نو منتخب امریکی صدر ڈونلڈ ٹرمپ کی رولز روئیس اور مرسڈیز گاڑیاں

Donald-Trump-cars-featured

چاہے آپ دنیا کے کسی بھی کونے میں ہوں اب تک ڈونلڈ ٹرمپ کے نام سے بخوبی واقف ہوچکے ہوں گے۔ یہ امریکا کے منتخب ہونے والے 45 ویں صدر ہیں جن کا تعلق ری پبلکن پارٹی سے ہے۔ حسب روایت ڈونلڈ ٹرمپ آئندہ سال 20 جنوری کو اپنے عہدے کا حلف اٹھائیں گے۔ ڈونلڈ ٹرمپ امریکا میں ایک کاروباری شخصیت اور میڈیا پرسنیلٹی کے طور پر بھی مشہور ہیں۔ ان کا دعوی ہے کہ وہ امریکا کے صدر بننے والے تمام امیدواروں سے زیادہ دولت مند ہیں۔ گو کہ ڈونلڈ ٹرمپ اپنی جائیداد کی مالیت 10 ارب ڈالر سے بھی زائد بتاتے ہیں لیکن آزاد ذرائع کے مطابق ان کی کل جائیداد لگ بھگ ساڑھے چار ارب ڈالر ہے۔

ارب پتی ڈونلڈ ٹرمپ شاہانہ انداز سے زندگی گزارنا پسند کرتے ہیں۔ مختلف شہروں میں خوبصورت عمارتوں، گالف کورس، ہوائی اور بحری جہازوں کے علاوہ نئے صدر کئی پرتعیش گاڑیوں کے بھی مالک میں۔ ذیل میں ایسی ہی چند گاڑیوں کا تعارف موجود ہے جس میں نومنتخب امریکی صدر نے نہ صرف سفر کیا بلکہ خود چلانے کا تجربہ بھی کیا۔ اس سے اندازہ لگایا جاسکتا ہے کہ 70 سالہ ڈونلڈ ٹرمپ پُرتعیش گاڑیوں بالخصوص رولز روئیس اور مرسڈیز کے کس قدر شوقین ہیں۔

ڈونلڈ ٹرمپ کی رولز روئیس گاڑیاں

1956 رولز روئیس سِلور کلاؤڈ

کہا جاتا ہے کہ ڈونلڈ ٹرمپ کی پہلی ذاتی گاڑی 1956 رولز روئیس سِولر کلاؤڈ تھی۔ اس سے اندازہ لگایا جاسکتا ہے کہ ڈونلڈ ٹرمپ اور رولز روئیس برانڈ کا تعلق کتنا پرانا ہے۔

Donald-Trump-Rolls-Royce-Silver-Cloud

2015 رولز روئیس فینٹم

ڈونلڈ ٹرمپ جیسی امیر شخصیات اکثر و بیشتر اپنے ڈرائیورز کے ہمراہ سفر کرتی ہیں لیکن 2015 رولز روئیس فینٹم وہ خوش قسمت گاڑی ہے کہ جسے ڈونلڈ ٹرمپ بذات خود چلانا پسند کرتے رہے۔ 6750cc انجن کی حامل اس رولز روئیس کی زیادہ سے زیادہ رفتار 453 ہارس پاور ہے جبکہ یہ صرف 6 سیکنڈ میں 0 سے 60 میل فی گھنٹہ کی رفتار پکڑ سکتی ہے۔

Donald-Trump-Rolls-Royce-Phantom

ڈونلڈ ٹرمپ کی مرسڈیز گاڑیاں

2003 مرسڈیز بینز SLR میکلرن

جس گاڑی کے نام میں بینز اور میکلرن دونوں ہی شامل ہوں، اس کی شان بیان کرنے کی ضرورت باقی نہیں رہتی۔ سال 2003 میں پیش کی جانے والی یہ اسپورٹس کوپے صرف 370 کی تعداد میں تیار کی گئی۔ اس کا V8 انجن 617 ہارس پاور اور 575 فٹ پاؤنڈ فراہم کرنے کی اہلیت رکھتا تھا۔ ڈونلڈ ٹرمپ کے زیر استعمال رہنے والی اس گاڑی کی قیمت لگ بھگ ساڑھے 4 لاکھ ڈالر تھی۔

Donald-Trump-Mercedes-Benz-SLR-McLaren

2015 مرسڈیز بینز S600 گارڈ

جب آپ دنیا کی سب سے بڑی طاقت کے صدر بننے جا رہے ہوں تو آپ کو طرز زندگی کے معیارات کے ساتھ حفاظت بھی بڑھانا پڑتی ہے۔ اور یہی وجہ ہے کہ ڈونلڈ نے S600 گارڈ کا انتخاب کیا جو اب تک تیار کی جانے والی جدید ترین گاڑیوں میں سے ایک کہی جاسکتی ہے۔ اس میں جیمز بانڈ کی منفرد گاڑی جیسی خصوصیات بھی شامل کی گئیں جن میں انتہائی حساس الارم سسٹ اور دیگر بھی شامل ہے۔اس میں 6000cc انجن شامل ہے جو 7-اسپیڈ گیئر کے ساتھ 500 ہارس پاور اور 523 فٹ پاؤنڈٹارک فراہم کرنے کی اہلیت رکھتا ہے۔ یہ گاڑی صرف 4.6 سیکنڈ میں 0 سے 60 میل فی گھنٹہ حاصل کرسکتی ہے جبکہ اس کی زیادہ سے زیادہ رفتار 155 میل فی گھنٹہ تک پہنچ سکتی ہے۔

Donald-Trump-Mercedes-Benz-S600-guard

ڈونلڈ ٹرمپ کی دیگر گاڑیاں

نو منتخب امریکی صدر اپنے ہی ملک کی کار ساز کمپنی جنرل موٹرز (GM) کی بھی گاڑیاں استعمال کرچکے ہیں۔ جنرل موٹرز نے صرف 500 ہی ایسی گاڑیاں بنائیں جن میں سے ایک ڈونلڈ ٹرمپ کو 100 ویں انڈیاناپولیس 500 میں چلانے کے لیے دی گئی تاہم وہ اپنی مصروفیات کے باعث ایسا نہ کرسکے۔ یہ گاڑی دراصل 1969 میں پیش کی جانے والی انڈی 500 کی ہی جدید نقل تھی۔ اس میں 6200cc کا انجن شامل تھا جو 426 ہارس پاور فراہم کرسکتا ہے۔ علاوہ ازیں ڈونلنڈ ٹرمپ کے گیراج میں 1993 کیڈیلاک ایلنتے بھی شامل رہ چکی ہے جسے اطالیہ میں تیار کیا گیا تھا۔ ایلانتے کے نام سے پیش کیے جانے والے اس آخری ماڈل میں 4600cc نارتھ اسٹار انجن شامل تھا جو 295 ہارس پاور فراہم کرنے کی اہلیت رکھتا تھا۔ آخر میں 24 کیرت گولڈ سے تیار کردہ کاؤنٹی چوپر کا ذکر بھی پڑھتے جائیے کہ جو ڈونلڈ ٹرمپ کے پاس رہی۔ اسے دیکھ کر اندازہ لگانا مشکل ہے کہ ڈونلڈ ٹرمپ نے چھوٹے پہیوں والی اس منفرد ڈیزائن کی موٹر سائیکل پر واقعی سفر کیا بھی ہے یا پھر یہ محض ایک شوپیس ہے؟

Asad Aslam

A PakWheeler with a degree in mass communication. He tweets as @masadaslam

Top