جرمنی کی شاہراہ پر جدید و خودکار مرسڈیز ٹرک کا آزمائشی سفر

daimler-mercedez-truck-13

تصور کریں کہ آپ گاڑی چلاتے ہوئے اپنی پیچھے ایک بڑے ٹرک کو آتا ہوا دیکھیں جس میں ڈرائیونگ سیٹ خالی ہو تو آپ کیا کریں گے؟ میں تو چاہوں گا کہ اس ٹرک کے قریب جاؤں اور دیکھوں کہ آیا کوئی جن بھوت والا معاملہ ہے یا پھر جدید ٹیکنالوجی کی مدد سے یہ ٹرک خود بخود چل رہا ہے۔ کچھ ایسی ہی صورتحال جرمنی کی شاہراہ پر سفر کرنے والوں کے ساتھ پیش آئی ہوگی کہ جب انہوں نے دائملر کے ایک ٹرک کو ڈرائیور کی مدد کے بغیر سفر کرتے ہوئے دیکھا ہوگا۔

مرسڈیز بنانے والے جرمن ادارے دائملر نے اپنی منفرد ‘ہائی وے پائلٹ’ سافٹ ویئر کے حامل ٹرک کو ایک مصروف شاہراہ پر اتارا اور وہ ٹرک تقریباً 9 میل تک ڈرائیور کی مدد کے بغیر کامیابی سے چلتا رہا۔ گوکہ ٹرک ساز ادارہ ڈرائیور کے بغیر بھی اس ٹیکنالوجی کا مظاہرہ کرسکتا تھا تاہم مصروف شاہراہ پر کسی اندوہناک سانحے سے بچنے کے لیے تمام سفر کے دوران کٹھ پتلی ڈرائیور کو بٹھائے رکھا۔

daimler-highway-pilot-truck

متعدد شاہراہوں پر مختلف اوقات میں خود کار ٹیکنالوجی کے حامل ٹرک کو چلانے کا تجربہ کیا جاچکا ہے اور اس کے نتائج حیرت انگیز طور پر بہت اچھے آئے ہیں۔ دنیا بھر کے کار ساز ادارے عام گاڑیوں کے لیے اس ٹیکنالوجی پر کام کر رہے ہیں تاہم ایک ٹرک کی انتہائی مصروف شاہراہ پر کامیاب آزمائش سے ظاہر ہوتا ہے کہ اب یہ ٹیکنالوجی طویل اور محفوظ سفر کے لیے بھی استعمال کی جاسکے گی۔ البتہ ہائی وے پائلٹ نظام میں فی الوقت ڈرائیور کی موجودگی کو لازمی قرار دیا جا رہا ہے اس کی وجہ غیر معموی صورتحال جیسے خراب موسم یا سڑک کی بندش کی صورت میں حادثات سے محفوظ رکھنا ہے۔

لیکن سوال یہ ہے کہ ڈرائیور کی موجودگی میں اس نظام کا فائدہ کیا ہے؟ اس بارے میں دائملر نے بتایا کہ ہائی وے پائلٹ کا نظام ڈرائیور کو سہولت دیتا ہے کہ وہ طویل سفر کے دوران ٹرک کو خود کار نظام پر چھوڑ کر خود کو ذہنی اور جسمانی تھکن سے بچا سکے۔ اس نظام میں ٹرک کے اگلے حصے کی چھت پر چند ریڈار، کیمرے اور رفتار ناپنے کے آلات لگے ہوئے ہیں۔ اس کے علاوہ حفاظت اور عمومی جانچ کے لیے متعدد سینسرز بھی لگائے ہیں جو دوران سفر ٹرک کے آس پاس موجود علاقے پر نظر رکھتے ہیں۔

ایسے جدید ٹرک بنانے کا ایک مقصد ڈرائیور صاحبان کی رات گئے طویل سفر اور غیر ذمہ دارانہ ڈرائیونگ کے باعث ہونے والے حادثات سے بچاؤ کا بندوبست کرنا بھی ہے۔ دائملر کا کہنا ہے کہ وہ اس ٹرک کے ذریعے اپنے سماج دوست ادارے کے تصور کو مزید مضبوط کرے گا ۔ البتہ کار ساز ادارے کا یہ بھی کہنا ہے کہ ابھی جدید ٹیکنالوجی کے حامل ان ٹرک کو فروخت کے لیے پیش کرنے میں ایک طویل عرصہ درکار ہوگا لہٰذا میری طرح مستقبل قریب میں اسے سڑکوں پر چلتے پھرتے دیکھنے کی خواہش رکھنے والوں کو ابھی مزید انتظار کرنا ہوگا۔

LamanSamo

My love for cars is unexplainable, especially when it comes to SUV's. Apart from that I'm currently doing my bachelors. Working with PakWheels was what I always wanted and here I am.

Top