ہونڈا سِوک 2016ء یورپ میں 2017ء میں پیش ہوگی

hond-civic-13-1

سِوک 2016ء سے پردہ اٹھنے کے بعد ہونڈا موٹرز ہر طرف سے داد و تحسین وصول کر رہا ہے لیکن ایسے میں ہونڈا سوک کی دسویں جنریشن پیش کرنے میں تاخیر کے اعلان سے ہونڈا شائقین کا سارا جوش بیٹھتا ہوا محسوس ہو رہا ہے۔ ایک خبر کے مطابق ہونڈا یورپ میں نئی سِوک ڈیڑھ سال بعد یعنی 2017ء میں پیش کرے گا۔

چار دروازوں والی ہونڈا سِوک ریاستہائے متحدہ امریکا میں رواں سال کے آخر میں پیش کی جائے گی تاہم 5 دروازوں والی سِوک یورپ میں نہیں آسکے گی۔ 5 دروازوں والی سِوک کو ہونڈا کی ہائپر سپر کار NSX کے ساتھ متعارف کروانے کی توقع کی جارہی ہے۔ ہونڈا کے خیال میں دونوں گاڑیوں کےایک ساتھ اجرا سے وہ سالانہ 2 لاکھ گاڑیاں فروخت کرنے کاسنگ میل عبور کرسکے گا۔

اگر یورپ میں سوک 2016ء اتنے طویل عرصے بعد پیش کی جائے گی تو پاکستان میں اس کی آمد بھی تاخیر متوقع ہے۔ ایک اندازے کے مطابق پاکستان میں ستمبر 2016ء میں نئی سِوک پیش کی جانی تھی تاہم اب اس عرصے میں مزید ایک سال کا اضافہ ہوسکتا ہے۔

یہ خبر جتنی ہمارے لیے باعث افسوس ہے اتنی ہی ہونڈا ایٹلس کے لیے بھی مایوس کن ہے۔ گزشتہ دو ماہ یعنی جولائی اور اگست کے اعداد و شمار کے مطابق ٹویوٹا کرولا کی فروخت دُگنی ہوگئی تھی جبکہ اسی عرصے میں ہونڈا سِوک کی فروخت میں کمی واقع ہوئی تھی (مکمل رپورٹ یہاں پڑھیں)۔ اب ہونڈا کے اس قدم سے ٹویوٹا کو مزید فائدہ پہنچنے کی توقع ہے۔

Top