پاک سوزوکی اور ٹیکنو پیک کے درمیان 34 کروڑ روپے کا معاہدہ

551b65af7b3fc

پاک سوزوکی موٹر کمپنی (PSMC) نے مقامی ادارے ٹیکنو پیک ٹیلی کام (پرائیوٹ) لمیٹڈ کے ساتھ شراکت داری میں ایک نئے ادارے کے قیام کا اعلان کیا ہے۔ ٹیکنو آٹو گلاس کے نام سے بنایا جانے والا یہ ادارہ مقامی سطح پر گاڑیوں کے شیشے تیار کرنے کا کام کرے گا۔

ذرائع کے مطابق گزشتہ بدھ پاک سوزوکی کے بورڈ آف ڈائریکٹرز نے ایک قرار داد منظور کی ہے۔ اس کے تحت کار ساز ادارہ ٹیکنو آٹو گلاس کے 3,44,40,000 حصص خریدنے کے لیے ساڑھے 34 کروڑ روپے کی سرمایہ کاری منظور کی گئی ہے۔

ٹیکنو آٹو گلاس مستقبل میں پاک سوزوکی اور ٹیکنو پیک ٹیلی کام پرائیوٹ لمیٹڈ کا مشترکہ منصوبہ ہے۔ اس میں پاک سوزوکی 40 فیصد سرمایہ کاری کرے گا جبکہ باقی 60 فیصد سرمایہ کاری ٹیکنو پیک ٹیلی کام اور دیگر نامزدگان کی جانب سے کی جائے گی۔ ذرائع نے مزید بتایا کہ ٹیکنو آٹو گلاس ایک پبلک کمپنی (غیر اندراج شدہ) ہوگی اور 40 فیصد حصص رکھنے والے ادارے پاک سوزوکی کے ماتحت سمجھی جائے گی۔

یہاں یہ بات قابل ذکر ہے کہ پاکستان میں غیر ملکی اداروں کی بڑھتی ہوئی دلچسپی نے پاک سوزوکی پر دباؤ بڑھایا ہے کہ وہ پاکستان میں اپنی ساکھ بہتر اور مضبوط بنانے کے لیے مزید سرمایہ کاری کرے۔ اس کا ایک عملی ثبوت پاک سوزوکی کی حالیہ سرگرمیوں اور مستقبل کے منصوبوں سے بھی لگایا جاسکتا ہے جن میں سال 2017ء کے دوران متعدد گاڑیوں کی پیشکش بھی شامل ہے۔ یہ بات روز روشن کی طرح عیاں ہے کہ 1000cc اور کم قوت انجن والی گاڑیوں کے زمرے میں سوزوکی ہی کی اجارہ داری ہے۔ ماہرین کہتے ہیں کہ اگر سوزوکی نے مناسب قیمت پر نئی گاڑیاں پیش کیں تو کوئی بعید نہیں کہ انہیں پاک چین اقتصادی راہداری کی تکمیل سے بھی بے حد فوائد حاصل ہوسکتے ہیں۔


Top