مٹسوبشی لانسر ایوولوشن کا سلسلہ “فائنل ایڈیشن” کے ساتھ ختم کرنے کا فیصلہ

2015-mitsubishi-lancer-evo-final-010-1

تقریباً 23 سال اور دس جنریشنز بعد مٹسوبشی ایوو کا دور اختتام پذیر ہونے والا ہے۔ گاڑیوں کی دوڑ کے ہر نوجوان شوقین کے خوابوں والی گاڑی اب محض تاریخ کی کتابوں تک محدود ہونے جا رہی ہے۔ مٹسوبشی نے اپنی یادگار مٹسوبشی لانسر ایوولوشن سلسلے کو ختم کا اعلان کرتے ہوئے محدود پیمانے پر “فائنل ایڈیشن” بھی جاری کرنے کا فیصلہ کیا ہے تاکہ اس تاریخی گاڑی کو شایان شان انداز سے الوداع کیا جاسکے۔

مٹسوبشی لانسر ایوو کا فائنل ایڈیشن 2 ہزار سی سی ٹربو چارجڈ اور MIVEC چار سلینڈر پر مشتمل ہے۔ اس کا سسپنشن بلسٹن شاکس اور آئیبیک اسپرنگز کے ساتھ بہتر بنایا گیا ہے۔ گاڑی میں انتہائی اعلی کارکردگی دکھانے والے یوکوہاما ایڈون ٹائرز لگائے گئے ہیں۔ بیرونی انداز میں بھی متعدد تبدیلیاں کی گئی ہیں جن میں سرخ، سیاہ اور سفید رنگوں کی خوبصورت آمیزش کی گئی ہے۔ گاڑی کی چھت کو سیاہ ایلومینیم سے مزین کیا گیا ہے۔

فائنل ایڈیشن کی صرف 1600 گاڑیاں تیار کی جائیں گی۔ انہیں چار رنگوں میں پیش کیا جائے گا جن میں سفید، بھورا، سرخ اور نیلا رنگ شامل ہے۔اس کی قیمت تقریباً 40 لاکھ پاکستانی روپے ہوگی۔

ایک ایسی گاڑی کے اختتام پذیر ہونے کا سن کر بہت افسوس ہوتا ہے جسے دیکھتے ہوئے ہم بڑے ہوئے ہیں اور نیڈ فار اسپیڈ (Need For Speed) میں گھنٹوں اس گاڑی کے ساتھ مقابلہ کرتے رہے۔ البتہ یہ بھی سننے میں آ رہا ہے کہ مٹسوبشی ایوو کی جگہ لانسر کا ایک اور ماڈل پیش کرے گی جو ممکنہ طور پر ہائبرڈ ہوگا۔ ہم امید کرتے ہیں یہ خبر جلد یا بدیر سچ ثابت ہوگی۔

Top