چین میں FAW سائیریس S80 کا نیا انداز متعارف

FAW Sirius S80

سائیریس S80 چینی کار ساز ادارے FAW کی سات نشستوں والی MPV ہے جو بڑے خاندان کے لیے دستیاب بہترین گاڑیوں میں سے ایک ہے۔ یہ دراصل ڈائی ہاٹسو ژینیا (Daihatsu Xenia) کی طرز پر بنائی گئی ہے۔ اسے چین میں FAW اور ٹویوٹا کے مشترکہ منصوبہ کے دوران تیار کیا گیا تھا۔ سال 2010 میں جب ڈائی ہاٹسو نے مشترکہ منصوبے سے الگ ہونے کا اعلان کیا تو FAW نے ژینیا MPV کا پلیٹ فارم خرید لیا۔ بعد ازاں اسی پلیٹ فارم سے سائیریس S80 کا وجود عمل میں آیا۔ ڈائی ہاٹسو ژینیا کو متعدد ممالک میں ٹویوٹا ایونزا (Toyota Avanza) کے نام سے بھی فروخت کیا جاتا رہا ہے۔

یہ بھی پڑھیں: سوزوکی کلٹس بمقابلہ FAW V2: کس میں کتنا ہے دم؟

چینی ادارے FAW کی سائیریس S80 دو مختلف انجن 1300cc اور 1500cc کے ساتھ پیش کی جاتی ہے۔ قیمت اور خصوصیات کے اعتبار سے یہ اپنی طرز کی دیگر گاڑیوں سے ممتاز ہے۔ پاکستان میں الحاج FAW موٹرز نے سائیریس S80 کو متعارف کروایا۔ اسی زمرے میں شامل ٹویوٹا ایونزا کی قیمت 28.49 لاکھ روپے جبکہ سوزوکی APV کی قیمت 24.18 لاکھ روپے ہے۔ دوسری طرف سائیریس 1300cc کی قیمت 17.05 لاکھ روپے اور 1500cc انجن کی حامل FAW سائیریس گرینڈ کی قیمت 18.55 لاکھ روپے ہے۔ اس سے اندازہ لگایا جاسکتا ہے کہ ان گاڑیوں کی قیمت میں کتنا زیادہ فرق ہے۔ صرف یہی نہیں، FAW سائیریس اپنے مدمقابل گاڑیوں کے مقابلے میں معیار اور خوبصورت انداز کی وجہ سے بھی منفرد ہے۔اس کے علاوہ پاکستان میں اسے تین سالہ / 60 ہزار کلومیٹر سفر تک کی وارنٹی کے ساتھ پیش کیا جاتا ہے جبکہ دیگر کار ساز ادارے اپنے صارفین کو اس قسم کی سہولت فراہم نہیں کر رہے۔

FAW Sirius S80 FAW Sirius S80FAW Sirius S80

حال ہی میں نئے انداز کی حامل FAW سائیریس S80 کو چین میں متعارف کروایا گیا ہے۔ اس کے اگلے حصے میں چند ایک تبدیلیوں کے علاوہ اندرونی حصے میں قابل ذکر تبدیلیاں کی گئی ہیں۔ اس کا ڈیش بورڈ، اسٹیئرنگ ویل،نشستیں، دروازے اور دیگرساز و سامان کو بالکل نیا ڈیزائن دیا گیا ہے۔ گاڑی کے پچھلے حصے کے نیچے چوکور لائٹس بھی شامل کی گئیں ہیں۔

سال 1953 سے گاڑیوں کے شعبے میں کام کرنے والا چینی ادارہ FAW عالمی سطح پر اپنی مارکیٹ کو وسعت دینے کے لیے کام کر رہا ہے۔ پاکستان میں بھی ان کی سرگرمیاں قابل تعریف ہیں۔ اب تک FAW V2 ہیچ بیک کی فروخت قابل ذکر رہی ہے اور امید ہے کہ نئی گاڑیوں اور ماڈلز کی آمد کے بعد مزید لوگوں کو اپنی طرف متوجہ کرنے میں کامیاب ہوجائے گی۔ اگر ایسا ہوا تو کوئی بعید نہیں کہ بہت جلد لوگ دہائیوں پرانی گاڑیوں کو خیرباد کہہ کر FAW کی جدید گاڑیوں کی طرف رجوع کریں۔ چونکہ گاڑی کا نیا ماڈل متعارف کروانے میں کافی وقت اور سرمایہ صرف ہوتا ہے اس لیے نئے انداز کی سائیریس و دیگر گاڑیوں کی پاکستان آمد میں تاخیر قابل سمجھ ہے۔

سائیریس (FAW Sirius S80) کی خوبصورت تصاویر پر مشتمل گیلری پیش خدمت ہے:

Usman Ansari

An automotive enthusiast associated with the animation industry since 15 years having worked with leading organizations and production facilities across Pakistan.

Top