کاواساکی H2R: صرف 26 سیکنڈز میں 400 کلومیٹر فی گھنٹہ کی رفتار

Kawasaki H2R

کہتے ہیں جنون کا دوسرا نام کاواساکی ہے۔ یہ جاپانی ادارہ (Kawasaki) ایسی موٹر سائیکل تیار کرتا ہے کہ جن کی رفتار ناقابل یقین ہوتی ہے۔ اگر اس کی تازہ مثالیں دیکھنا چاہیں تو نئی کاواساکی H2 اور کاواساکی H2R آپ کے سامنے ہیں۔ نئی کاواساکی H2 کو دنیا کی واحد سُپر چارجڈ بائیک ہونے کا بھی اعزاز حاصل ہے جبکہ H2 کا مزید بہتر ماڈل H2R بھی پیش کیا جاچکا ہے۔ دونوں ہی موٹرسائیکلوں میں 998cc انجن لگایا گیا ہے تاہم حیران کن بات یہ ہے کہ ایک ہی انجن رکھتے ہوئے ان دونوں کی رفتار میں بہت واضھ فرق ہے۔ جہاں کاواساکی H2 کم و بیش 200 ہارس پاوررکھتی ہے وہیں H2R اس سے ڈیڑھ سو فیصد زیادہ یعنی 300 ہارس پاور کی حامل ہے۔ اس سے اندازہ لگایا جاسکتا ہے کہ کاواساکی H2 سڑکوں پر دوڑانے کے لیے بنائی گئی ہے تاہم H2R صرف اور صرف ریسنگ ٹریک ہی پر دوڑائی جاسکتی ہے۔

کاواساکی کے مداحوں کے لیے H2 کوئی نیا نام نہیں ہے۔ اس سے قبل 1970 کے عشرے میں کاواساکی نے 2-اسٹروک 3-سلینڈر 750cc بائیک متعارف کروائی تھی جس کا نام H2 ہی رکھا گیا تھا۔ اور ماضی میں بھی کاواساکی H2 کا ڈنکا اتنی ہی زور سے بجا تھا کہ جتنا آج سنا جا رہا ہے۔

یہ بھی دیکھیں: کاواساکی H2 سُپر بائیک پر کراچی کی سیر!

نئی کاواساکی H2R کے بارے میں کہا جارہا تھا کہ یہ 400 کلومیٹر فی گھنٹہ کی رفتار سے دوڑ سکتی ہے۔ تاہم کسی میں ہمت نہ تھی کہ اس دعوی کی سچائی جاننے کی کوشش کرے۔ لیکن پھر ایک ترک باشندے نے H2R اس چیلنج کو قبول کیا۔ یہ ترک باشندہ کوئی عام شخص نہیں بلکہ مایہ ناز موٹر سائیکل ریسر کینان سوفوگلو ہے جس نے سب سے زیادہ چار مرتبہ سُپراسپورٹ ورلڈ چیمپئین شپ کا اعزاز بھی حاصل کر رکھا ہے۔

کینان نے ترکی میں کاواساکی H2R کو 2.68 کلومیٹر طویل عثمان غازی برج پر دوڑانے کا فیصلہ کیا۔ اس دوران دنیا کے چوتھے طویل ترین معلق پُل (suspension bridge) عثمان غازی برج کو دیگر گاڑیوں کی آمد و رفت کے لیے بند کردیا گیا تھا۔ ترک ریسر نے اس پُل پر کاواساکی H2R کچھ اس انداز سے دوڑائی کہ صرف 26 سیکنڈ میں 400 کلومیٹر فی گھنٹہ کی رفتار حاصل کرلی۔ اس دوران وہاں موجود موٹر سائیکل ریسنگ کے مداح جہاں حیرت و مسرت کے ملے جلے جذبات میں مبتلا رہے وہیں ایک نئی تاریخ رقم کرنے پر کینان کا جوش و خروش بھی قابل دید تھا۔

KAWASAKİ H2R TOP SPEED RECORD 0-400km/h 26 second..

Top