نئی ہونڈا سِوک ٹائپ-آر سے پردہ اٹھا دیا گیا

Honda Civic Type-R Announce

فرانس کے دارالحکومت پیرس میں شروع ہونے والے موٹر شو کے پہلے ہی روز ہونڈا موٹر کمپنی دھوم مچادی ہے۔ جاپانی کار ساز ادارے نے مقبول ترین سیڈان ہونڈا سِوک (Civic) کا ٹائپ-آر (Type R) ماڈل پیش کر کے نہ صرف پیرس موٹر شو کے حاضرین بلکہ دنیا بھر میں موجود گاڑیوں کے شائقین کو اپنی جانب متوجہ کرلیا ہے۔

ہونڈا سوک ٹائپ-آر کی باضابطہ نمائش سے قبل ہی اس کی تصاویر انٹرنیٹ پر تیزی سے گردش کر رہی تھیں۔ جرمنی کے مقبول بورگرینگ ٹریک پر آزمائش کے دوران بھی اس گاڑی کی خفیہ تصاویر مختلف فورمز اور بلاگز کی زینت بنتی رہیں۔ ماہرین کا خیال ہے کہ پیرس موٹر شو میں دکھایا جانے والا نمونہ اور فروخت کے لیے پیش کی جانے والی سِوک ٹائپ-آر کا مجموعی انداز بالکل یکساں ہوگا البتہ پچھلے حصے میں موجود اسپائلر (spoiler) کا ڈیزائن تھوڑا تبدیل کیا جاسکتا ہے۔ ہونڈا موٹر کمپنی سوک ٹائپ-آر کو رواں سال نومبر کے مہینے میں لاس ویگاس میں ہونے والے امریکی SEMA شو میں بھی پیش کرے گی۔

یہ بھی پڑھیں: کیا ہونڈا سوک ٹائپ آر پاکستان میں مقبول ہوگی؟

screen_shot_2016-09-29_at_06.29.42

ظاہری انداز میں زبردست جذباتیت اور ان میں اضافہ کرنے والے بڑے ایئر انٹیکس (air-intakes) کے علاوہ ٹائپ-آر کا سب سے قابل ذکر پہلو اس کا انجن ہوگا۔ گو کہ کار ساز ادارے نے اب تک اس حوالے سے کوئی معلومات فراہم نہیں کی تاہم شعبے کے ماہرین کا کہنا ہے کہ سوک ٹائپ-آر کو 4-سلینڈر 2000cc ٹربو انجن کے ساتھ پیش کیا جاسکتا ہے۔ یہ انجن 304 بریک ہارس پاور اور 400 نیوٹن میٹر ٹارک فراہم کرسکتا ہے تاہم اس مزید بہتری کی کوشش سے اس کی صلاحیت کو 340 بریک ہارس اور 450 نیوٹن میٹر ٹارک تک بڑھایا جاسکتا ہے۔ ایک اندازے کے مطابق ہونڈا سوک ٹائپ-آر 0 سے 100 کلومیٹر فی گھنٹہ کی رفتار صرف 5 سیکنڈ میں حاصل کرسکتی ہے۔ یقین جانیئے! یہ رفتار کسی بھی ہیچ بیک کے لیے بہت زیادہ ہے۔

ہونڈا کی جانب سے پیرس موٹر شو کے پہلے ہی روز اپنی دھاک بٹھانے کی کوشش مکمل طور پر کامیاب نظر آتی ہے۔ اس سے یہ بھی اندازہ لگایا جاسکتا ہے کہ ہونڈا مستقبل کے لیے کس قدر سنجیدہ ہے۔اور اسی ضمن میں ہونڈا سِوک اپنا کردار بھرپور انداز سے نبھا رہی ہے۔ اس حوالےسے ہم مزید معلومات اپنے قارئین سے شیئر کرتے رہیں گے۔

نئی ہونڈا سِوک آسان اقساط پر حاصل کرنے کے لیے یہاں کلک کریں

Top