گاڑی کے اندرونی حصے کو صاف رکھنے کے لیے چند تجاویز

astonish

پاکستان میں گاڑی کی صفائی ستھرائی کے لیے بہت سی سروسز دستیاب ہیں۔ آپ کو ہر بڑے شہر میں درجنوں ادارے مل جائیں گے جو آپ کی گاڑی کو چمچماتی سواری کا روپ دینے کے لیے ہمہ وقت تیار رہتے ہیں۔ فیس بک اور دیگر ویب سائٹس پر بھی اس حوالے سے اشتہارات اکثر نظر آتے رہتے ہیں۔ یہ خدمات فراہم کرنے والے ادارے گاڑی کو اندرونی اور بیرونی صفائی کرتے ہیں کیوں کہ گاڑی کی نشستیں، ڈیش بورڈ اور اندر موجود دیگر چیزوں کی صفائی بھی اتنی ہی ضروری ہے کہ جتنی گاڑی کے رنگ کی دیکھ بھال اہم ہے۔

گاڑی کی صفائی و ستھرائی فراہم کرنے کی خدمات کافی مہنگی ہوتی ہیں اور بہت سے افراد کے لیے بار بار ان سے فیضیاب ہونا ممکن نہیں ہوتا۔ جو لوگ ان کی خدمات حاصل کر کے اپنی گاڑی صاف کرواتے ہیں ان کی بھی یہی خواہش ہوتی ہے کہ سواری ہمیشہ ایسی ہی صاف ستھری نظر آئے۔ اس لیے ضروری ہے کہ کم از کم ہفتے میں ایک بار آدھا، پونا گھنٹہ نکال کر گاڑی کی صفائی کریں۔ ان میں سب سے پہلے گاڑی کے اندرونی حصے کی صفائی کرنی چاہیے تاکہ آپ کا سفر اچھا رہے۔ گاڑی کا اندرونی حصہ صاف رکھ کر آپ ان وجوہات سے محفوظ رہ سکتے ہیں جن سے آپ کو اکتاہٹ اور تھکن محسوس ہوتی ہو۔

گاڑی کی صفائی میں استعمال ہونے والی مصنوعات دیکھنے کے لیے یہاں کلک کریں

کیبن کی صفائی

یہ نستباً آسان اور کم وقت طلب کام ہے۔ کیبن کی باقاعدگی کے ساتھ صفائی مختلف حصوں کو گرد آلود ہونے سے محفوظ رکھتی ہے۔ سب سے پہلے گاڑی کے فرش پر بچھے قالین کو باہر نکال کر اچھی طرح صاف کریں اور پھر فرش پر جمی مٹی کو ہٹائیں۔ صفائی میں جتنا زیادہ وقفہ ہوگا اتنا ہی زیادہ مٹی اور میل چمکنے کا امکان رہے گا۔ کونوں کھدروں کا خاص خیال رکھیں اور وہاں جمی گندگی ضروری صاف کریں۔ اگر ضرورت ہو ویکیوم کلینر بھی استعمال کرسکتے ہیں۔

VacuumCarFloor

کپڑے کی نشستوں کی صفائی

عام مارکیٹ میں گاڑیوں کی نشستیں (سیٹ) صاف کرنے کے لیے مختلف مصنوعات دستیاب ہیں۔ ان میں سے کسی بھی اچھی برانڈ کا محلول خرید لیں یا چاہیں تو کپڑے دھونے والے پاؤڈر کو نیم گرم پانی میں گھول کر اپنے گھر پر ہی تیار کرلیں۔ اگر سیٹ کوور پر گہرے دھبے ہیں تو محلول میں لہسن کا استعمال کیجیے۔ البتہ لہسن کی بو دور کرنے کے لیے بعد از استعمال اچھی طرح صاف کرنا ضروری ہے۔ محلول سے صاف کرنے کے بعد بال خشک کرنے والی مشین (ہئیر ڈرائیر) سے سکھا بھی سکتے ہیں۔

Spot-Clean-Car-Upholstery

چمڑے کی نشستوں کی صفائی

اگر گاڑی کی نشستوں پر چمڑے کا استعمال کیا گیا ہے تو اسے صاف کرنا کافی مشکل ثابت ہوسکتا ہے۔ سب سے پہلی تو یہ جان لیں کہ چمڑے پر کسی قسم کا کوئی محلول استعمال نہیں کرنا۔ اس کے لیے معیاری مصنوعات مارکیٹ میں دستیاب ہیں جو چمڑے کے لیے خاص طور پر بنائی جاتی ہیں۔ جتنا گڑ ڈالیں گے اتنا میٹھا ہوگا کہ مصداق جتنی مہنگی مصنوعات خریدیں گے وہ اتنی ہی اچھی صفائی بھی کرے گی۔ چمڑے کی صفائی کرتے ہوئے خاص خیال رکھنا چاہیے کہ اس پر کسی قسم کے نشانات نہ بن جائیں۔ آئل اور موم سے تیار ہونے والی ان مصنوعات کے پیچھے طریقہ استعمال بھی درج ہوتا ہے لیکن عام طریقہ کار یہ ہے کہ چمڑے کو پہلے گیلے کپڑے سے صاف کریں، اس کے بعد خریدی گئی مصنوعات استعمال کریں پھر نرم کپڑے سے صاف کرلیں۔

Clean-Car-Leather-Seats

ڈیش بورڈ کی صفائی

اس کے لیے آپ کو لمبے لیکن نرم بالوں والا برش درکار ہوگا۔ اگر چاہیں تو ویکیوم کلینر کا برش بھی استعمال کرسکتے ہیں۔ اس کے علاوہ مارکیٹ میں بھی متعدد مصنوعات اس کام کے لیے دستیاب ہیں جن سے نہ صرف ڈیش بورڈ کی صفائی ممکن ہے بلکہ اسے پالش کر کے چمکایا بھی جاسکتا ہے۔ اگر آپ کے ڈیش بورڈ پر مٹی یا میل جمی ہوئی ہے تو اسے کسی چیز سے کھرچنے کے بجائے سخت بالوں والے برش سے صاف کریں۔ پہلے کوشش کریں کہ نرم برش سے ہی صفائی ہوسکے لیکن اگر ایسا نہ ہو تو میل کو نرم کرنے کے لیے معیاری اسپرے استعمال کریں اور پھر اسے سخت برش یا کپڑے کی مدد سے صاف کرلیں۔

cleaning-brush-for-car-dashboard

یہ چیدہ چیدہ باتیں ہیں جو گاڑی کے اندرونی حصے کی صفائی میں آپ کی رہنمائی کے لیے بیان کی گئی ہیں۔ یہ کام آسان ہے اور اس کا نتیجہ بھی آپ کو فوراً نظر آجائے گا۔ ہفتہ وار چھٹیوں میں اس بار ان پر عمل کر کے دیکھیں اور پھر ہمیں بتائیں کہ کیا نتیجہ نکلا؟ یا اگر آپ اپنی گاڑی کی صفائی خود ہی کرتے چلے آرہے ہیں تو اپنے تجربات ہم سے ضروری شیئر کریں۔

I am a visual communications artist, I use arts and visual content to tell automotive stories to people.

Top