عالمی منڈی میں خام تیل کی قیمت 50 ڈالر فی بیرل تک پہنچ گئی

crude-oil-price-up-urdu

رواں سال کے دوران پہلی بار عالمی منڈی میں خام تیل کی قیمت 50 ڈالر فی بیرل تک پہنچ گئی ہے۔ بہت سے ماہرین پہلے ہی اس اضافے کی پیش گوئی کر رہے تھے جس سے تیل پیدا کرنے والے ممالک کو زبردست فائدے کا امکان ہے تاہم یہ بات گاڑیاں اور موٹر سائیکل استعمال کرنے والوں پر ضرور گراں گزرے گی۔ گو کہ پچھلے کئی دنوں سے برینٹ خام تیل کی قیمت میں مسلسل اضافہ دیکھا جارہا تھا تاہم گزشتہ روز 15 سینٹ اضافے کے بعد اس نے سال 2016 کی بلند ترین سطح کو چھو لیا ہے۔

برینٹ خام تیل کی قیمتوں میں حالیہ اضافہ امریکا کی جانب سے تیل کی برآمد میں کمی اور کینیڈا، لیبیا اور نائیجیریا کی جانب سے تیل کی پیداوار متاثر ہونے کی وجہ سے ہوا ہے۔ نائیجیر میں تخریب کاری کی وجہ سے متعدد آئل پائپ لائنز کو شدید نقصان پہنچا ہے جبکہ کینیڈا کو جنگلات میں لگنے والی آگ کے بعد خراب موسم اور توانائی کے بحران کا سامنا کرنا پڑ رہا ہے۔دوسری جانب پٹرول برآمد کرنے والے ممالک کی عالمی تنظیم اوپیک (OPEC) اور روس کے درمیان رواں ماہ ہونے والے مذاکرات میں تیل کی پیداوار میں کمی کرنے کا فیصلے بھی خام تیل کی قیمت میں اضافہ کی وجہ بتایا جارہا ہے۔

یہ بھی پڑھیں: پیٹرول کی قیمت 40 روپے لیٹر ہونی چاہیئے: سندھ اسمبلی میں قرار داد منظور

یاد رہے کہ اب سے چند روز قبل آئل اینڈ گیس ریگولیٹر اتھارٹی (اوگرا) نے وزارت پیٹرولیم کو آئندہ ماہ (جون 2016) کے لیے پاکستان میں پیٹرولیم مصنوعات کی قیمتیں بڑھانے کی سفارش کی تھی۔اوگرا کی جانب سے پیٹرول پر 1.5 روپےفی لیٹر، ہائی اسپیڈ ڈیزل پر 3.8 روپے فی لیٹر، لائٹ ڈیزل پر 2.9 روپے فی لیٹر، ہائی آکٹین پر 5.6 روپے فی لیٹر جبکہ مٹی کے تیل کی قیمت میں 3.8 روپے اضافے کی تجویز دی گئی تھی۔ اب جبکہ عالمی منڈی میں تیل کی قیمتوں میں واضح تبدیلی رونما ہوئی ہے تو امکان ظاہر کیا جارہا ہے کہ پاکستان میں بھی پیٹرولیم مصنوعات کی قیمتوں میں اضافہ کیا جائے گا۔

رواں سال فروری 2016 میں خام تیل کی قیمتیں 13 سال کی کم ترین سطح 25 ڈالر فی بیرل تک گر چکی تھیں جس کے بعد پاکستان میں بھی تین بار تیل کی قیمتوں میں کمی کی گئی تھی۔ ملک میں رواں سال پیٹرولیم مصنوعات کی فی لیٹر قیمتوں کا خلاصہ درج ذیل ہے:

سال 2016 پیٹرول لائٹ ڈیزل ہائی اسپیڈ ڈیزل مٹی کا تیل ہائی آکٹین
جنوری 76.26 44.94 80.79 48.25 80.66
فروری 71.25 39.94 75.79 43.25 75.66
مارچ 62.77 37.97 71.12 43.25 72.62
اپریل 64.27 37.97 72.25 43.25 72.62
مئی 64.27 37.97 72.25 43.25 72.62
Asad Aslam

A PakWheeler with a degree in mass communication. He tweets as @masadaslam

Top