔ ایک صارف نے کہا کہ MG نے مارچ میں ڈلیوری کا وعدہ کیا تھا لیکن انہیں ابھی تک گاڑی نہیں ملی۔
صارف نے کہا کہ “MG نے ہم سے مکمل ادائیگی لے لی ہے اور ڈلیوری نہیں دی جا رہی۔” ناراض صارفین نے گاڑیوں کی فوری ڈلیوری کا مطالبہ کیا۔
وڈیو دیکھیں:
دوسری وڈیو:
دوسری وڈیو میں MG ڈیلرشپ پر ایک مجمع دیکھا جا سکتا ہے جس کے پاس اپنے پرچَیز آرڈرز ہیں۔ البتہ ڈلیوری کے لیے گاڑی کوئی موجود نہیں۔
ہمارے ذرائع کے مطابق MG نے اوور بُکنگ کی ہے۔ کئی کیسز ایسے ہیں جن میں لوگوں سے ادائیگی لے لی گئی ہے یہاں تک کہ پیشگی پوری پیمنٹ بھی لی گئی ہے اور اب وہ ڈلیوری نہیں کر سکتے، جس سے معاملات مزید خراب ہی ہوں گے۔ ہمیں معلوم ہے کہ وبا کی وجہ سے دنیا بھر میں مسائل ہیں لیکن کمپنیز کو خریدار کے سامنے معاملات واضح رکھنے چاہئیں اور مختلف حیلے بہانوں سے ان کی رقم نہیں ہتھیانی چاہیے۔
اس وقت معاملات واضح نہیں ہیں۔ یہ بھی خبریں ہیں کہ CBU بکنگ بند ہو چکی ہے، لیکن ڈیلرز اب بھی MG HS کے آرڈرز لے رہے ہیں، اور نہ ڈیلر جانتا ہے اور نہ خریدار کو پتہ ہے کہ اسے کیا ملے گا، ایک CBU یا ایک CKD اور کب۔ یہ ابہام صارفین میں مزید کنفیوژن کی وجہ بن رہا ہے۔ ذرائع کا مزید کہنا ہے کہ کمپنی اب CKD یونٹس فراہم کرے گی، لیکن اس صورت میں صارفین کو کم از کم ایک سال کا انتظار کرنا پڑے گا، وہ بھی اس تب کہ جب MG آج اپنی پروڈکشن شروع کر دے۔
اس کے علاوہ یہ خبریں بھی ہیں کہ MG گاڑیاں ملک کی مختلف ڈیلر شپس پر ‘آن منی’ پر فروخت کی جا رہی ہیں۔ خبروں کے مطابق MG خریدار اس پر ناراض ہیں کیونکہ اسی لیے انہوں نے پیشگی مکمل ادائیگی کی تھی لیکن پھر بھی انہیں گاڑی نہیں مل پائی؛ جبکہ گاڑیاں مختلف ڈیلر شپس پر پریمیم پر مل رہی ہیں۔
گاڑیاں کب ڈلیور کی جائیں گی؟
ہمارے ذرائع کے مطابق MG کی 1910 گاڑیاں کراچی پورٹ پر موجود ہیں اور وہ مئی 2021 میں صارفین کو فراہم کی جائیں گی۔ اس کے علاوہ ذرائع کا کہنا ہے کہ HS کی تشخیص کی گئی ویلیو 11,000 سے 13,000 ڈالرز ہے کہ ڈیوٹی میں تقریباً 3,30,000 کا اضافہ ہوگا۔
قیمت میں متوقع اضافہ:
ذرائع نے دعویٰ کیا ہے کہ امپورٹ ڈیوٹی بڑھنے کی وجہ سے MG جون 2021 اور دسمبر 2021 میں گاڑی کی قیمتوں میں اضافہ کرے گا۔ اس کا مطلب ہے کہ قیمتوں میں دو اضافے متوقع ہیں۔
MG کا جواب:
پچھلے مہینے MG موٹرز نے ایک بیان جاری کیا تھا جس میں کہا گیا تھا کہ گاڑی کی ڈلیوریز عالمی کووِڈ-19 وبا کی وجہ سے تاخیر کا شکار ہو رہی ہیں: جس سے سپلائی چَین متاثر ہو رہی ہے اور عالمی ٹرانسپورٹیشن بحران نے جنم لیا ہے۔
اس کے علاوہ حالیہ بیان میں کمپنی اپنے صارفین کو بتا رہی ہے کہ ان کی اپریل کی ڈلیوریز مزید ایک مہینے کے لیے تاخیر کا شکار ہیں۔ یہاں بھی وبا کو تاخیر کا ذمہ دار قرار دیا گیا۔
البتہ براہ راست رابطہ کرنے پر MG موٹرز کے حکام نے پاک ویلز کے سوال کا جواب نہیں دیا۔
اس مسئلے کے بارے میں آپ کی رائے کیا ہے؟ کیا آپ MG گاڑیوں کی ڈلیوری میں تاخیر سے متاثر ہوئے ہیں؟