ہونڈا سِوک 2016 آسان ماہانہ اقساط پر حاصل کرنے کا طریقہ

2016 Honda Civic

نئی ہونڈا سوک 2016 بالآخر پاکستان میں پیش کی جاچکی ہے۔ باوجودیکہ ہونڈا ایٹلس نے اب تک سوائے چند خوش نصیبوں کے کسی اور کو اس دیدار نہیں کروایا لیکن اطلاعات کے مطابق اب تک ہزاروں افراد سِوک 2016 کی بُکنگ کرواچکے ہیں۔ اگر آپ بھی اس نئی سِوک کو حاصل کرنے کے خواہش مند ہیں تو آئیے ہم آپ کو بتاتے ہیں کہ بینک کے ذریعے کس طرح آسان ماہانہ اقساط پر اسے حاصل کیا جاسکتا ہے۔

یہ بھی پڑھیں: ہونڈا ایٹلس نے سِوک 2016 کی تعارفی قیمت کا اعلان کردیا

کونسی دستاویزات درکار ہوں گی؟

سِوک 2016 کے حصول کے لیے کسی بھی بینک کو درخواست کے ساتھ چند اہم دستاویزات بھی فراہم کرنا ہوں گی۔ اگر آپ ملازمت پیشہ ہیں تو درج ذیل دستاویزات کی دستیابی یقینی بنائیں:
1) قومی شناختی کارڈ کی نقل
2) 2 پاسپورٹ سائز حالیہ تصاویر
3) ماہانی تنخواہ کی آخری رسید
4) گزشتہ 3 تا 6 ماہ کے بینک گوشوارے
5) کم از کم ایک سال مدت ملازمت کی تصدیق

اور اگر آپ ذاتی کاروبار کرتے ہیں تو درج ذیل دستاویزات فراہم کرنا ہوں گی:
1) قومی شناختی کارڈ کی نقل
2) 2 پاسپورٹ سائز حالیہ تصاویر
3) کاروبار کی مصدقہ معلومات
4) گزشتہ چھ ماہ کے بینک گوشوارے
5) حقوق ملکیت کی سند
6) قومی ٹیکس رجسٹریشن نمبر (NTN) اور سند
7) گزشتہ دو سالوں کے ٹیکس گوشوارے

ان دستاویزات کے ساتھ کسی بھی بینک کی قریبی شاخ پر جائیں اور درخواست پُر کر کے ان دستاویزات کے ہمراہ جمع کروادیں۔ ہر بینک اپنے قوانین و طریقہ کار کے مطابق موصول ہونے والی درخواستوں کو پرکھتا ہے اور پھر انہیں منظوری کرنے یا رد کیے جانے کا فیصلہ کرتا ہے۔ اس تمام کاروائی میں تقریباً 15 روز صرف ہوسکتے ہیں لہٰذا کچھ دن انتظار کرنے کے لیے پہلے سے تیار رہیں۔

یہ بھی پڑھیں: پاکستان میں ہونڈا سِوک 2016 بُک کروانے کا طریقہ

درخواست گزار کی اہلیت کیا ہونی چاہیے؟

دیگر املاک کی طرح گاڑی کی آسان اقساط پر حصولی کے لیے بھی اہلیت کے معیارات متعین ہے۔ ان میں پاکستان کا شہری ہونا بھی شامل ہے جو ملازمت پیشہ اور کاروبار افراد دونوں ہی کے لیے ضروری ہے۔ اس کے علاوہ ملازمت پیشہ افراد کے لیے عمر کی حد 22 تا 60 سال جبکہ کاروباری شخصیات کے لیے عمر کی حد 22 تا 70 سال مقرر ہے۔ ملازمت پیشہ افراد کے لیے ایک اضافی اہلیت کم از کم تنخواہ سے بھی منسوب ہے تاہم اس حوالے سے ہر بینک کی مختلف پالیسی ہے۔

پیشگی رقم کسے ادا کرنا ہوگا؟ بینک یا ہونڈا ایٹلس۔۔۔

بینک کے ذریعے ہونڈا سِوک 2016 کے حصول میں بیعانہ کی ادائیگی سب سے پریشانی والا مرحلہ ہے۔ چونکہ ہونڈا ایٹلس بھی سِوک کی بُکنگ پر 50 فیصد قیمت پیشگی وصول کر رہا ہے اور بینک بھی بیعانہ لے رہا ہے تو اکثر صارفین اس حوالے سے الجھن کا شکار نظر آتے ہیں کہ پیشگی رقم کسے اور کتنی ادا کرنی ہوگی؟ اس حوالے سے میں نے اپنے بینک سے رابطہ کیا تو انہوں نے تصدیق کی کہ بینک سے گاڑی لینے کی صورت میں صرف بینک ہی کو پیشگی رقم ادا کرنا ہوگی جو سِوک کی کُل قیمت کا 20 سے 50 فیصد ہوگی۔

بیعانہ کی کُل رقم کتنی ہوگی؟

ہونڈا سوک 1.8 اوریئل کے لیے 5 لاکھ روپے سے 12 لاکھ 70 ہزار روپے تک کی رقم بینک کو ادا کرنا ہوگی۔ جبکہ ہونڈا سوک 1.5 ٹربو کے لیے 5 لاکھ 80 ہزار سے 14 لاکھ 50 ہزار تک رقم بینک میں پیشگی جمع کروانا ہوگی۔ بینک کو رقم موصول ہوتے ہی ہونڈا ایٹلس (Honda) کو آپ کے لیے نئی ہونڈا سِوک بُک کرنے کی درخواست ارسال کردی جائے گی۔

ہر ماہ کتنی رقم بینک کو ادا کرنا ہوگی؟

ماہانہ اقساط کا تعین مختلف عوامل پر منحصر ہے جن میں گاڑی کی کُل قیمت، اقساط کی تعداد، بیعانہ کی شرح، پیشگی ادائیگی وغیرہ شامل ہیں۔ اتنے سارے عوامل کی روشنی میں اس بات کا پہلے سے اندازہ لگانا کافی مشکل ہے کہ آپ کو ہر ماہ کتنی رقم بینک کو ادا کرنا ہوگی۔ البتہ پاک ویلز پر موجود جدید کار لون کیلکولیٹر کی مدد سے آپ اس حوالے سے ضرور مدد حاصل کرسکتے ہیں۔ پاک ویلز لون کیلکولیٹر استعمال کرنا بہت ہی آسان ہے۔ بس Car Finance کے صفحے پر جا کر اپنی پسندیدہ گاڑی سے متعلق معلومات فراہم کریں،اپنی سہولت کے مطابق دورانیہ اور بعیانہ کی رقم منتخب کریں اور ماہانہ اقساط و دیگر معلومات حاصل کریں۔

آخر میں واضح کرتا چلوں کہ یہ مضمون عام آدمی کو مدنظر رکھتے ہوئے صرف بنیادی معلومات فراہم کرنے کے لیے لکھا گیا ہے۔ مختلف مراحل کے دوران بینک یا کار ساز ادارے کی جانب سے اضافی معلومات، دستاویزات یا دیگر متعلقہ مواد بھی طلب کیا جاسکتا ہے۔ لیکن چونکہ ایسا صرف مخصوص وجوہات کی بنیادی پر صارف کی اہلیت دیکھتے ہوئے کیا جاتا ہے اس لیے یہاں اس کا احاطہ کرنا ممکن نہیں ہے۔ اس حوالے سے اگر کوئی سوال پوچھنا چاہیں تو ذیل میں موجود تبصرہ خانے سے لکھ بھیجیے، ہماری کوشش ہوگی کہ اس ضمن میں اپنے قارئین کو ہر ممکن رہنمائی فراہم کی جاسکے۔

Adan Ali

Adan is a Tribe Leader at Drive Tribe, who writes to share his passion for cars, culture and gadgetry through words. So far his writings and contributions have been able to make their way to media outlets like PakWheels and Dawn. Reach out to him by tweeting @adanali12

Top