آٹو ایکسپو 2016: ہونڈا CD110 ڈریم ڈیلکس کی آمد!

Honda-CD-110-Dream-Deluxe-Auto-Expo-2016-(1) - Feature

بھارت میں جاری ایشیا کی سب سے بڑی آٹو ایکسپو 2016 میں نت نئی گاڑیوں کے ساتھ جدید موٹر سائیکلوں کی نقاب کشائی کا سلسلہ بھی جاری ہے۔ اس سلسلے میں تازہ اضافہ معروف جاپانی موٹر سائیکل ساز ادارے ہونڈا (Honda) کی جانب سے CD110 ڈریم ڈیلکس کی پیش کش ہے۔ انڈین آٹو بلاگ کے مطابق نئی ہونڈا CD110 برقی اسٹارٹر کے ساتھ متعارف کروائی گئی ہے۔ یہ 110 سی سی بائیک کا دوسرا ورژن ہے۔

اس سے قبل 110 سی سی میں ہونڈا کی صرف ایک ہی موٹر سائیکل (motorcycle) دستیاب تھی۔ پرانی اور نئی دونوں ہی بائیکس میں الائے ویلز اور اگلے پچھلے پہیوں پر ڈرم بریکس موجود ہیں۔ پچھلے ماڈل میں کِک اسٹارٹر موجود تھا اور اب ہونڈا موٹر سائیکل اور اسکوٹر انڈیا سیلف-اسٹارٹ کی خصوصیت بھی پیش کر رہے ہیں۔ دیکھنے میں دونوں ہی بائیکس ایک جیسی لگتی ہیں البتہ نقش و نگار اور رنگوں میں کچھ نیا اضافہ کیا گیا ہے۔ پہیوں کے اوپر موجود مڈگارڈز اور چند دیگر حصوں میں کاربن فائبر سے نقش بنائے گئے ہیں۔ دونوں ہی موٹر سائیکلوں میں 101.19 سی سی انجن موجود ہے جو 8.25 ہارس پاور اور 8.63 نیوٹن میٹر ٹارک فراہم کرتا ہے۔ ہونڈا نے اس انجن کو 4-اسپیڈ ٹرانسمیشن سے منسلک کیا ہے۔

اس وقت پاکستان میں صرف سوزوکی 110 سی سی موٹر سائیکلیں فروخت کر رہی ہے جبکہ یاماہا پاکستان یا کسی اور ادارے کی طرف سے اس زمرے میں کوئی بائیک نہیں پیش کی گئی۔ سوزوکی 110 سی سی بائیکس کے چار مختلف ماڈل یہ ہیں:
1. سوزوکی GD110 – قیمت: 1,14,000 روپے
2. سوزوکی GD110S – قیمت: 1,26,000 روپے
3. سوزوکی رائیڈر 110 – قیمت: 1,01,400 روپے
4. اسپرنٹر ایکو 110 – قیمت: 93,400 روپے

سوزوکی GD110 اور GD100S دراصل ایک ہی موٹر سائیکلیں ہیں البتہ ان کے ظاہری انداز میں کچھ چیزیں مختلف ہیں۔ اسی طرح رائڈر اور اسپرنٹر کئی اعتبار بشمول انجن ایک ہی جیسی ہیں۔ البتہ اسپرنٹر ایکو کے مقابلے میں رائیڈر کا فیول ٹینک زیادہ بڑا ہے۔ عمومی کِک اسٹارٹ سہولت کی حامل مذکورہ چاروں موٹر سائیکلیں 4-اسپیڈ گیئر باکس کے ساتھ پیش کی جاتی ہیں۔

بھارت میں پیش کی جانے والی CD110 ڈریم کا پچھلا ماڈل 43,997 بھارتی روپے (68000 پاکستانی روپے) میں دستیاب ہے۔ نئی ہونڈا CD110 ڈریم ڈیلکس کی قیمت اب تک نہیں بتائی گئی ۔ خوبصورت موٹر سائیکل کی تصاویر ذیل میں ملاحظہ کریں:

Top