انتظار کی گھڑیاں ختم: ہونڈا HR-V پاکستان میں متعارف کروادی گئی

2016-honda-hrv-launch-(33)

پاک ویلز بلاگ پر ہم نے گذشتہ سال ذکر کیا تھا کہ ہونڈا ایٹلس پاکستان میں ہونڈا HR-V پیش کرنے والا ہے۔ آج وہ خبر سچ ثابت ہوئی اور پاکستان کے دل لاہور میں ہونڈا ایٹلس نے ایک خصوصی تقریب کے دوران 2016 ہونڈا HR-V سے پردہ ہی اٹھا دیا۔

نئی ہونڈا HR-V 2016 کو 1500 سی سی i-VTEC انجن کے ساتھ پیش کیا گیا ہے۔ اس کے ساتھ ہونڈا کا CVT بھی شامل ہے۔ اس مختصر SUV میں پیڈل شفٹرز کے علاوہ دور جدید کی کئی ایک ٹیکنالوجیز بھی شامل ہیں جن میں پُش اسٹارٹ (بٹن کے ذریعے گاڑی اسٹارٹ کرنے کی سہولت)، کلائمٹ کنٹرول (مناسب درجہ حرارت کو برقرار رکھنے کی سہولت)، کی لیس انٹری (بنا چابی گاڑی کھولنے کی سہولت) کے ساتھ کروز کنٹرول اور الیکٹرانک پارکنگ بریکس قابل ذکر ہیں۔ گاڑی میں 7 انچ ٹچ اسکین بھی لگائی گئی ہے جو معلوماتی و تفریحی سرگرمیوں کے لیے استعمال کی جاسکتی ہے۔

ہونڈا HR-V میں 17 انچ کے پہیے لگائے گئے ہیں۔ اس کے علاوہ ایک اضافی پہیہ بھی دیا گیا ہے جو جاپانی وِزل میں شامل نہیں ہوتا۔ حفاظتی سہولیات پر نظر ڈالیں تو نئی ہونڈا HR-V میں وی ایس اے، اے بی ایس، دہرے ایس آر ایس ایئربیگز کے ساتھ پچھلی جانب دیکھنے کے لیے خصوصی کیمرے بھی دیے گئے ہیں۔

ہونڈا ایٹلس اس نئی گاڑی کو 8 مختلف رنگوں میں پیش کرے گی جن کی تفصیل یہ ہے:
پرل: سیاہ، سفید، سرخ اور نیلا
ٹھوس: سیاہ اور سفید
چمکیلے: اسٹیل اور نقرئی

2016-honda-hrv-launch-(3)

ہونڈا یٹلس کی جانب سے اس نئی گاڑی کی قیمت 36,19,000 روپے رکھی گئی ہے۔ اس قیمت میں 2 سال کی وارنٹی بھی فراہم کی جارہی ہے۔ مزید 24 ہزار روپے کے عوض آپ گاڑی میں اضافی سہولیات سے بھی لطف اندوز ہوسکتے ہیں۔

ہونڈا HR-V کی پیش کش کا مقصد ہونڈا ایٹلس کے پورٹ فولیو میں اضافے کے ساتھ جاپان سے درآمد کی جانے والی ہونڈا وِزل کا مقامی متبادل فراہم کرنا بھی ہے۔ پچھلے کئی ماہ سے ہونڈا ایٹلس کی تیار کردہ گاڑیوں کی فروخت مسلسل تنزلی کا شکار رہی ہے۔ اس نئی گاڑی کو پیش کرکے ہونڈا ایٹلس اپنی گرتی ہوئی ساکھ کو برقرار رکھنے کی کوشش کرے گا۔

2016-honda-hrv-launch-(1)

اس گاڑی کا نام HR-V داصل Hi-Rider Revolutionary Vehicle کا مخفف ہے۔ اس کا شمار جاپانی کار ساز ادارے ہونڈا کی مشہور زمانہ گاڑیوں میں کیا جاتا ہے۔ HR-V مختصر SUV ہے جس کا انداز ہونڈا وِزل سے ملتا جلتا ہے۔ البتہ اس میں کئی ایک قابل ذکر تبدیلیاں بھی کی گئی ہیں۔ عالمی سطح پر HR-V کی دوسری جنریشن پیش کی جا رہی ہے البتہ پاکستان میں پیش کی جانے والی یہ پہلی جنریشن ہے۔ HR-V کی تیاری کے لیے ہونڈا فِٹ تھرڈ جنریشن کا پلیٹ فارم استعمال کیا گیا ہے۔

پاکستان میں ہر نئی گاڑی کی آمد ہمارے لیے باعث خوشی رہی ہے۔ البتہ دیکھنا ہوگا کہ ہونڈا HR-V دیگر ہائبرڈ گاڑیوں بشمول وِزل کے مقابلے میں کتنی کامیاب رہتی ہے۔

Top