حکومتِ جاپان نیشنل ہائی ویز اینڈ موٹروے پولیس کو ٹویوٹا پرایوس فراہم کرے گی

Toyota Prius donated by JAPAN (1)

جاپان کی حکومت بڑی شاہراہوں پر قانون نافذ کرنے والے قوامی ادارے نیشنل ہائی ویز اینڈ موٹروے پولیس کو نئی ٹویوٹا پرایوس کا عطیہ دے گی۔ اس حوالے سے پچھلے چند دنوں سے مسلسل خبریں موصول ہو رہی تھیں جس کے بعد ہم نے اپنے ذرائع سے رابطہ کیا اور اس بات کی تصدیق چاہی۔ ہمارے ذرائع نے قانون نافذ کرنے والے اداروں کو اسلام آباد میں ٹویوٹا پریوس استعمال کرتے ہوئے دیکھا ہے۔

حکومتِ جاپان کی جانب سے فراہم کردہ گاڑیوں کی تعداد کا علم نہیں ہوسکا البتہ ایک اندازے کے مطابق ان کی تعداد کم و بیش 135 ہوگی۔ یہ گاڑیاں نیشنل ہائی ویز اینڈ موٹر وے پولیس کے علاوہ مختلف وزارتوں کو بھی دیئے جانے کا امکان ہے۔نئی ٹویوٹا پرایوس ٹویوٹا انڈس موٹرز کے تعاون سے پاکستان بھیجی جائیں گی۔یاد رہے کہ قانون نافذ کرنے والے اداروں میں ٹویوٹا کرولا، ٹویوٹا پراڈو اور ٹویوٹا ہائی ایس استعمال کی جاتی رہی ہے۔

یہ بھی پڑھیں: سیکورٹی اداروں کے لیے خصوصی سوزوکی انزوما ایجس موٹر سائیکل

ایک طرف ٹویوٹا پرایوس میں ایندھن کی بچت جیسی خصوصیت سے قومی ادارے کے اخراجات میں کمی آئے گی وہیں دوسری طرف ان گاڑیوں کی مرمت اور سروس پراضافی اخراجات کی وجہ سے بوجھ پڑنے کا بھی امکان ہے۔ یہ بھی اب تک واضح نہیں کہ آیا ٹویوٹا پرایوس پہلے سے موجود ٹویوٹا کرولا کی جگہ لے گی یا پھر دونوں گاڑیوں استعمال کی جاتی رہیں گی۔

ٹویوٹا کے آبائی وطن جاپان کی طرف سے دیئے گئے تحفے سے پاکستان میں ہائبرڈ گاڑیوں کے شعبے میں بہتری کی توقع کی جارہی ہے۔ ٹویوٹا پرایوس پاکستان میں ایک گھریلو گاڑی کے طور پر مشہور ہے اور کافی پسند بھی کی جاتی رہی ہے۔ اس حوالے سے مزید تفصیلات ہم اپنے قارئین تک پہنچاتے رہیں گے۔ اس خبر کو منظر عام پر لانے والے فیس بک صفحے سے لی گئی تصاویر آپ کے لیے پیش کر رہے ہیں۔

Top