نِسمو کی تیار کردہ 2017 نسان GT-R پیش کردی گئی

2017 Nissan GT-R NISMO

نسان گاڑیوں کی کاکردگی بہتر بنانے والے ذیلی ادارے نسان موٹراسپورٹس انٹرنیشنل لمیٹڈ (نِسمو) نے اس بار 2017 نسان GT-R پر طبع آزمائی کی ہے۔ یہ وہی 2017 نسان GT-R ہے جو رواں سال نیو یارک آٹو شو 2016 میں پیش کی گئی تھی۔ اب 2017 میں پہلے سے بہتر باڈی، نئے ڈیزائن کا حامل ڈیش بورڈ اور اندرونی حصے میں بھی قابل ذکر تبدیلیاں کی گئی ہیں۔

چونکہ یہ نِسمو کی تیار کردہ GT-R ہے اس لیے 2017 نسان GT-R سے اس کا مختلف ہونا لازمی امر ہے۔ اس GT-R کو نِسمو کا اگلا بمپر نہ صرف نئے ڈیزائن کا حامل ہے بلکہ اسے ایئروڈائنامکس اصولوں کے مطابق بھی ڈھالا گیا ہے۔ البتہ اس حوالے سے جاری ہونے والے اعلامیے میں ایک دلچسپ بات کی گئی ہے اور وہ یہ کہ 2017 نسمو GT-R کی چھت کو بھی بہتر بنایا گیا ہے تاکہ وہ برق رفتاری کے دوران ایروڈائنامکس کے مطابق بنائی گئی شکل میں برقرار رہے۔ دوسرے لفظوں میں نسان (Nissan) یہ تسلیم کر رہا ہے کہ اب سے پہلے جو GT-R تیار کی گئیں ان کی چھت کسی قسم کے بگاڑ کا شکار ہوجاتی تھیں۔

2017 Nissan GT-R NISMO (10)

نسان کا یہ بھی دعوی ہے کہ 2017 نسمو GT-R کی گرفت بھی پچھلے ماڈلز کے مقابلے میں زیادہ بہتر ہے۔ اس کے لیے گاڑی کے اگلے حصے میں کاربن فائبر سے بنائے گئے اسپلٹرز لگائے گئے ہیں۔ نِسمو نے گاڑی کے سسپنشن میں بھی بہتری کی ہے اور اب آپ مختلف اسپرنگز، اسٹیبلائزر بارز اور بلسٹین ڈمپرز کے ساتھ گاڑی چلانے کا لطف اٹھاسکتے ہیں۔

یہ بھی پڑھیں: بی ایم ڈبلیو Z4 اور ٹویوٹا سُپرا کی متبادل 2018 میں پیش کی جائیں گی

نِسمو نے ٹوِن ٹربو 3800 سی سی V6 انجن میں کسی قسم کی تبدیلی نہیں کی یوں آپ اس گاڑی میں بھی 600 ہارس پاور اور 481 فٹ پاؤنڈ ٹارک حاصل کرسکیں گے۔ 2017 نسان GT-R کے سستے ترین ماڈل میں شامل انجن بھی آپ کو 565 ہارس پاور اور 467 فٹ پاؤنڈ ٹارک فراہم کرنے کی اہلیت رکھتا ہے۔ اسے سیاہ، سرخ، سفید اور نقرئی (silver) رنگوں میں رواں سال کی تیسری سہہ ماہی کے دوران فروخت کے لیے پیش کیا جائے گا۔ قیمت سے متعلق ابھی تک ادارے نے کوئی معلومات فراہم نہیں کیں۔

پاکستان میں متعدد نسان GT-R دیکھی جاچکی ہیں تاہم اب دیکھنا یہ ہے کہ آیا گاڑیوں کا شوقین کوئی فرد نِسمو کی تیار کردہ GT-R پاکستان میں درآمد کرنے اور پھر یہاں دوڑانے کا حوصلہ کرپاتا ہے یا نہیں۔

Top