ماہِ رمضان کے پیش نظر پیٹرولیم مصنوعات کی قیمتیں برقرار رکھنے کا فیصلہ

Fuel Prices in Pakistan unchanged due to ramadan

آئل اینڈ گیس ریگولیٹر اتھارٹی (اوگرا) کی جانب سے پیٹرولیم مصنوعات کی قیمتوں میں اضافے کی سفارش مسلسل دوسری بار مسترد کردی گئی ہے۔ وفاقی وزیر خزانہ اسحاق ڈار نے گزشتہ روز (منگل) ذرائع ابلاغ کے نمائندوں سے بات کرتے ہوئے بتایا کہ عالمی منڈی میں خام تیل کی قیمتوں میں اضافے کے باوجود حکومت نے جون 2016 میں پیٹرولیم مصنوعات کی قیمتوں میں اضافہ نہ کرنے کا فیصلہ کیا ہے۔

وفاقی وزیر خزانہ نے بتایا کہ اس فیصلے کا مقصد ماہِ رمضان میں عوام کو زیادہ سے زیادہ سہولت فراہم کرنا ہے۔ انہوں نے کہا کہ پیٹرولیم مصنوعات کی قیمتیں بڑھانے سے دیگر اشیاء ضرورت کی قیمتوں میں بھی اضافے کا امکان تھا لہٰذا حکومت نے قیمتیں برقرار رکھنے اور عوام پر معاشی بوجھ کو کم کرنے کے لیے 8.5 ارب روپے کی رقم قومی خزانے سے ادا کرنے کا فیصلہ کیا ہے۔

یہ بھی پڑھیں: ہائبرڈ گاڑیوں کی درآمد میں اضافہ؛ حکومت کو ٹیکس آمدن میں 4.7 ارب روپے کمی

یاد رہے کہ اوگرا نے جون 2016 کے لیے پیٹرول پر 0.85 روپے فی لیٹر، ہائی آکٹین پر 2.18 روپے فی لیٹر، ہائی ڈیزل پر 6.69 روپے فی لیٹر، لائٹ ڈیزل پر 4.47 روپے فی لیٹر جبکہ مٹی کے تیل پر 3.97 روپے فی لیٹر اضافے کی تجاویز وزارت پیٹرولیم و قدرتی وسائل کو ارسال کی تھیں۔ اس سے قبل اوگرا نے مئی 2016 کے لیے بھی پیٹرولیم مصنوعات کی قیمتوں میں اضافے کی تجویز ارسال کی تھی جسے وزیر اعظم نواز شریف نے مسترد کرتے ہوئے اپریل 2016 کی قیمتیں برقرار رکھنے کا فیصلہ کیا تھا۔

جون 2016 کے لیے پیٹرولیم مصنوعات کی فی لیٹر قیمتوں کی تفصیل درج ذیل ہے:

پیٹرول 64.27 روپے فی لیٹر
لائٹ ڈیزل 37.97 روپے فی لیٹر
ہائی اسپیڈ ڈیزل 72.25 روپے فی لیٹر
مٹی کا تیل 43.25 روپے فی لیٹر
ہائی آکٹین 72.62 روپے فی لیٹر
Asad Aslam

A PakWheeler with a degree in mass communication. He tweets as @masadaslam

Top