ہونڈا سوک 2016 کوپ اور ہونڈا سوک 2017 ٹائپ آر کی خفیہ تصاویر

honda-civic-coupe-type-r

ہونڈا سوک کے مداحوں کے لیے ہمارے پاس دو زبردست خبریں ہیں۔

ہونڈا سوک 2016 کوپ کی خفیہ تصاویر

پہلی خبرہونڈا سوک 2016 کوپ سے متعلق ہے جو 16 ستمبر کو دنیا کی سب سے بڑی عالمی نمائش فرینکفرٹ آٹو شو میں پیش کی جائے گی۔ گوکہ اب اس میں زیادہ دن باقی نہیں لیکن اس کے باوجود شائقین کی طرف سے اس گاڑی کی خفیہ تصاویر کو انٹرنیٹ پر بہت شوق سے دیکھا اور شیئر کیا جا رہا ہے۔

تصاویر دیکھ کر انداز لگایا جاسکتا ہے کہ گاڑی اپنے پرانے جوش اور جذبے سے مکمل سرشار ہے۔ عقب میں اس کی ایل ای ڈی لائٹس دائیں سے بائیں تک پھیلی ہوئیں ہیں جو اس کے روایتی انداز کا زبردست اظہار ہے۔ توقع ہے کہ اس میں 2 لیٹرنیچرلی ایسپرٹڈ انجن کے ساتھ بالکل نیا 1.5 لیٹر ٹربو چارڈ انجن بھی موجود ہوگا جو 148 ہارس پاور ور 203 نیوٹن میٹر تدویر فراہم کرے گا اور 6 اسپیڈ مینوئل یا ہونڈا سی وی ٹی گیئر باکس کا حامل ہوگا۔ حالیہ تصاویر سے سوک 2016 کے اندرونی حصے کابھی جائزہ لیا جاسکتا ہے جسے دیکھ کر اندازہ ہوتا ہے ہونڈا نے نئی سوک کے اندرونی حصے پر خاص توجہ دی ہے جس میں ایک نیا انفوٹینمنٹ سسٹم بھی شامل ہے۔

ہونڈا سوک 2017 ٹائپ-آر کی خفیہ تصاویر

اب آتے ہیں دوسری خبر کی طرف جو ہونڈا سوک 2017 ٹائپ آر سے متعلق ہے جس کی خفیہ تصاویر سے ظاہر ہوگیا ہے کہ وہ ڈگی والی گاڑی ہی ہوگی اوراس کا انداز تخلیق سیڈان اور کوپ سے قدرے مختلف ہے۔ یہ 18 انچ کے سیاہ دائرے میں پتلے ٹائر کی حامل ہے جس سے اس کے طاقتور بریمبو بریکس کی کارکردگی کا بخوبی اندازہ لگایا جاسکتا ہے۔پیچھے کی جانب نظر ڈالیں تو سیڈان اور کوپ کی طرح اس میں بھی کمان کی طرز پر ایل ای ڈی لائٹس موجود ہیں لیکن سب سے دلچسپ بات یہ ہے کہ مستقبل کی اس ٹائپ – آر میں اخراج کے لیے تین سوراخ رکھے گئے ہیں جو گاڑی کے پچھلے حصۓ کے عین درمیان میں موجود ہیں۔

یہ دونوں گاڑیاں رواں ماہ کی 16 تاریخ کو نمائش کے لیے پیش کی جائیں گی۔ تب تک کے لیے آپ ان کی تصاویر ملاحظہ کریں اور ہمیں بتائیں کہ آپ کو یہ گاڑیاں کیسی لگیں۔

Top