گاڑیوں اور موٹر سائیکل سے متعلق سال 2015 کے بہترین مضامین

640x360b

بالآخر سال 2015 اختتام پذیر ہوا۔گزشتہ 12 ماہ کے دوران گاڑیوں اور موٹر سائیکل کے شعبے سے متعلق کئی ایک دلچسپ خبریں، مضامین، بلاگز، انفوگرافکس، ویڈیوز وغیرہ قارئین نے یہاں پڑھے۔ اس سال پاکستان کے متعلقہ مقامی شعبے میں بھی کافی ترقی نظر آئی۔ ٹویوٹا کرولا کی تمام گاڑیوں پر سبقت برقرار رہی، یاماہا نے پاکستان میں نئی بائیک متعارف کروائیں اور تو اور کئی ایک غیر ملکی کار ساز اداروں، بشمول یورپی کمپنیز نے حکام سے پاکستان میں سرمایہ کاری کرنے کی خواہش بھی ظاہر کی۔ اس کے علاوہ آٹو پالیسی میں تاخیر اور مقامی طور پر گاڑیاں تیار کرنے والے اداروں سے متعلق بھی بہت کچھ لکھا گیا۔

یہاں ہم پورے سال کا مختصراً احاطہ کرتے ہوئے چند تحاریر پیش کر رہے ہیں جنہیں گاڑیوں اور موٹر سائیکل کے شوقین افراد سمیت قارئین کی بڑی تعداد نے پسند کیا۔ تو آئیے شروع کرتے ہیں سال 2015 کی سب سے بڑی خبر یعنی ہونڈا سِوک 2016 کی آمد سے۔

ہونڈا پاکستان نئی سِوک 2016 کی قیمت پرانی سِوک کے مساوی رکھے گی

دسویں جنریشن کی ہونڈا سِوک 2016 تقریباً پورا سال ہی شائقین کی نظروں کی مرکز نگاہ بنی رہی۔گو کہ نئی ہونڈا سِوک کو سال کے آخری سہ ماہی میں متعارف کروایا گیا تاہم آمد سے قبل خفیہ تصاویر اور ویڈیوز کے ذریعے اس کا چرچہ ہوتا رہا۔ اور جب یہ ایک بار پیش کردی گئی تو پھر اس کی شہرت آسمانوں سے باتیں کرنے لگی۔ البتہ پاک سر زمین پر صورتحال بالکل مختلف رہی۔ پاکستان میں دستیاب پرانی ہونڈا سِوک کو گیارہویں جنریشن کی ٹویوٹا کرولا سے سخت مقابلے کا سامنے کرنا پڑا جو بالآخر سِوک کی شکست پر منتج ہوا۔ عالمی سطح پر سِوک کی آمد کے بعدہونڈا کے پاکستانی شائق بھی اس سے متعلق گفتگو کرتے نظر آئے جس کے بعد ہونڈا ایٹلس کی جانب سے سِوک 2016 کی پاکستان میں پیش کش کے بارے میں بھی چہ مگوئیاں شروع ہوئیں۔اس ضمن میں سب سے دلچسپ خبر یہ رہی کہ پاکستان میں پیش کی جانے والی نئی سِوک کی قیمت اس وقت پاکستان میں دستیاب نویں جنریشن سِوک کے مساوی ہی رکھی جائے گی۔
Walk-around-2016-Civic-sedan-(10)

پاک سوزوکی: کلٹس کا دور ختم؛ سوزوکی سلیریو آیا چاہتی ہے!

سوزوکی کلٹس کو تقریباً ایک دہائی قبل مشہور زمانہ سوزوکی خیبر کے متبادل کی حیثیت سے پیش کیا گیا تھا۔ گاڑیوں کی درآمدات میں اضافے کا براہ راست اثر پاک سوزوکی کی گاڑیوں پر بھی پڑا جن میں سوزوکی کلٹس بھی شامل ہے۔ گزرے وقتوں کی اس گاڑی کی فروخت میں مسلسل گراوٹ کے بعد پاک سوزوکی نے اسے نستباً بہتر برانڈ سے تبدیل کرنے کا فیصلہ کر ہی کیا۔ پاک سوزوکی میں موجود ہمارے ذرائع کا کہنا ہے کہ پاک سوزوکی کلٹس کی تیاری بند کر کے سوزوکی سلیریو پیش کرنے جا رہی ہے۔

YBR کے ذریعے یاماہا کی پاکستانی مارکیٹ میں شمولیت

پاکستان میں موٹر سائیکل چلانے والوں کی بڑی تعداد موجود ہے۔ ایک عرصے سے یہ شعبہ کسی نئی برانڈ کا منتظر تھا اور یاماہا جاپان نے اپنی مشہور YBR125 پیش کر کے بائیک کے شوقین افراد کی انتظار کی گھڑیوں کو ختم کیا۔ یاماہا کی آمد شعبے کے لیے تازہ ہوا کا جھونکا ثابت ہوئی اور بالآخر کوئی ایسی برانڈ مارکیٹ میں آئی جو ایٹلس ہونڈا کا مقابلہ کرسکتی ہے۔ ایک بات حتمی ہے اور وہ یہ کہ موٹر سائیکل کے شعبے میں سوزوکی اپنے ہم وطن ہونڈا کا مقابلہ نہیں کرسکتا تھا۔ ایٹلس ہونڈا پاکستان میں کئی دہائیوں سے انتہائی غیر معیاری موٹر سائیکلیں فروخت کر رہا ہے۔ صرف ہونڈا CG125 ہی کی مثال لے لیں جو 40 سال پرانی ہوچکی ہے۔ یاماہا کی نئی اور جدید بائیک نہ صرف اپنے انداز میں خوبصورت ہیں بلکہ ہونڈا کے مقابلے میں ان کا معیار بھی بہت اچھا ہے۔ سونے پہ سہاگا یہ کہ YBR کی شاندار کامیابی کے بعد یاماہا مزید ماڈلز پیش کرنے کی تیاری کر رہا ہے۔

پاکستان میں سوزوکی کزاشی پیش کی گئی

عام طور پر مختصر گاڑیاں ہی پاکستان میں سوزوکی کی وجہ شہرت رہی ہیں۔ شاید یہی وجہ ہے کہ جب پاکستان میں سوزوکی کزاشی پیش کی گئی تو لوگوں نے حیرانگی کا اظہار کیا۔ پاک سوزوکی نے 11 فروری 2015 کو کزاشی متعارف کروانے کے لیے خصوصی تقریب کا اہتمام کیا۔ کزاشی پیش کرنے کے مقاصد میں پاک سوزوکی کے تصور کو بہتر بنانا اور مارکیٹ میں دستیاب یکساں گاڑیوں کا بہتر متبادل پیش کرنا بھی تھا۔ سوزوکی کزاشی پیش کرتے ہوئے کہا گیا کہ گاڑی کی متعدد خصوصیات میں سے ایک اس کی قیمت بھی ہے جو دیگر ہم پلہ گاڑیوں سے تقریباً نصف ہوگی۔ لگ بھگ 50 لاکھ روپے والی اس گاڑی کو پاکستان میں زیادہ شہرت حاصل نہیں ہوئی۔

ہونڈا پاکستان کی جانب سے نئی سِٹی پیش کرنے میں تاخیر

اس وقت پاکستان کی سڑکوں پر بھاگتی دوڑتی نظر آنے والی ہونڈا سِٹی کا تعلق پانچویں جنریشن ہے جسے 2008 میں پیش کیا گیا تھا۔ تب سے آج تک ہونڈا ایٹلس وہی گاڑی فروخت کر رہا ہے۔ عالمی دنیا میں سٹی کی نئی (چھٹی) جنریشن اب سے دو سال قبل یعنی 2013 میں متعارف کروائی گئی تھی۔ لیکن قابل افسوس امر ہے کہ ہونڈا ایٹلس نے اسے پاکستان میں پیش کرنے میں تاخیر کا فیصلہ کیا جس کی ممکنہ وجوہات میں سے ایک نئے ماڈل کی پیش کش میں کثیر سرمائے کی ضرورت ہے۔ شاید ہونڈا ایٹلس کے ماہرین نے مارکیٹ کو دیکھتے ہوئے نئی ہونڈا سِٹی کی آمد کے فوائد و نقصانات کو دیکھتے ہوئے یہ فیصلہ لیا ہوگا۔ بہرحال، موجودہ صورتحال میں تو ایسا معلوم ہوتا ہے پاکستان میں نئی سِٹی کی آمد جلد متوقع نہیں۔

Honda_City_(sixth_generation)

ہونڈا CG125 بمقابلہ یاماہا YBR125

یاماہا کی جانب سے سال 2015 میں پیش کی جانے والی YBR125 کا حقیق مقابلہ مشہور و معروف ہونڈا CG125 سے تھا۔ ہونڈا CG125 طویل عرصے سے تیار و فروخت کی جارہی ہے۔ جبکہ YBR نہ صرف اپنے انداز بلکہ ٹیکنالوجی کے اعتبار سے بھی جدید ہے۔ یہ ہماری خوش قسمتی ہے کہ ہمارے ایک ساتھی نے YBR خریدی اور اپنے ذاتی تجربے کی روشنی میں اس کا CG125 سے موازنہ کیا۔ ان دونوں 125 سی سی موٹر سائیکلوں سے متعلق تفصیلی مضمون آپ بالا عنوان یا ذیل میں موجود تصویر پر کلک کر کے پڑھ سکتے ہیں۔

جاپانی گاڑی کی نیلامی شیٹ کا جائزہ

مالی سال 2015-2016 کے دوران گذشتہ سال کے مقابلے میں گاڑیوں کی درآمدات تقریباً دوگنا ہو چکی ہے۔ مقامی کار ساز ادارے بھی کافی ترقی کر رہے ہیں جس سے پاکستان میں گاڑیوں کا شعبہ مجموعی طور پر بھی بہتری کی جانب گامزن نظر آرہا ہے۔ ملک میں کئی ایک ادارے اور شخصیات گاڑیاں درآمد کر کے فروخت کر رہے ہیں۔ اگر آپ بھی جاپانی گاڑی میں دلچسپی رکھتے ہیں تو ضروری ہے کہ آپ نیلامی میں خریدی جانے والی گاڑی کی مکمل تفصیلات سے واقف ہوں۔ اور انہی تفصیلات کو سمجھنے کا بہترین طریقہ “آکشن شیٹ” ہے۔ ہمارے ایک بلاگر نے گاڑی درآمد کرنے سے متعلق بلاگ سیریز کے دوران اس اہم معاملہ پر بھی مفصل روشنی ڈالی ہے۔ اس مضمون کو پڑھ کر آپ کسی بھی جاپانی گاڑی کی حالت کا بخوبی اندازہ لگا سکیں گے۔

دسویں جنریشن کی ہونڈا سِوک 2016 کی باضابطہ پیش کش

اور آخر میں اس خبر کا ذکر جس نے دنیا کی کثیر آبادی کو اپنی طرف متوجہ کیا۔ جی ہاں!ہونڈا کی جانب سے سِوک کی دسویں جنریشن متعارف کروانے کے لیے لاس اینجلس، کیلی فورنیا میں تقریب ہوئی تو نہ صرف ہونڈا کے شائقین بلکہ گاڑیوں میں ذرا بھی دلچسپی رکھنے والے شخص کی نظریں یوٹیوب کے ذریعے نئی سِوک 2016 کو دیکھ رہی تھیں۔ سِوک 2016 کو ہونڈا امریکا نے خود ہی تیار کیا ہے یوں یہ پہلا موقع ہے کہ جاپانی کار ساز ادارے کی مشہور ترین برانڈ بیرون ملک تیار کی گئی ہو۔ اپنی آمد کے ساتھ ہی ہونڈا سِوک نے نہ صرف شائقین بلکہ مبصرین کے دلوں کو بھی فتح کرلیا۔ پاکستان میں نئی سِوک کی آمد رواں سال ماہِ ستمبر میں متوقع ہے۔

یہ ہیں چند خبریں، مضامین اور بلاگز وغیرہ جنہیں ہمارے قارئین نے پسند کیا۔ ہم امید کرتے ہیں کہ سال 2016 ہمارے لیے متعدد اچھی خبروں اور مثبت سرگرمیوں سے بھرپور ہوگا۔

Top