ڈائس آٹو 2016: پاکستان میں تیار شدہ آٹو پارٹس کی امریکا میں پہلی نمائش

dice-automotive-2016

پاکستان کی تاریخ میں پہلی بار مقامی سطح پر گاڑیوں کے پرزے تیار کرنے والے ادارے رہاستہائے متحدہ امریکہ میں اپنی مصنوعات کی نمائش کر رہے ہیں۔ ڈائس آٹو 2016 کے نام سے یہ نمائش امریکی ریاست مشی گن کے شہر ڈیٹرائٹ میں 25 مئی کو منعقد ہوگی۔ اس نمائش کا انعقاد غیر منافع بخش ادارے ڈائس فاؤنڈیشن اور پاکستان میں گاڑیوں اور موٹر سائیکل کے پرزے بنانے والے اداروں کی انجمن پاپام کے تعاون سے کیا جارہا ہے۔

اس نمائش میں شرکت کے لیے 14 پاکستانی اداروں کے 24 نمائندگان امریکہ پہنچ چکے ہیں۔ نمائش سے قبل یہ نمائندگان امریکی کار ساز اداروں فیات کرائسلر آٹو موبائلز (Fiat) اور فورڈ موٹر کمپنی (Ford) کے کارخانوں کا بھی دورہ کریں گے۔ پاپام کے نمائندگان امریکی اداروں کو نمائش میں شرکت کر کے پاکستانی اداروں کی مصنوعات دیکھنے کی دعوت بھی دیں گے۔

یہ بھی پڑھیں: گاڑیوں کے شعبے میں ترقی کے مواقع موجود ہیں: صدر ممنون حسین

پاپام کے اراکین امریکہ میں مقیم پاکستانیوں سے بھی ملاقات کریں گے اور انہیں اپنے وطن میں سرمایہ کاری کے لیے راغب کرنے کی کوشش کریں گے۔ پاپام کے سینئر نائب صدر اور وفد کے سربراہ مشہود علی خان نے انگریزی روزنامے ایکسپریس ٹریبیون سے بات کرتے ہوئے کہا کہ اس نمائش کے ذریعے پاکستانی ادارے امریکہ میں نئے کاروباری روابط قائم کرنے اور گاڑیوں کے پرزوں کی برآمدات میں اضافے کے لیے پُرامید ہیں۔

ڈائس آٹو 2016 میں شرکت کرنے والے اداروں میں فراز انڈسٹریز، مہران کمرشل انٹرپرائز، نور انجینئرنگ، رضی سنز، شیرانی انجینئرنگ، سِگما انڈسٹریز اور یوسف آٹو انڈسٹریز سمیت 14 پاکستانی ادارے شامل ہیں۔ یہ پاکستانی ادارے اپنی مدد آپ کے تحت اس نمائش کے لیے امریکہ گئے ہیں۔ حکومتِ پاکستان کی جانب سے انہیں کوئی مالی تعاون فراہم نہیں کیا گیا۔

Asad Aslam

A PakWheeler with a degree in mass communication. He tweets as @masadaslam

Top