سال 2017 میں پیش کی جانے والی 4 سیڈان گاڑیاں


محسوس ہوتا ہے کہ پاکستان میں گاڑیوں کے شعبے پر چھائے کالے بادل اب چھٹ رہے ہیں جس کے باعث نہ صرف استعمال شدہ گاڑیوں کی مارکیٹ میں تیزی دیکھی جارہی ہے بلکہ نئی گاڑیاں تیار کرنے والے ادارے بھی تمام تر وسائل کے ساتھ میدان میں اتر چکے ہیں۔ پاکستان میں نئی اور پرانی گاڑیوں کی فروخت میں اضافے کی پیش گوئی کی جارہی ہے جس کی وجہ مجموعی اقتصادی صورتحال میں بہتری ہے۔ یہی امر نئے سرمایہ کاروں کو پاکستان میں کاروبار شروع کرنے کی طرف راغب کر رہا ہے۔

رواں مالی سال 2016-2017 پر نظر ڈالیں تو اس دوران انڈس موٹرز کی جانب سے ٹویوٹا فورچیونر اور ہائی لکس ریوُو متعارف کروائی جاچکی ہیں۔ اس کے علاوہ پاک سوزوکی نے بھی ویتارا کے ذریعے خریداروں کو متوجہ کرنے کی کوشش کی ہے۔ اس سے اندازہ لگایا جاسکتا ہے کہ آنے والا وقت گاڑیوں کے شعبے میں کیا کچھ تبدیلیاں لے کر آئے گا۔ سال 2017 شروع ہوچکا ہے اور اس سال سیڈان طرز کی چار گاڑیوں کی پاکستان میں پیشکش متوقع ہے۔ آئیے ان گاڑیوں کا تعارف کرواتے ہیں۔

سوزوکی سیاز
جی جناب! اب انتظار کی گھڑیاں ختم ہونے کو ہیں۔ پاک سوزوکی ایک عرصے سے سیڈان کے میدان سے باہر ہے اور یہاں انڈس موٹرز اور ہونڈا ایٹلس کا راج ہے۔ لیکن اب سوزوکی سیاز کے ذریعے پاک سوزوکی موٹرز ایک مرتبہ پھر اس میدان میں قدم جمانے کو تیار ہے۔ ایک اندازے کے مطابق اس سیڈان کو سال 2017 کی پہلی ششماہی میں پیش کیا جاسکتا ہے۔

آوڈی A5 اسپورٹس بیک
اسے کوپے طرز کی سیڈان سمجھیے یا سیڈان طرز کی کوپے، دونوں ہی باتیں درست ہیں۔ لیکن دلچسپ بات یہ ہے کہ آوڈی A5 اسپورٹس بیک درحقیقت آوڈی A7 ہی کو کانٹ چھانٹ کر بنایا گیا ہے۔ اسے پیش کرنے کا مقصد متوسط طبقے میں جرمن سیڈان گاڑیوں کو متعارف کروانا ہے۔ آوڈی پاکستان کی جانب سے سال 2017 کی پہلی ششماہی میں A5 کو پیش کیا جانا متوقع ہے جبکہ قیمت اور دیگر تفصیلات کا اعلان ابتدائی سہہ ماہی میں کیا جائے گا۔

FAW بی 50
الحاج FAW موٹرز پاکستان میں پیش کی جانے والی چینی گاڑیوں کی فہرست میں اضافہ کرنے کا خواہش مند ہے۔ پاکستان میں FAW V2 کو مقامی خریداروں کی جانب سے حاصل ہونے والی پزیرائی نے اس ضمن میں اہم کردار ادا کیا ہے۔ اب یہ ادارہ سیڈان گاڑیاں فروخت کرنے والے اداروں میں سے ایک بننا چاہتا ہے اور اسی لیے سا ل2017 کی چوتھی سہہ ماہی میں FAW B50 پیش کرنے تیاریاں جاری ہیں۔

نئی ٹویوٹا کرولا
پاکستان میں ایک عرصے سے ٹویوٹا کرولا کے نئے انداز کا انتظار کیا جارہا ہے۔ ٹویوٹا کرولا کی طویل فہرست سیڈان طرز کی گاڑیاں رکھنے والے خریداروں کو متعدد مواقع فراہم کرتی ہے۔ انڈس موٹرز کی جانب سے رواں سال 2017 کی آخری سہہ ماہی میں ٹویوٹا کرولا کا نیا انداز متعارف کروایا جاسکتا ہے۔


Top