شاندار BMW X7 2019 پاکستان میں متعارف کروا دی گئی


بالآخر انتظار کی گھڑیاں ختم ہوئیں اور دیوان موٹرز نے پاکستان میں نئی BMW X7 xDrive40i متعارف کروا دی ہے جو 22 اور 23 جولائی 2019ء کو دیوان کے شو روم پر گرینڈ ڈسپلے کے لیے موجود ہے۔ 

آراستہ و پیراستہ اور دیکھنے میں شاندار BMW X7 اب پاکستان میں باضابطہ طور پر دستیاب ہے۔ طاقتور انداز اور کشادہ ڈیزائن رکھنے والی BMW X7 جدید خصوصیات اور سہولیات کے ساتھ ہر جگہ نمایاں نظر آتی ہے۔ جرمن آٹو مینوفیکچرر نے نشستوں کی تین قطاروں کے ذریعے اسے بہت آرام دہ گاڑی بنایا ہے، BMW X7 ہر زاویے سے بہت دل فریب اور خوبصورت لگتی ہے اور بلاشبہ ان گاڑیوں میں شامل ہے جن کا BMW میں بھی کوئی ثانی نہیں۔ اس نے صارفین کی خواہش کے مطابق کچھ اضافی آپشنز کے ساتھ معیاری فیچرز بھی پیش کیے ہیں۔ 

پاور ٹرین اور کارکردگی 

BMW X7 کارکردگی کے لحاظ سے ایک پاور ہاؤس ہے جو 6-سلنڈر 3.0 لیٹر ٹوئن پاور ٹربو پٹرول انجن سے لیس ہے۔ اس کا طاقتور 2998cc انجن 340 hp اور زیادہ سے زیادہ 450 Nm کا ٹارک پیدا کر سکتا ہے۔ شاندار X7 کی کارکردگی کا اندازہ اس کی صفر سے 100 کلومیٹر فی گھنٹے کی رفتار تک پہنچنے کی صلاحیت سے لگایا جا سکتا ہے جو یہ صرف 6.0 سیکنڈز میں حاصل کر سکتی ہے اور آٹومینوفیکچرر کے دعوے کے مطابق اس کی زیادہ سے زیادہ رفتار 245 کلومیٹر فی گھنٹہ ہے۔ اوسطاً اس کی ایندھن کھپت 9.5 لیٹر فی 100 کلومیٹر ہے۔ فیول ٹینک کی کُل گنجائش 83 لیٹرز ہے۔ 

ایکسٹیریئر 

ایکسٹیریئر ڈیزائننگ اور فنشنگ کے معاملے میں BMW X7 کا لیول ہی کچھ اور ہے۔ باڈی پینٹ کی اعلیٰ کوالٹی گاڑی کو قابلِ دید اور پرکشش بناتی ہے۔ یہ صارفین کی کشش کے لیے کئی نئے زاویے رکھتی ہے۔ یہ خوبصورت شاہکار سڑک پر سب سے نمایاں نظر آتا ہے۔ سامنے کے حصے پر واضح اور طاقتور اسٹائلنگ اسے دوسری گاڑیوں سے ممتاز کرتی ہے۔ ہیڈلائن شفاف ڈیزائن رکھتی ہیں اور آگے دیکھنے کی صلاحیت کو بہتر بناتی ہیں۔ آٹو مینوفیکچرر نے اس گاڑی کو BMW لیزر لائٹ بھی دی ہے، جس کے گرد نیلے رنگ کی روشنی ہے۔ ہیڈلائٹس کا اعلیٰ معیار زبردست لیزر لائٹ دیتا ہے کہ جس کی رینج حیرت انگیز طور پر 600 میٹر تک ہے؛ یعنی عام ہیڈلائٹس سے تقریباً دوگنی۔ متاثر کُن ڈبل کڈنی گرِل ایک واحد بڑے یونٹ کی شکل میں نظر آتی ہے، جو اس گاڑی کے ڈیزائن انداز کو بیان کرتی ہے۔ یہ جرمن آٹو مینوفیکچرر کے مثالی ڈیزائن معیارات کی عکاسی کرتی ہے کہ جو اپنی مخصوص گرِل میں کروم کو شامل کرتا ہے۔ اس کے اندر فوگ لائٹس بھی ہیں جو BMW X7 کی سامنے کی شکل و صورت کو مکمل کرتی ہیں۔ 

وی-اسپوک اسٹائل کے 20 انچ لائٹ الائے ویلز تمام زاویوں سے، بالخصوص سائیڈ سے دیکھنے پر، زبردست لگتے ہیں۔ BMW X7 کے رن-فلیٹ ٹائرز بلاشبہ ہر قسم کے راستوں پر جم کر چلتے ہیں۔ فرنٹ اور ریئر ٹائرز کے درمیان ایک نیا عنصر شامل ہے جسے air breather کہا جا رہا ہے جو گاڑی کی لمبائی تک پھیلا ہوا ہے۔ ہاکی اسٹک سے ملتا جلتا یہ خوبصورت اضافہ BMW X7 کو اطراف سے شاندار منظر دیتا ہے۔ اگلی اور پچھلی کھڑکیوں کے کنارے کروم کی پٹی رکھتی ہیں جو دُور سے ہی اسے خوبصورت دِکھاتی ہیں۔ 

BMW X7 کا پچھلا حصہ ایک مرتبہ پھر گاڑی کی پوری چوڑائی پر پھیلی عمودی کروم اسٹرپ کے ساتھ ہموار شکل کے LED ریئر لیمپس رکھتا ہے۔ ہائی-ماؤنٹڈ بریک لیمپ X7 کے ڈیزائن کو مکمل کرتا ہے جبکہ پچھلی وِنڈ اسکرین پر وائپر بھی موجود ہے۔ 

انٹیریئر: 

اندر داخل ہونے سے لے کر باہر قدم رکھنے تک BMW X7 بے مثال کلاس رکھتی ہے اور اپنی جدید خصوصیات اور سہولیات کی بدولت آرام دہ سفر فراہم کرتی ہے۔ BMW X7 دروازہ کھلنے پر اپنے سفید رنگ کے ویلکم لائٹ کارپٹ کے ساتھ آپ کا خیر مقدم کرتی ہے۔ کشادہ انٹیریئر فوراً ہی آپ کی توجہ حاصل کر لیتا ہے کہ جس کا ماحول ہی سب سے الگ ہے۔ پینورامک گلاس رُوف آپ کو اوپن ایئر تھیٹر کا احساس دلاتی ہے، جس سے صارفین پر بہت دیرپا تاثر پڑتا ہے۔ اسے کیبن کے اندر کشادہ اور پرکشش ماحول کا احساس دینے کے لیے بنایا گیا ہے۔ گاڑی کا کیبن لائٹوں کے بہترین مجموعہ رکھتا ہے جو مؤثر ماحول بناتی ہیں، خاص طور پر رات کے اوقات میں۔ پینورامک گلاس روف میں لائٹ گرافکس ہیں جو آسمان کو خوبصورت انداز میں ظاہر کرتے ہیں اور ان میں روشنی کے چھ رنگ تبدیل کیے جا سکتے ہیں۔ 

X7 باآسانی سات افراد کے بیٹھنے کی گنجائش فراہم کرتی ہے۔ دوسری قطار میں موجود نشستوں پر مسافروں کے آرام کو یقینی بنانے کے لیے جدا جدا ایڈجسٹ ایبل آرم ریسٹس ہیں۔ اعلیٰ معیار کے Vernasca Canberra Beige leather سے بنی نشستیں مسافر کو بہت آرام دیتی ہیں۔ انٹیریئر میں گلاس ایپلی کیشن پر مینوفیکچرر کی جانب سے کافی توجہ دی گئی ہے جیسا کہ گیئر سلیکشن لیور، والیم کنٹرول، آئی ڈرائیو کنٹرولر اور اسٹارٹ/اسٹاپ بٹن میں۔ یہ سب ہاتھ سے تیار کیے گئے کرسٹل گلاس کے ساتھ بخوبی تراشے گئے ہیں۔ اسٹیئرنگ ویل پر اسپورٹس لیدر لگایا گیا ہے تاکہ ڈرائیور کو بہترین گرفت مل سکے۔ 

لگژری، آرام اور تفریحی خصوصیات: 

جیسا کہ پہلے بتایا گیا کہ دروازہ کھولنے سے نیچے سطح پر خصوصی لائٹ گرافکس نظر آتی ہیں۔ یہ نہ صرف آپ کا خیرمقدم کرتی ہیں بلکہ اندھیرے میں آپ کو گاڑی سے نکلنے میں بھی مدد دیتی ہیں۔ BMW X7 کی-لیس انٹری رکھتی ہے جو آپ کو گاڑی کو لاک، اَن لاک کرنے ہی کی نہیں بلکہ انجن کو اسٹارٹ/اسٹاپ کرنے کی بھی سہولت دیتی ہے۔ درمیان میں ٹمپریچر کنٹرولڈ کپ ہولڈرز بھی BMW X7 میں ایک اور زبردست اضافہ ہیں۔ انہیں دونوں طرف لگے بٹنوں کے ذریعے چلایا جا سکتا ہے جس میں نیلا اور سرخ رنگ بالترتیب ٹھنڈا یا گرم کرنے کے موڈ آن کرتا ہے۔ اِس لیے اب کافی کا کپ یا ٹھنڈے مشروبات لے کر چلنا کوئی مسئلہ ہی نہیں کیونکہ اب آپ نئی X7 چلاتے ہیں۔ گاڑی میں مزید آرام کے لیے کمپنی نے 4 زون کنٹرول کے ساتھ آٹومیٹک ایئر کنڈیشننگ فراہم کی ہے۔ اس کا مطلب ہے کہ ڈرائیور اور آگے بیٹھے مسافر کے علاوہ دوسری اور تیسری قطار میں موجود تمام مسافر اپنے لیے الگ ماحول ترتیب دے سکتے ہیں۔ آگے adaptive ہیڈلائٹس روشنی کی شدت کو بار بار بہتر کرنے کے بجائے ڈرائیور کو اپنی پوری توجہ سڑک پر رکھنے کی سہولت دیتی ہیں۔ BMW X7 ایڈاپٹو 2-ایکسل ایئر سسپنشن رکھتی ہے جو کہیں زیادہ روانی اور گاڑی کے لیے ممکنہ حد تک بہترین توازن فراہم کرتی ہے اور اس دوران ہر سطح پر آرام دہ ترین سفر کو یقینی بناتی ہے۔ 

گاڑی کی نشستیں الیکٹرک ایڈجسٹمنٹ فیچرز بھی رکھتی ہیں جو لیور کی مدد سے مینوئل ایڈجسٹمنٹ سے چھٹکارا دیتی ہے۔ اس میں Servotronic اسٹیئرنگ بھی ہے جو گاڑی کی رفتار کے مطابق اسٹیئرنگ کو ایڈجسٹ کرتا ہے۔ کروز کنٹرول فیچر بھی موجود ہے جو گاڑی کو ڈرائیور کی طے کردہ رفتار کے مطابق چلانے کے لیے تھروٹل سنبھالتا ہے۔ 

انٹرٹینمنٹ کے معاملے میں بھی BMW X7 میں بہت کچھ ہے۔ یہ سراؤنڈ ساؤنڈ سسٹم سے لیس ہے جو زبردست معیار کی آواز دیتا ہے۔ کیبن کے اندر یکساں فاصلے سے کُل 10 اسپیکر لگے ہوئے ہیں جو مجموعی طور پر 205 W کی آؤٹ پُٹ طاقت دیتے ہیں۔ ایک 12.3 انچ کا انفوٹینمنٹ سسٹم بھی ڈیش بورڈ کے درمیان میں انسٹال کیا گیا ہے تاکہ مسافروں اپنی پسند کی موسیقی سے لطف اندوز ہو پائیں۔ یہ 12.3 انچ کے کنٹرول ٹچ ڈسپلے میں نیوی گیشن کے ساتھ BMW لائیو کاک پٹ پروفیشنل کی سہولت بھی رکھتی ہے۔ چارجنگ وغیرہ کے لیے 12V کا ایک پاور ساکٹ بھی لگایا گیا ہے۔ X7 پارک ڈسٹنس کنٹرول (PDC) فیچر سے بھی لیس ہے جو ڈرائیور کو گاڑی پارک کرنے میں مدد دیتی ہے۔ یہ گاڑی الٹرا سونک سینسرز کا استعمال کرتی ہے جو BMW X7 کے اگلے اور پچھلے حصوں میں لگے ہوئے ہیں جو چیزوں کا کھوج لگاتے ہیں اور ڈرائیور کو بروقت خبردار کرتے ہیں۔ 

اضافی فیچرز: 

پارکنگ اسسٹنٹ پلس BMW X7 میں اضافی فیچر کے طور پر آتا ہے جو گاڑی کی پارکنگ اور سمت بندی میں مدد دیتا ہے۔ یہ ریئر ویو کیمرا، سراؤنڈ ویو سسٹم اور ریموٹ 3D ویو سے لیس ہے تاکہ ڈرائیور کو بغیر کسی مسئلے کے گاڑی کو مناسب انداز میں پارک کرنے میں مدد فراہم کرے۔ 

رنگ اور قیمت: 

BMW X7 سیاہ سیفائر میٹالک رنگ میں دستیاب ہے اور اس کی قیمت 3,05,000 یورو ہے جو موجودہ شرحِ تبادلہ کے حساب سے 54.62 ملین روپے بنتے ہیں۔ اسے 22 اور 23 جولائی 2019ء کو دیوان موٹرز کے شو روم پر نمائش کے لیے پیش کیا جا رہا ہے۔ BMW X7 دیکھنے کے خواہش مند افراد 23 جولائی کو گرینڈ ڈسپلے کے موقع پر صبح 9 سے رات 9 بجے تک کے دوران شو روم کا دورہ کر سکتے ہیں۔ 

پاکستان میں متعارف کروائی گئی نئی BMW X7 کے بارے میں آپ کی رائے کیا ہے؟ ہمیں نیچے تبصروں میں آگاہ کیجیے اور مزید خبروں کے لیے پاک ویلز کے ساتھ رہیے۔


Google App Store App Store

Apart from being an Electrical Engineer by profession, he is an automotive content writer at PakWheels, a web designer and a photographer.

Top