بھارت میں ہونڈا سِٹی کا نیا انداز اکتوبر میں متوقع

honda-city-6th-gen-face-lift

دنیا بھر میں ہونڈا سِٹی (Honda City) کی چھٹی جنریشن کی پیش کش کو تین سال ہونے والے ہیں۔ البتہ پاکستان میں پانچویں جنریشن سِٹی کی فروخت اب بھی جاری ہے اور نئی جنریشن کی آمد متوقع نہیں رہی۔ عام طور پر ہونڈا گاڑیوں کی ایک جنریشن 6 سال تک چلتی ہے یوں اب سِٹی کی موجودہ جنریشن اپنا نصف دورانیہ یعنی 3 سال مکمل کرنے والی ہے۔ اسی ضمن میں ہونڈا سِٹی کا نیا انداز متعارف کروایا جارہا ہے جو مستقبل میں جاری رہے گا تاقتیکہ 2019 میں نیا ماڈل نہ پیش کردیا جائے۔

ہونڈا سِٹی کی تیسری جنریشن 1996 سے 2002، چوتھی جنریشن 2002 سے 2008 اور پانچویں جنریشن 2007 سے 2013 تک جاری رہی۔ جیسا کہ اوپر ذکر گزرا کہ عالی سطح پر 2013 میں پانچویں جنریشن ختم کیے جانے کے باوجود پاکستان میں اس کی فروخت 2008 سے یعنی مجموعی طور 8 سالوں سے اب تک جاری و ساری ہے۔

یہ بھی دیکھیں: ہونڈا سِٹی 2015 پر پاک ویلز کا ویڈیو تبصرہ

ہمارے پاس ماضی سے متعدد مثالیں موجود ہیں جن سے ثابت کیا جاسکتا ہے کہ اس سال ہونڈا سِٹی کا نیا انداز (فیس لفٹ) پیش کیا جائے گا جسے معروف جریدے اکنامک ٹائمز میں شائع ہونے والی خبر سے بھی سند ملتی ہے۔ البتہ ایک نئی بات یہ سامنے آئی ہے کہ ہونڈا سِٹی کا یہ نیا انداز بھارت میں تیار کیا جارہا ہے اور اس کی آمد ماہِ اکتوبر میں آئندہ دیوالی پر متوقع ہے۔

ہونڈا کارز انڈیا کی طرف سے چند ہفتوں قبل ہونڈا سِٹی کے اندرونی حصے میں متعدد تبدیلیاں کی گئی تھیں۔ ان تبدیلیوں کے ساتھ اسے ہونڈا سِٹی VX کے نام سے پیش کیا گیا تھا۔ یہ تبدیلی دراصل سِٹی کو ماروتی سیاز کے مدمقابل لانے کے لیے کی گئی تھیں۔ لیکن اکتوبر میں متوقع فیس لفٹ میں اس کے علاوہ بھی کئی تبدیلیاں کی جائیں گی۔ ان میں بیرونی حصے کے ڈیزائن کو بہتر بنانے کے ساتھ سِٹی میں دی گئی تکنیکی سہولیات میں اضافہ بھی متوقع ہے۔

Top