جولائی 2016: گاڑیوں کی مجموعی فروخت میں کمی!

sale down

سال 2016 اب تک گاڑیوں کے شعبے کے لیے کافی خوشگوار رہا ہے۔ سال کے آغاز میں ہونڈا ایٹلس پاکستان کی جانب سے HR-V متعارف کروائی گئی اور پھر جون / جولائی میں ہونڈا سِوک (Civic) کی رونمائی کا چرچہ زور شور سے جاری رہا۔ علاوہ ازیں ایک طرف چینی ادارے سے وابستہ الحاج FAW موٹرز نے مقامی سطح پر گاڑیوں کی تیاری شروع کرنے کی نوید سنائی تو دوسری طرف دیوان فاروق موٹرز کی جانب سے بھی ایک بار پھر پاکستان میں گاڑیوں کی تیاری سے متعلق خبریں گردش کرتی نظر آئیں۔ ایک روشن مستقبل کی جھلک دکھانے والی ان خبروں کے درمیان ایک حوصلہ شکن خبر یہ موصول ہوئی کہ گزشتہ سال جولائی 2015 کے مقابلے میں جولائی 2016 میں گاڑیوں کی فروخت 12 فیصد کم ہوئی ہے۔

یہ بھی پڑھیں: ہونڈا سِوک 2016 کے تینوں ماڈلز کا تفصیلی جائزہ

پاکستان آٹو موبائل مینوفیکچررز ایسوسی ایشن (پاما) کی جانب سے جاری ہونے والے تازہ اعداد و شمار کے مطابق رواں مالی سال کے پہلے ماہ میں فروخت ہونے والی گاڑیوں کی مجموعی تعداد 13,932 رہی۔ اس کے برعکس گزشتہ سال جولائی 2015 میں یہ تعداد 15,909 رہی تھی۔ گاڑیوں کی فروخت میں تقریباً 12 فیصد کمی آنے کی بڑی وجہ صوبہ پنجاب کی سبز ٹیکسی اسکیم کا اختتام بتایا جارہا ہے۔ یاد رہے کہ گزشتہ سال سبز ٹیکسی اسکیم کے تحت سوزوکی بولان اور سوزوکی راوی کی فروخت میں قابل ذکر اضافہ ہوا تھا۔ بعد ازاں سبز ٹیکسی اسکیم ختم ہونے کے بعد سوزوکی بولان کی فروخت میں 53.5 فیصد جبکہ سوزوکی راوی کی فروخت میں 51 فیصد کمی دیکھی گئی ہے۔ جولائی کے مہینے میں عید الفطر کی آمد اور نئے بجٹ کے نفاذ سے بھی گاڑیوں کی فروخت میں نمایاں کمی واقع ہوئی ہے۔

نئی ہونڈا سِوک آسان اقساط پر حاصل کرنے کے لیے یہاں کلک کریں

گاڑیوں کے شعبے پر خصوصی نظر رکھنے والے حمزہ رضا نے پاما کی تازہ رپورٹ پر روشنی ڈالتے ہوئے بتایا کہ اگر سوزوکی راوی اور بولان کی فروخت علیحدہ کردی جائے تو گاڑیوں کی فروخت میں 36 فیصد اضافہ ہوا ہے۔ پاک ویلز کی طرح حمزہ رضا بھی گاڑیوں کے شعبے سے اچھی امیدیں وابستہ کیے ہوئے ہیں۔انہوں نے کہاکہ سبز ٹیکسی اسکیم ختم ہوجانے کے باوجود مالی سال 2016-17 میں گاڑیوں کی فروخت میں اضافہ متوقع ہے جس کی بنیادی وجہ 1000cc سوزوکی سلیریو کی (ممکنہ) آمد اور ٹویوٹا کرولا کی بڑھتی ہوئی مانگ ہے۔ حمزہ رضا نے مزید کہا کہ نئی ہونڈا سِوک کی پیشکش اور بڑی تعداد میں بُک کیے جانے سے بھی ہونڈا گاڑیوں کی فروخت میں قابل قدر اضافے کا اندازہ لگایا جاسکتا ہے۔

Adan Ali

Adan is a Tribe Leader at Drive Tribe, who writes to share his passion for cars, culture and gadgetry through words. So far his writings and contributions have been able to make their way to media outlets like PakWheels and Dawn. Reach out to him by tweeting @adanali12

Top